Nsenga ayikabutulwa su?

Lwaluulo lwa Bible

Nyaa, nsenga t’ayikabutwa efuku sunga ndimune, kwiyishiika kaalo, sunga kwiyipyanyisha na ingi nya. Bible alongyesha shi Efile Mukulu baadi mupangye nsenga bwashi tushaale mwanka bwa looso.

• “Balulame abapete eumbo [nsenga] abeemushaala looso.”​—Misambo 37:29.

• “[Efile Mukulu] mmushimikye nsenga pa bitako byaayo, nginyingye bwa looso.”​—Misambo 104:5.

• “Nsenga . . . ayikala panka looso.”​—Mulungudi 1:4.

• “Efile Mukulu mubumbe na mukite nsenga aye mwiyinyingishe, . . . shii mwiyipagye iibisumanga, kadi mwiyibumbe bwabady’a kwimushaala.”​—Yeeshaya 45:18.

Bantu abakalwisha nsenga?

Efile Mukulu t’akatadiila bantu bwashi balwishe nsenga bwa looso na bintu bi bubi, ngoshi, sunga mu ungi mushindo. Pamutwe pa byabya, akyebe ‘nkabutula baaba abalwisha nsenga.’ (Kibafumbwilwe 11:18) A bino ebilombasha naminyi?

Efile Mukulu akyebe akyebe nkakaasha mafumu a bana ba bantu, abakutwa koobesha kukalwila nsenga, akapyanyikiisha na Bufumu bwa mwiyilu. (Ndanyele 2:44; Mateo 6:9, 10) Bwabwa Bufumu abakebunkunkusha kwi Mwan’efile Mukulu, Yesu Kidishitu. (Yeeshaya 9:6, 7) Pabaadi pa nsenga, Yesu baadi mukite bilengyeleshi bya bukome ku bipangwa. (Maako 4:35-41) Bu byadi Nfumu a Bufumu bw’Efile Mukulu, Yesu akaata myanda ya nsenga ishima mu maasa. Akapanguula sunga kwalushuula nshalelo a mu nsenga mupya, amwikashe nka bi yawa baadi mu lupango lwa Edene.​—Mateo 19:28; Luka 23:43.

Bible alongyesha shi nsenga ayikabutudibwa mu kaalo?

Nya, ta mbyabya. Yawa mmweneno e bubi afikaa misusa ibungi ku mpushisho e bubi a 2 Mpyeele 3:7, (EEM), amba bino: “Mayilu na nsenga bia binobino . . . mbilamibwe bwa kaalo.” Tala myanda ibidi ayitukwasha bwa kupusha kalolo akipatuula aa mayi:

1. Bible afubisha bishima “mayilu,” “nsenga,” na “kaalo” bwa kuleesha bintu bibungi. Bu kileshesho, Kibangilo 11:1 aleesha bino: “Nsenga ishima ibaadi ayaakula mwakulo umune.” Pano, “nsenga” ayileesha bantu.

2. Nfundilo a 2 Mpyeele 3:7 aleesha a mpatulwilo mayilu, nsenga, na kaalo bileshibwe pano. Verse 5 na a 6 ayileesha kwipusheena na Mpeshi a kabutu a mu mafuku a Nowa. Wawa mususa, ndumbulwilo a kala baadi mutulwe, kadi nsenga yetu tayibaadi ishimine. Pa mutwe pa byabya, Mpeshi a kabutu baadi mubutule bantu bash’etombo, sunga “nsenga.” (Kibangilo 6:11) Baadi mubutule dingi “eyilu”​—baatu abaadi abakunkusha bantu pano a nsenga. Byabya, ababutwile ba ntomboshi, ta ngino nsenga yetu nya. Nowa na kifuko kyaye abaadi bapande ku kabutu ka yawa ndumbulwilo n’abo nkushaala pa nsenga kunyima kwa Mpeshi a kubutu.​—Kibangilo 8:15-18.

Anka bu myeshi ya Mpeshi a kyeshi, kabutu sunga “kaalo,” ka mu 2 Mpyeele 3:7 akakafudiisha ndumbulwilo a bantu be bubi, kushii Nsenga. Efile Mukulu balayile shi: “Mayilu apya na nsenga ipya, mwamwa amukeekala kululama.” (2 Mpyeele 3:13) “Nsenga ipya,” sunga ndumbulwilo mupya, akakunkushibwa na “mayilu apya,” sunga bakunkushi bapya​—Bufumu bw’Efile. Ku matalwa a bwabwa Bufumu, nsenga ayikekala mpaladiso a butaale.​—Kibafumbwilwe 21:1-4.