Nfuadilo na kulumbuula kua mbidi bibaadi Abinkokosha
MUISAMBO WA EILEEN BRUMBAUGH
INE MUKUDILE mu kipuilo kiabetamina bu Frères baptistes allemands du vieil ordre (Older Order German Baptist Brethren), malongiesha aabo ngepushene na a mukipuilo kia Amish na Mennonite. Kipuilo kiabetamina bu kia ba Vieux Frères, kibabangile mu Allemagne mu kipua kia 1708 kibaadi kipuilo kipia kibaabadi abetamina bu piétisme. Ungi mukanda wabetamina bu The Encyclopedia of Religion aulesha’shi bipuilo bia Piétisme bibaadi abilongiesha’shi: “Bant be na lukalo lua ma evajile a Kidishitu.” Uno mmueneno nyi baadi mukite bia’shi batume ba misionere bebungi mu maumbo a mu nsenga.
Mu kipua kia 1719 kasaka kapeela kabaabadi abakunkusha kui Alexander Mack kabafikile mu kushala mu kibundi kiabetamina lelo uno bu Pennsylvanie, mu États-Unis. Kunyima kino kipuilo kibaadi kitshibuulue mu tusaka tupeela tupeela. Tuatu tu bipuilo tubaadi atulongiesha malongiesha a Alexander Mack, kipuilo kioso mu wakio mushindo. Kipuilo kietu kibaadi na balanguidi peepi 50. Abaadi abalongiesha balanguidi buabadia kubadika Bible ngofu na kutumikila mianda y’abalongiesha mu kipuilo.
Baledi ba ba nkambua bande, ba nkambua bande, na baledi bande, boso buabo abaadi mukino kipuilo na akio nkufika bu kintu kikata mu muwa wabo. Mpa na a mi namu nafikile mulanguidi a mu kino kipuilo na ami nkubatshishibua panaadi na bipua 13. Kubanga ku bukinga abaadi bandongieshe’shi kufubisha motoka, katumba, telefone, sunga kisaashi sunga kintu kioso akifubaa na nsembue kuibubi. Mu kipuilo kietu bana bakashi tababaadi abafuala bilamba bu bantu boso nya, tababaadi balombene kutshibisha nyene sunga kuleka ku mutue muasa. Bana balume abaadi abalekie miefu ila. Mu kuetu kumona, kupela kuikala muntu a pa nsenga akupatuula kupela kufuala bilamba mu mushindo umune na bantu boso, kupela kuishinga malaashi, sunga kupela kufuala mabue a mu nshingo, muanda tubaadi atupuandikisha’shi bino abitakula bantu ku muluisho wa kuitatula.
Abaadi abetulongiesha bia kunemeka Bible ngofu, atubaadi atuata bu bidibua bietu bia mu kikudi. Nakashi ka oso kumpala kua kudia, kifuko kioso kishima kibaadi akiibungu mu nshibo ya kudiila bua kuteemesha Papa kuabadika shapitre a mu Bible, akupu apatuula bibaabadika. Akupu baadi ele luteko luatubaadi atuteemesha bakuname. Kunyima kua biabia maman baadi ele luteko lua Yaya etu e muiyilu. Naadi nakumiina kupetekielua yaaya nsaa ya ku nakashika ya lulanguilo, ibaadi kifuko kioso pamune, kituule binangu ku mianda ya mu kikudi.
Mu ferme etu a mu Delphi peepi na Indiana, tubaadi atukunu bisakisaki bilekene. Tubaadi atuende mu vile mu kuibipana ku nshibo na nshibo sunga mu kilayi, tubaadi atuibituala ku matempu a nfualasa. Bu biatubaadi atumono’shi mudimo wibukopo wi mu mufubo w’atufubila Efile Mukulu, tubaadi atuipaana mu wanka, kukatusha penda mu dia Lubingo, efuku diatushibaadi atuende ku mudimo wa maasa. Ingi nsaa tubaadi atufubu ngofu ku ferme biatushibaadi na mushindo wa kulombasha bitshibilo bietu bia mu kikudi.
