Kidibwa kya Mwanana, nyi Nkitentekyesho akitumbisha Efile Mukulu

YESU balungwile beena Kidishitu bwashi bekale abakitshi Kitentekyesho kya lufu lwa Kidishitu. Kino kitentekyesho akitaminyibwa dingi bu “kidibwa kya Mwanana.” (1 Beena-Kodinto 11:20) Bwakinyi “kidibwa kya Mwanana” ki na muulo ukata? Nkya kukita mafuku kinyi na mushindo kinyi?

Yesu bakitshine kino kitentekyesho bwa mususa wa kumpala mu bufuku bwa feete a Lukilo a beena Yuda mu kipwa kya 33 B.B. Abaadi abakitshi feete a Lukilo mususa umune ku kipwa, mwifuku dya 14 dya mweshi wa beena Yuda wabetanyinaa bu Nisane. Abimweneka shi bwa kwidiuka, beena Yuda abaadi abatengyela efuku dya mu kipungo kya printemps adikalaa bufuku na kanya bula bumune. Mu dyadya efuku bufuku abukitaa nsaa 12 na kanya namu nsaa 12. Mweshi wa kumpala ubaadi aubaluka kunyima kwa dyadya efuku ndjo ubaadi aulesha efuku dya kumpala dya mweshi wa Nisane. Abaadi abakitshi kitentekyesho kya lukilo kunyima kwa mafuku 13, aye nguba bapu kupona.

Yesu bakitshine feete a Lukilo na batumibwa baaye, kunyima kwa kukatusha Yuudase Iskaryote, aye nkukita Kidibwa kya Mwanana bwa mususa wa kumpala. Kino kidibwa kibaadi kipyane kitentekyesho kya Lukilo kibaadi akikitshi beena Yuda na dingi abitungu kukita kyanka penda mususa umune ku kipwa.

Mukandu wibuwa wa Mateo aulesha shi: “Yesu batshile mukate, batumbwile Efile Mukulu, na beutshokwele eupa balongi baye, na kwamba’shi: ‘Atayi, diayi; ino [ayilesha] mbidi yande.’ Na, paaye kwata kipulu na kupwa kutumbula, bebapeele kianka’shi: ‘Ekitomeyi boso bwenu. Mwanda ano [aalesha] mase ande, “mase a kilombeeno kipya,” aapongoolwa pa mwanda wa kulekyelwa kwa milwisho ya be bungi.’”—Mateo 26:26-28, Kilombeno kipya 2009.

Bangi abapwandikisha shi Yesu balulwile mukate awo nkufika bu mbidi yaaye ya binyibinyi na mase awo nkufika bu mase aaye a binyibinyi. Anka, mbidi ya Yesu ibaadi ishaale yooso ishima nsaa ibaadi mwibaabile mukate. Batumibwa ba Yesu abadiile mbidi yaaye binyibinyi na kutoma mase aaye binyibinyi su? Nya, byabya bibadya kwikala bu kudya muntu aku naamu miiya y’Efile Mukulu ayitosha kukita byabya. (Kibangilo 9:3, 4; Beena-Levi 17:10) Muyiile Luuka 22:20, Yesu bakwile shi: “Kino kipulu nkilombeno kipya mu mase ande asukumunwe bwenu.” Kyakya kipulu kibafikile binyibinyi bu “kilombeno kipya” su? Ta byabya nya, mwanda kilombeeno nkwipushena, ta nkintu kilombeene kukuma na maasa nya.

Byabya, mukate na nfinyo mbileshesho bisumanga. Mukate ubaadi aulesha mbidi ipwidikye ya Kidishitu. Yesu bakitshine uno feete na mukate wa ku mikate ibaadi ishale pababakitshine kitentekyesho kya Lukilo. Mukate taubaadi na kitatusho, sunga bu levire nya. (Efilu 12:8) Mu Bible abatumikaa na kitatusho sunga levire bwa kulesha bubi sunga kulwila. Byabya mukate ubaadi aulesha mbidi ya Yesu ipwidikye ibaadi mutuushe bu mulambu. Tayibaadi na mulwisho nya.​—Mateo 16:11, 12; 1 Beena-Kodinto 5:6, 7; 1 Mpyeele 2:22; 1 Yowano 2:1, 2.

Nfinyo imonga ibaadi ayilesha mase a Yesu. Aa mase ndjo abaadi aalesha kilombeeno kipya. Yesu bambile shi mase aaye abaadi apongoolwe “bwa kulekyelwa kwa milwisho.” Bantu mbakumbeene kwikala beselele ku meso kw’Efile Mukulu na kwikala mu kilombeno na Yehowa. (Beena-Ebreeyi 9:14; 10:16, 17) Kino kilombeno ndjo akipa beena Kidishitu 144000 mushindo wa kwenda mwiyilu. Kwakwa abakyebe kufuba bu ba nfumu na ba tshiite-mwakwidi bwa kukwasha bantu booso.​—Kibangilo 22:18; Yeelemiya 31:31-33; 1 Mpyeele 2:9; Bifumbulwe 5:9, 10; 14:1-3.

Nnanyi mukumbeene kudya mukate na kutoma nfinyo? Bwa kwakula kalolo, anka penda bano be mu kilombeno kipya​—bano be na lukulupilo lwa kwenda mwiyilu—​nyi balombeene kudya na kutoma nfinyo. Kikudi kiselele ky’Efile Mukulu akibashinkamisha shi mbebasangule bwa kwikala banfumu mwiyilu. (Beena-Looma 8:16) Be dingi mu kilombeno kya kudya Bufumu na Yesu.—Luuka 22:29.

Twi kwamba naminyi pabitale baaba be na lukulupilo lwa kwikala na muwa wa looso mu Mpaladiiso pa nsenga? Bakwete kukokyela mwiya wa Yesu wa kukita kitentekyesho kya Kidibwa kya Mwanana, kadi abafiki na kaneemo kooso bwa kupetekyelwa pabakitshi Kidibwa kya Mwanana, kadi kushi kudya mukate sunga kutoma nfinyo. Mususa umune ku kipwa kunyima kwa nguba kupona mwifuku dya 14 mweshi wa Nisane, Batemwe ba Yehowa abatentekyeshaa Kidibwa kya Mwanana. Sunga byekala shi mu nsenga ishima mpenda bantu binunu bipela nyi abalesha shi be na lukulupilo lwa kwenda mwiyilu, kino kitentekyesho ki na muulo kwi beena Kidishitu booso. Nyi nsaa imune ayibungu bantu booso bwa kunangushena pabitale kifulo kikile bukata kinakyo Yehowa Efile Mukulu na Yesu Kidishitu.​—Yowano 3:16.