Mushindo wa kulumbuula bya kubanga mwisambo kalolo

1. Mmuulo kinyi wi nawo mushindo wibuwa wa kubanga mwisambo?

¹ Anka bu kantu kebuwa akadiya muntu bwa kupusha nsala ya kundya kidibwa kampanda ngofu, mushindo wi buwa wa kubanga mwisambo aufungula biibi bya kwisamba kalolo pabitale Bifundwe. Mushindo wa kubanga mwisambo kalolo ngulombeene kushintuluka mu bula na mu myanda i mwanka, kadi anka bu kidiibwa kii buwa, abitungu binangu, kapatupatu na kwilumbuula mu mishindo yooso. (Mye. 15:28) Nkinyi akikwasha bwa kubanga mwisambo kalolo?

2. Mushindo kinyi watudi balombeene kwilumbuula bwa kubanga mwisambo kalolo na bantu mu mushindo awibasangasha?

² Sangula mitwe ya myanda ayisangasha bantu: Mushindo w’atubanga mwisambo ngulombeene kwibwesha lukalo mwi muntu, sunga kutakula sha nshibo bwa kwitutshiba mwisambo. Byabya, nsaa yolumbuula, tala myanda ayisangasha bantu ba mbalo yanudi bashaleele. Bantu be mu kipindji kya nudi, abasangeelaa miisambo itale guvernema ebuwa, nshalelo a muloo mu kifuko, sunga kupwa kwa ngoshi? Misusa ibungi bantu abakuminaa kutuusha byabo binangu, byabya lumbuula lukonko alutakula muntu mu kutuusha bi mwishimba dyaye. We mulombeene kufuba na mushindo umune wa kubanga mwisambo na bantu wi mu Mudimo Wetu wa Bufumu na kufuba nawo kalolo mu teritware eenu su? Bwakinyi ingi misusa twe mulombeene kukita ingi mishindo ya kubanga mwisambo mu Lulangwilo loobe lwa mu Kifuko?

3. Mushindo kinyi watudi balombeene kulumbuula mushindo wetu wa kubanga mwisambo na muntu muyile bipikwa na byubishi bya bantu be mu teritware etu?

³ Taluula bipikwa na biubishi bya muntu: Mu ma mbalo ebungi, twibalombeene kubanga mwisambo mususa umune na muntu aatwende mu kutala. Mu angi ma mbalo, kubanga mwisambo na muntu kushii kumwipusha byadi mubukye na pangi kumwipusha tungi tu myanda tumutale mbilombeene kwikala bu kupanga kwa bukalanga. Mu angi ma mbalo namu, bipikwa bya lulangwilo lwa bantu mbilombeene kwitutakula bwa tudya kufuba na Bible mu mayi a mbangilo kushii lukalakasho. (Bik. 2:14-17) Byabya, mbalo i bantu bashii beena Kidishitu, sunga bash’abakuminaa bipwilo byooso, bibuwa kufuba na Bible nsaa yokalukiila bwa nkatala yawa muntu dingi, pamutwe pa kufuba na Bible kumbangilo.—Bik. 17:22-31.

4. Nkinyi akitungu shi tukite pabitale mayi a kubanga nawo mwisambo?

⁴ Bishima bya mbangilo: Lumbuula bishima byoobe bya mbangilo kalolo. Bibuwa myaku iipi na ayipushika kalolo. Mushindo watufubu na mayi eetu a mbangilo wi na muulo dingi. Akula na muloo ooso. Tusepo twa binyibinyi atuleesha yawa sha nshibo muloo wi mwishimba dyoobe. Kutumikila kwa ano mayele akwitukwasha bwa kulumbuula mushindo wi buwa wa kubanga mwisambo akupa bantu ba mu teritware eetu nsala ya kudya ku “meesa a Yehowa.”—1 Kod. 10:21.