Dibaka na kifuko
Mu 1963, panaadi na bipwa 17, nadi mutuele kui James, ungi mwina kisaka kya ba Vieux Frères. Lukumiino lwaye lwa ba Vieux Frères lubaadi lufikye kwi bankambwa ba nshaye. Atwe booso tubaadi na lukalo lukata lwa kufubila Efile Mukulu na tubaadi atupwandjikisha shi kipwilo kyetu nyi kipwilo kya binyibinyi.
Mu 1975 tubaadi na bana basamombo, na mu 1983 mwana etu a musambo na a nfudiilo baadi mutandjikye. Rebecca, mwana a kabidi, nyi mwana etu mukashi penda umune. Tubaadi atufubu ngofu, atutusha penda makuta apela, na kulama nshalelo mupelepele. Tubaadi betatshishe bwa kulongyesha bana betu ano mayi a kulonda e mu Bible abaabadi betulongyeshe kwi baledi betu na bangi ba Vieux Frères.
Byatumweneka ku mbidi bibaadi na muulo ukata kwi ba Vieux Frères. Tubaadi atumono shi bu bi muntu nta mulombeene kubadika ki mwishimba dya muntu, mushindo ufwale muntu aulesha byadi munda. Byabya, su mwina kipwilo alumbuula nyene yaaye kukilakila, tubaadi atumono shi e na kwitatula. Su kilamba ki na ungi ntelelo kampanda, tubaadi dingi atumono su uno muntu e na kwitatula. Ingi nsaa, ino myanda ibaadi bu i na muulo kukila Bifundwe binabeene.
Mafuku a mu lukano
Ku nfudiilo kwa bipwa kia 1960, Jesse mwina a na mulume ande, aye baadi dingi mukushibwe mu lukumiino lwa ba Vieux Frères, baadi mutumibwe mu lukano pa mwanda wa kupela mudimo wa busalayi. Pabaadi mu lukano, bafumankeene na Tumonyi tua Yehowa, babaadi nabo namu abamono shi kutwela busalayi nkwikutwene na mayi a kulonda e mu Bible. (Yeeshaya 2:4; Mateo 26:52) Jesse baadi mwisambe misango ibungi na ba Tumonyi na baadi mwimwene aye nabeene bi ngikashi yaabo. Kunyima kwa kulonga Bible, baadi mubatshishibwe bu umune a ku Tumonyi tua Yehowa—bino tabibaadi bitusankishe nya.
Jesse balungwile mulume ande myanda ibaadi mulongye. Baadi dingi mukite bwashi James ekale nsaa yooso apete jurnale a Kitenta kya Mulami na Pasukayi! Kubadikanga kwa ino jurnale kubaadi kupe James muloo wa kuuka pabitale Bible. Bu bi James baadi na lukalo lwa kufubila Efile Mukulu kadi baadi nsaa ibungi apusha shi e kula Naaye, baadi asangeela kyooso kilombeene kumukwasha bwa kwisesela pepi n’Efile Mukulu.
Bakulu betu babaadi abetunyingisha bwa kubadika jurnale ya myanda ya mu kikudi ya beena Amish, ba Mennonites, na bingi bipwilo bya ba Vieux Frères, sunga mbibaabadi abaata bino bipwilo bu bi mu myanda ya pano. Kadi, nshami baadi mushikwe Tumonyi tua Yehowa ngofu. Bwaye’ye, tatwi balombeene kubadika Kitenta kya Mulami sunga Pasukayi! efuku su ndimune. Byabya naadi mupushe nsungu pa kumona James eyibadika. Naadi natshinyi shi e kubanga kukumiina malongyesha a madimi.
