Nkonko Ya Bantu Ababadikaa

Bwakinyi beshikwanyi na Yesu babadi bamutopekye pabitale kwiyosha meema ku maboko?

Uno ngumune wa ku myanda ibaabadi batopekye Yesu na balongi baaye kwi beshikwanyi n’ê. Miiya ya Moyiise ibaadi ileeshe kalolo bintu byooso bibaadi bilombeene kwikasha muntu butete, bu kileshesho, mukashi bende ku kishila sunga mulume batuusha mema a bu mulume, muntu e na maladi a nsudi, sunga kukuma kitanda kya muntu sunga kya nyema. Dingi uno mwiya ubadi utuushe elango pa bitale kipaso kilombene muntu kwikala mutooshibwe dingi. Bino bibadi abikitshika ku bukwashi bwa mulambu wa nkuulo, kwiyosha meema, sunga kumyamina mase.​—Beena-Levi shapitre 11-15; Mbadiko shapitre a 19.

Balongyeshi ba beena Yuuda, babadi abaukibwa bu ba Nfumu, mwanda babadi abatenteka yabo miiya. Ungi mukanda awakula’shi, ba nfumu (rabbis) babadi abatenteka ingi miiya ibungi pabitale bintu bilombeene kwikasha muntu butete na byadi mulombeene kwambukisha bangi butete bwaye. Kukwasha bantu bwabadya kwikala batoshibwe na mushindo wa byabasha kwikala be butete.

Beshikwanyi na Yesu babamwipwishe’shi: “Bwakinyi balondji boobe tabalondo byuubishi bya bakulu, abadi kya kudya kyaabo na masa ashii asuule?” (Maako 7:5) Bafadisee tababadi abakwila kwikosola kwa binyibinyi nya, nyi kwamba’shi, kwiyosha meema ku maasa nkumpala kwa kudya. Bafadisee babaadi beelele bantu ekoma’shi muntu kumpala kwa kudya abitungu kumupongolwela meema ku maasa. Mukanda watudi bateemune kunundu auleesha’shi, bakata ba bipwilo bya beena Yuuda babadi “abesambila bikishekishe pabitale kipulu kilombeene kufubishwa bwa kwela muntu meema, kipaso kya meema alombeene kwiyosha, muntu mulombeene kwiapongoola, na bula bwa kipindji kya mboko akitungu kutumpa.”

Yeesu bakitshine kinyi pabitale ino miiya ya panundu ibaabadi beele kwi bantu? Balungwile bakata ba bipwilo bya beena Yuuda’shi: “Yeeshaya baadi mutemukye kalolo p’abinutale, anwe bansesa, mwanda mbafunde’shi: ‘Bano bantu kundangwila ku milomo bisumanga anka mashimba aabo ee kula naami; kundangwila kwabo nkwa-bisumanga, myanda yaabalambukisha ii’nka penda miiya ya bantu.’ Anulekye eyi dy’Efile Mukulu, anulamata byuubishi bya bantu.”​—Maako 7:6-8.