Longyesha mwana obe pabitale myanda ya kusangisha mbidi

LUKALAKASHI

Mu bipwa makumi bishale, baledi abaadi na kaa ka kwikala bantu ba kumpala ba kwisamba na bana babo balume sunga bakashi pabitale myanda ya kusangisha mbidi. Na babaadi balombeene kupatuula myanda kapeelakapeela, muyile bipwa bya mwana na myanda ayitungu shi aukye.

Bino byooso mbipwe kushintuluka. Mukanda wa The Lolita Effect awamba shi: “Bana mbalombeene kubanga kupeta ma mesaje a myanda ya bipindi bia mbidi bia buufu mpa na pabakii bakinga ngofu, na myanda ya bipindi bia mbidi bia buufu tayidi bungi mu bintu abitala bana.” Ino myanda i lelo ayikwasha bana su ayibalwishisha?

AKITUNGU KUUKA

Bintu abisambila myanda ya bipindi bia mbidi bia buufu bi mbalo yooso. Mu mukanda waye wa Esambe naami kumpala (Angl.) Deborah Roffman mufunde shi “mu miisambo, piblisite, filme, mikanda, ngono, emisio a TV, mesaje, maasha, panneau publicitaire, na telephone na ordinatere, muule na bifwatulo, ngakwilo mutale myanda ya kusangisha mbidi, na kwikwatena kwa ku mbidi akutumu bana bebungi [bansongwa mpa na byalaala] mu kumona shi kusangisha mbidi . . . mwanda ukile buwa.”

Piblisite i na kyayo kilema. Bantu abakitaa ma publisite na kupaana bilamba abakamba kupaana bilamba bikwate mbidi, abifwisha bana baki bakinga mu kwata abimweneka mbidi yabo na muulo. Mukanda wa So Sexy So Soon awamba shi: “Bantu abakitaa ma piblisite abauku shi bana bakinga abakumiinaa kwikala bakuminyibwe na kwikala bi beenabo, na abatumikila bino binangu. Bino byoso bifwatulo bitale mbidi tabikimbi kulongyesha bana pabitale kusangisha mbidi nya, kadi mbwashi baule.”

Kulungula myanda byayidi ta nkulombane nya. Anka bi kwilekena pankatshi pa kuuka abitambukaa motoka na kwikala mutambushi a moto ebuwa, kwi kwilekeene pankatshi pa kuuka myanda itale kusangisha kwa mbidi na kutumikila kino kyukilo bwa kwata bitshibilo bibuwa.

Elango dia kulonda: Lelo uno, kukita kala kooso, abitungu okwashe bana boobe bapete “kyubishi” bwa “kushinguula myanda ibuuwa na ibubi.”​—Beena-Ebelu 5:14.

KYODIA KUKITA

Epaane. Sunga byekala bufu naminyi, kwisamba pabitale myanda ya kusangisha mbidi na bana boobe nyi mudimo obe. Kumiina kwiuka bianka.​—Eyi dya kulonda di mu Bible: Nkindji 22:6.

Esambe nabo kapeelakapeela. Pamutwe pa kwikala na miisambo ila nabo pabitale mbidi, esambe nabo kapeelakapeela panudi binangu bitaale, ­pangi nsaa yanudi bubidi anutambuka mu motoka sunga kukita mudimo kampanda mu nshibo. Bwa kukwasha mwana obe akule, ikala omwele nkonko bwashi aleshe bi binangu byaye. Bu kileshesho, pamutwe pa kwamba shi “Piblisite i bino ayikusangasha?” we kwamba shi “Bwakinyi opwandjikisha shi bano bakite piblisite bifwatulo bi bino bwa kupana bintu byabo?” Kunyima kwa mwana kwaluula, we kumwipusha shi, “Omono naminyi pabitale uno mwanda?”​—Eyi dya kulonda di mu Bible: Miiya Ikituulwe 6:6, 7.

Londa bipwa byaye. Bana batabadi pepi na kutwela mu kalasa nwi balombene kwibalongyesha mashina a bipindji bya mbidi yabo ya bu mulume sunga mukashi, na mushindo wabadi balombeene kwikalalwila kwi bantu babi bakumbeene kwibalwisha. Pabakulu, nwi balombeene kwibalungula ingi myanda itale kutanda. Pabafiki bansongwa, abitungu baukye myanda ya ku mbidi na mu muikeelo pabitale kusangisha kwa mbdi.

Ebalesheyi myanda ya muulo. Banga kulongyesha mwana obe​—paki mukinga—​pabitale mwikeelo ululame, lulamato, na kaneemo. Akupu, nsaa yanwisamba pabitale kusangisha kwa mbidi, wekala na ngikashi yodi mulombeene kwisambila. Na dingi, esambe kalolo pabitale myanda yokwete obe kwata na muulo. Bu kileshesho, su omonaa shi kusangisha mbidi kumpala kwa kwibakila kwi bubi, mulungule byanka. Na dingi mupatulwile bwakinyi kwi bubi na kwi masaku. Mukanda umune (Beyond the Big Talk) awamba shi: “Baaba bansongwa abambaa shi abauku shi baledi baabo mbashikwe bansonga abasangishaa mbidi, misango ibungi tabebikitaa nya.”

Ikala bu kileshesho. Ikala na nshalelo mwipushene na myanda yolongyesha. Bu kileshesho, osepaa potemesha miseku ya myanda i butete? Nfwadilo obe akaka binangu ku mbidi? Wekala na miisambo ishi ikambe kululama na bangi balume sunga bakashi? Ino myanda ngilombeene kulwisha myanda ya muulo itale mwikeelo yokwete kulongyesha bana bobe.​—Eyi dya kulonda di mu Bible: Bena Loma 2:21.

Ikala na lukulupilo. Mbidi ya bu mukashi sunga bu mulume nkya buntu kya Efile Mukulu, mu nsaa ilombane​—mu dibaka—​ngilombeene kupa muntu muloo ukata. (Nkindji 5:18, 19) Lesha mwana obe shi apakumbana nsaa aye namu mulombeene kusangeela kino kya buntu, kushi mutwe busungu sunga kutshina kwa nkalakashi ikumbeene kufwila muntu asangisha mbidi kumpala kwa dibaka.​—1 Timotee 1:18, 19.