Kadi, kubanga kala James baadi na mpaka pabitale angi malongyesha a ba Vieux Frères ashibaadi epushene na abyamba Bible—bikishekishe dilongyesha dya’shi kukita “mudimo wa ku mbidi” mu dia mposo nyi mmulwisho. Bu kileshesho, ba Vieux Frères, babaadi abalongyesha shi muntu mulombeene kupa nyema yaaye mema mu dya Mposo kadi kushi kutukula lubishi lubi. Bakulu tababaadi bobeshe kumulesha mu Bifundwe akufiki uno mwiya. Kapelakapela, na’mi namu nabangile kwela mpaka pabitale angi malongyesha.
Bu bibaadi kubanga kala bakumiina shi kipwilo kyetu nyi nky’Efile Mukulu na tubaadi atwele binangu pabitale kya kwitufwila su twemutuuka, bibaadi bukopo bwa’twe kuleka kwibunga na ba Vieux Frères. Kadi, kondo ketu k’eshimba takabaadi ketutadiile bwa kutungunuka mu kipwilo kyatumono shi takikwete kulonda akilongyesha Bible. Paapa mu 1983 tubaadi bafunde mukanda aulesha bwakinyi atulekye kwibunga nabo na tubaadi batekye bwashi uno mukanda ubadikibwe mu kipwilo. Babaadi betutuushe mu kipwilo.
Kukimba kwa kipwilo kya binyibinyi
Kunyima kwa byabya, tubabangile kukimba kwa kipwilo kya binyibinyi. Tubaadi atukimbi kipwilo mwi beena kipwilo abakitshi myanda yabakwete kulongyesha bangi bwa kukita. Kya kumpala tubaadi bakaashe bipwilo byooso bibaadi abyende mu ngoshi. Tubaadi tukii balamate ku bipwilo bi na nshalelo mupelepele, mwanda tubaadi atumono shi nshalelo na bilamba bishi bikishekishe abilesha shi kyakya kipwilo taki mu myanda ya pano. Kubanga mu 1983 na ku 1985, tubaadi baate nsaa ya kutambuka mwiumbo, bwa kutaluula kipwilo kimune kimune—ba Mennonites, ba Quakers, na bingi bisaka bi na nshalelo mupelepele.
Mu aa mafuku ba Tumonyi tua Yehowa babaadi bafikye mu kwitutala mu ntshamba yetu, pepi na kibundi kya Camden, Indiana. Tubaadi atwibatemesha na kwibalungula shi babadikye nkapenda mu Bible a King James version. Naadi nanemeka mweneno a ba Tumonyi tua Yehowa a kupela kutwela mu ngoshi. Kadi bibaadi bukopo bwa’mi kwibatemesha su tabamono shi abitungu kwikala kula na bya pano pabitale nfwadilo, namonanga shi tabe kwikala kipwilo kya binyibinyi. Namonanga shi nyi nkwitatula kubaadi akutumu bantu mu kufwala mu mushindo wabafwala. Namonanga dingi shi bintu bi na muntu nyi abimupeya kwitatula.
James babangile kwenda ku Nshibo ya Bufumu ya Tumonyi tua Yehowa, baadi ende na bangi bana betu balume. Naadi nafiitshi munda ngofu. Mulume ande baadi anyingisha bwashi nyende naabo, kadi naadi napele. Byabya dingi efuku bambile shi: “Sunga wekala tokumiina malongyesha abo ooso, banda kufika omone obe nabeene mushindo wabatambulaa bangi.” Aye nabeene bibaadi bimukume ngofu.
Kunyima, naadi mwate kitshibilo kya kwenda naabo, kadi naadi nka mudimukye. Naadi mutwele mu Nshibo ya Bufumu na bilamba byande bi bu musapi na kitambala kiikye na mu nshingo. Bangi bana betu balume babaadi ngwa mwasa na bilamba bilabila. Kadi, ba Tumonyi babafikile kwatudi na kwitukukila na kifulo kyooso. Naadi munangushene bino: ‘Atwikala belekeene nabo, kadi abetukumiina sunga mbyabya.’
