Ne kukita kinyi bua kufika Kamonyi ka Yehowa?
Matabula a kuela bua kufika bu Kamonyi ka Yehowa mbealeshe kui Yesu mu Mateo 28:19, 20. Uno verse alesha akitunguʼshi muntu akite bua kufika mulongi a Nkidishitu, kuambaʼshi kutuusha bukamonyi pabitale Yehowa.
Etabula dia 1: Longa abilongiesha Bible. Yesu baadi mulongieshe balongi baye bua ‘kuikasha bantu bu balongi . . . , [na] kuibalongiesha.” (Mateo 28:19, 20) Bible, bikishekishe malongiesha a Yesu e muanka, e na mianda ikumbene nkukuasha bua kuikala na nshalelo a muloo. (2 Timote 3:16, 17) Tui na muloo wa nkukuasha buaʼshi olongie mianda i mu Bible ku bukuashi bua programe eetu a kulonga Bible na bantu buntu.—Mateo 10:7, 8; 1 Bena Tesalonike 2:13.
Etabula dia 2: Tumikila mianda yolongo. Yesu bambile dingiʼshi, abitungu boso abalongo ‘batumikile mianda yandi muinutumine eyi.’ (Mateo 28:20) Bino abileshaʼshi, abitungu’shi kulonga kobe kua Bible takuimenanga penda pa kunangushena, abitungu oshintuule ngelelo oobe a binangu na muikelo oobe. (Bikitshino 10:42; Bena Efeso 4:22-29; Bena Ebelu 10:24, 25) Baaba abatumikila miiya ya Yesu, kunyima abeatshila kitshibilo kia kumulonda pa kulambula miuwa yabo kui Yehowa Efile Mukulu.—Mateo 16:24.
Etabula dia 3: Batshishibua. (Mateo 28:19) Lubatshisho abelupuandikisha mu Bible na kushikiibua. (Puandikisha na Bena Loma 6:2-4.) Lui nka bu kileshesho kia kufua mu nshalelo a kala na kubanga nshalelo mupia. Akupu, kubatshishibua koobe nyi nkulesha kua patooka’shi we mupue kuela matabula oso abidi a kumpala abadi baleshe kui Yesu na abadi batekie kui Efile Mukulu bua kuikala na kondo k’eshimba keselele.—Bena Ebelu 9:14; 1 Mpiele 3:21.
Ne kuuka naminyi’shi napu kulombana bua kubatshishibua?
Esambe na bakulu ba mu kakongie. Abesamba nobe bua kutaluula su opusha kalolo kiabipatuula, okuete kutumikila mianda yodi mulongie, na we muilambule kui Efile Mukulu mu kukumiina koobe.—Bikitshino 20:28; 1 Mpiele 5:1-3.
Bana ba Tumonyi tua Yehowa mbalomene kuela ano matabula su?
Olo. Atukushaa bana betu “muyile malango na buludiki bua Yehowa,” muyile abiamba Bible. (Bena Efeso 6:4) Anka, nsaa y’abende na kukula, abitungu beatshile kitshibilo kia kulonga, kukumiina, na kutumikila malongiesha a mu Bible kumpala kuabadia kulombasha mianda itekibue bua kubatshishibua. (Bena Loma 12:2) Ku nfudiilo a bioso, muntu oso e na kia kuiatshila kitshibilo pabitale lulanguilo.—Bena Loma 14:12; Bena Ngalateya 6:5.