Mushindo ubaabadi betukuukile na kifulo ubaadi unkume, kadi naadi na lukalo lwa penda kutala. Ntshinaadi sunga neboo sunga kuyimba ngono yaabo. Kunyima kwa bisangilo naadi mwibeele nkonko ibungi, pabitale myanda inaadi namono shi tababaadi abakitshi biya sunga verse anshi mupushe kwapatuula. Sunga na ngakwilo shi mukambe buwa, muntu ooso anaadi nele lukonko baadi ekalakasha buande. Kingi kintu kibaadi kinkanyishe nkumona su pangyele lukonko lumune kwi bantu belekeene, napete lwaluulo lwi mumune. Ingi nsaa abaadi abafundu lwaluulo mwisaki, na bino bibaadi abinkwasha bwa nkalonga ino myanda ami nabeene kunyima.
Mu kipungo kya kibobo kya mu 1985, kifuko kishima tubayile ku kikongeno kya Tumonyi tua Yehowa mu Memphis, mu Tennessee—penda bwa kutala. James baadi kii na mwefu waye, na tubaadi tukii bafwale bilambe byetu bila bi bu misapi. Munkatshi mwa bipindji bya programe tatubaadi atukisha nsaa kushi kumona bantu abafiki mu kwitutala. Kibaadi kitukakye nyi nkifulo, mushindo ibaadi bantu abekalakasha bwetu na kwitukumiina. Kibaadi kitukanyishe dingi nyi mbuumune, mwanda mbalo yooso ibatudi atutwele mu bisangilo, malongyesha abaadi nka mumune.
James, pa kumona bibaadi ba Tumonyi abetatshisha bwaye baadi mukumiina kulonga Bible. Baadi alondoola kantu kooso, bwa kushinkamisha shi byooso bibaadi alongo mby’eyendo. (Bikitshino 17:11; 1 Beena-Tesalonike 5:21) Kunyima kwa mafuku, James bamwene shi bapete bya binyibinyi. Sunga mbyabya, ntshinaadi mobeshe kwata kitshibilo nya. Naadi na lukalo lwa kukita bibuwa, kadi ntshinaadi nakumiina kumweneka bu e “mupya a ano mafuku” na bu e mu “bya pano.” Musango wa kumpala unaadi mukumiine kulonga Bible, naadi na Bible ande a King James Version ku ekunungu dimune na Bible mupya a Traduction du monde nouveau ku dingi ekunungu. Naadi nataluula verse ooso mu Bible yooso ibidi bwa kushinkamisha shi ntandjimbibwa.
Mushindo unaadi mufikye mu kukumiina
Panaadi nalongo na Tumonyi, tubalongyele shi Yaaye etu e mwiyilu nyi Efile Mukulu penda umune, ta mbasatu mu umune nya, na dingi shi atwe twi anyima, tatwi na anyima shafwiyaa nya. (Kibangilo 2:7; Miiya Ikituulwe 6:4; Ezekyele 18:4; 1 Beena-Kodinda 8:5, 6) Tubaadi dingi balongye shi inferno nyi mashama a bantu booso, ta mbalo ya kukyengyesha bantu mu kaalo nya. (Yoobo 14:13; Misambo 16:10; Mulungudi 9:5, 10; Bikitshino 2:31) Kulonga kwa bya binyibinyi pabitale inferno kubaadi mu mwanda ukata bwande, mwanda ba Vieux Frères tababaadi balombeene kukumiina uno mpushisho.
Kadi, naadi nka n’eyipusha mbikunyi bilombeene Tumonyi kwikala kipwilo kya binyibinyi aku namu mu binangu baki nka mu myanda ya pano. Ta mbalame nshalelo mupelepele a “kala”, anaadi namono shi e na muulo. Kadi, namonanga shi babaadi abalondo eyi dya Yesu dya kulongyesha mukandu wibuwa wa Bufumu kwi bantu booso. Naadi bu bashimisha binangu!—Mateo 24:14; 28:19, 20.
Mu ano mafuku a muulo ukata kwandi, kifulo kya ba Tumonyi kibaadi kinkwashe bwa kutungunuka na kukimbuula. Kakongye kashima kabaadi akekalakasha bwa kifuko kyetu. Pabaadi beena kakongye bebungi abafiki kwetu—ingi nsaa bwa kuula mabeele na mayi etu—tubabangile kwibamona bu bafubi bebuwa b’Efile Mukulu. Bangi ba Tumonyi tababaadi abapele kufika kwetu mwanda shi atulongaa na bangi nya. Kadi, nsaa yooso, beena kakongye babaadi pepi netu, babaadi abetutembela. Tubaadi na lukalo lwa byabya bwa kupeta mushindo wa kuuka ba Tumonyi na tubafikile mu kusangeela muloo na kifulo kyaabo ngofu.
Ta mpenda ba Tumonyi ba mu kakongye ke pepi netu babaadi abetatshisha bwetu nya. Bu binaadi na lukalakasho lutale bilamba na nyene, Kay Briggs, umune a ku ba Tumonyi a mu kangi kakongye, aye baadi aye nabeene musangule nfwadilo mupepele na mupele myanda ya kwipenta, bafikile mu kuntala. Naadi n’eshimba ditaale na naadi mulombeene kwisamba myanda yooso patooka. Akupu dingi efuku Lewis Flora, aye baadi mukule mu kipwilo kya myanda ya “kala,” bafikile mu kuntala. Baadi mumone mu mpala mwande mushindo wankalakashwa mwishimba aye nkuntumina mukanda wa masaki ekumi bwa kutompa kuntadisha eshimba. Kalolo kaaye kabaadi kandidishe, na nabadikile mukanda waye misango ibungi.
Naadi mwipushe mukunkushi a kifunda, Mukwetu O’Dell, bwashi ampatulwile Yeeshaya 3:18-23 na 1 Mpiele 3:3, 4. Namwipwishe shi: “Ino verse tayilesha shi abitungu tuikale atufwala bilamba bila bwa kusankisha Efile Mukulu?” Baadi munangushene naami uno mushindo: “Kufwala kitambala kikye na mu nshingo kwi bubi su? Kwitshika nyene kwi bubi su?” Mu kipwilo kya ba Vieux Frères, tubaadi atwitshika nyene ya bana betu bakashi bakinga, na atwe bakashi tubaadi atufwala tufulu sunga bitambala biikye na mu nshingo. Namwene shi takwi kwipushena, na lwishinko na kalolo ka mukunkushi a kifunda bibaadi binkume kwishimba ngofu.
Kapeelakapeela, nabangile kukumiina, kadi kubaadi ungi mwanda ubaadi aunkalakasha ngofu—bakashi mbalombeene kutshiba nyene yabo. Bakulu babaadi banangushene naami shi nyene ya bangi bakashi ayikulaa na kufudiila mu bungi bula, kadi bangi namu nyene ayitungunuka na kukula na kukila bula. Byabya nyene ya mukashi umune ngikile ya ungi su? Babaadi bankwashe bwa kumona mudimo wa kondo k’eshimba mu myanda itale kufwala na nyene na abo nkumpa bifundwe binaadi mulombeene kwenda nabyo ku nshibo bwa kubadika.
Kutumikila myanda inaadi nalongo
Tubaadi atukimbi kikuba kibuwa, na tubekipete. Yesu bambile shi: “Abakatundula shi nwi balondji bande anka ku kifulo kyaanwifuleena.” (Yowano 13:35) Tubaadi bashinkamishe shi ba Tumonyi tua Yehowa abaadi abeleshena kifulo ky’eyendo. Sunga mbyabya, bino bibaadi abikalakasha bana betu babidi bakulu, Nathan na Rebecca, mwanda abaadi bakumiine kipwilo kya ba Vieux Frères, na babaadi bemubatshishibwe. Kapeelakapeela, bya binyibinyi bya mu Bible bibatudi atwibalongyesha na kifulo kibaadi kibaleshe ba Tumonyi bibaadi bibakume ku mashimba.
Twate kileshesho kya Rebecca, aye baadi na lukalo lukata lwa kwikala na kipwano kibuwa n’Efile Mukulu. Baadi mumone shi mbikile buwa kwela nteko kwadi pabaadi mulongye shi Efile Mukulu ta mupwe kutshiba mushindo awikala bikitshino bya muntu sunga muwa waye mu mafuku e kumpala. Baadi dingi mwisesele pepi n’Efile Mukulu pabaadi mulongye shi te mu busatu bwisele, nyi muntu a binyibinyi adi mulombeene kwambula. (Bena Efeso 5:1) Na baadi na muloo wa kumona shi tabaadi na kya kwambula ngakwilo a kala e mu Bile a King James Version nsaa y’esamba naaye. Pabaadi mulongye bitungo by’Efile Mukulu pabitale luteko, mpa na mpango yaaye bwa bantu ya’shi bashale na muwa wa looso mu mpaladiso pa nsenga, baadi mufikye mu kwisesele pepi ngofu na Mupangi aaye.—Misambo 37:29; Kibafumbwilwe 21:3, 4.
Myabi yatudi bapete atwe booso
Ami na James na bana betu bakulu batano—Nathan, Rebecca, George, Daniel, na John—tubaadi babatshishibwe bu Tumonyi tua Yehowa mu kipungo kya kibobo kya mu 1987. Harley baadi mubatshishibwe mu 1989, na Simon mu 1994. Kifuko kyetu kishima twi bashale bepane mu mudimo ubaadi Yesu Kidishitu mupe balondji baaye, mudimo wa kulungula mukandu wibuwa wa Bufumu bw’Efile Mukulu.
Bana betu balume batano ba kumpala—Nathan, George, Daniel, John, na Harley—mpa na mwana etu mukashi Rebecca—baadi bafube ku biro bya filiale a Tumonyi tua Yehowa mu Etats-Unis. George kyatungunuka na kwikufuba kunyima kwa bipwa 14, Simon, baadi mupudishe kalasa mu 2001, mubangie binobino namu kufuba ku biro bya filiale. Bana betu balume booso nyi mbakulu sunga bafubi ba midimo mu tukongye twa Tumonyi tua Yehowa. Mulume ande nyi mukulu mu kakongye ka Thayer, mu Missouri, na ami ne mwipane ngofu mu mudimo wa bulungudi.
Binobino twi na bekulu basatu—Jessica, Latisha, na Caleb—na twi na muloo wa kumona baledi babo abatwesha kifulo kya Yehowa mu mashimba abo. Kifuko kyetu, twi na muloo wa kumona shi Yehowa mwitukakye kwadi na kwitukwasha bwa kutundula mwilo w’eshina dyaaye ku bukwashi bwa kifulo kyabalesha.
Mashimba etu aetuula pa mbalo ya bano be na lukalo lukata lwa kusangasha Efile Mukulu kadi be na kondo kaabo k’eshimba kalongyeshibwe na bantu sunga myanda ibabafumankeene nayo mu muwa wabo pamutwe pa kulongyeshibwa na Bible aye nabeene. Atukulupila shi abakapete namu muloo watudi nao lelo wa kwenda ku nshibo na nshibo, kushi na biumbulwanga, kadi na mukandu wa Bufumu bw’Efile Mukulu na myanda ibuwa yabukakumbasha. Meso ande ngaule na mpolo ya lutumbu pangyele binangu pabitale lwishinko na kifulo kibaabadi betuleshe kwi mwilo wi n’eshina dya Yehowa!
[Mafoto]
Panaadi na bipwa musambo, na kunyima panafiki muntu mukulu
[Foto]
James, George, Harley, na Simon, mbafwale bilamba bya kwiyisha
[Foto]
Kino kifwatulo kyande pankwete kutala biumbuluanga mu kisalwe kibaadi kituukye mu jurnale a mwiumbo
[Akufiki mafoto]
Journal and Courier, Lafayette, Indiana
[Foto]
Na kifuko kyetu lelo uno