Watchtower MIKANDA I MU INTERNETE
Watchtower
MIKANDA I MU INTERNETE
Kisongye
  • BIBLE
  • MIKANDA
  • BISANGILO
  • mwbr19 Mweshi wa 9 esak. 2-8
  • Mikanda yatudi bafubishe mu Programe a bisangilo bya Bwina Kidishitu na mudimo wetu (9/2019)

Tatui bapete video.

Etufuile namu lusa, kui kintu kibakutshishua kukafika kui video.

  • Mikanda yatudi bafubishe mu Programe a bisangilo bya Bwina Kidishitu na mudimo wetu (9/2019)
  • Mikanda yatudi bafubishe mu Bwina Kidishitu na mudimo wetu Programe a bisangilo—2019
  • Tu mitue twa mianda
  • LUBINGO LWA 2-8/9/2019
  • LUBINGO LWA 9-15/9/2019
  • LUBINGO LWA 16-22/9/2019
  • LUBINGO LWA 23-29/9/2019
  • LUBINGO LWA 30/9/2019-6/10/2019
Mikanda yatudi bafubishe mu Bwina Kidishitu na mudimo wetu Programe a bisangilo—2019
mwbr19 Mweshi wa 9 esak. 2-8

Mikanda yatudi bafubishe mu Programe a bisangilo bya Bwina Kidishitu na mudimo wetu

LUBINGO LWA 2-8/9/2019

BUPETA BWA MWIYI DY’EFILE MUKULU | BEENA-EBELU 7-8

“Tshite-mwakwidi bwa looso bu bibadi Melkisedeke”

it-2-F 249

Melkisedeke

Nfumu a mu Saleme a kala na “tshiite-mwakwidi a Efile Mukulu Mukile booso.” (Kib 14:18, 22) Badi tshite-mwakwidi a kumpala abadi baleshe mu Bifundwe; bafikile bu tshite-mwakwidi kumpala kwa kipwa kya 1933 K.B.B. Kwikala bu nfumu a Saleme, akulesha “butaale,” nyi bwakinyi Mpoolo amwitamina bu “Nfumu a butaale” na muyile eshina dyaye bu “Nfumu a kululama.” (Eb 7:1, 2) Abimweneka shi Saleme a kala nyi badi kitako kya kibundji kya Yelusaleeme, n’eshina dyaye mbedishintuule bu Yelusaleeme alesha ingi nsaa kibundji kya “Saleme.”—Mis 76:2.

Kunyima kwa kutshokola Kedorlaomere na ba nfumu babadi mukalobe, Abrame (Abrahame) bayile Mwibanda dya Shawe sunga “Ebanda dya nfumu mukata.” Kwakwa, Melikisedeke “batushiishe mikate na malofu a nfinyo,” aye nkwelela Abrahame myabi pa kwakula shi: “Abrahame asampibwe kwi Efile Mukulu a mwiyilu, Mupangi a eyilu na nsenga, Efile a mwiyilu ende ntumbo, aye batuulu balwishi boobe mu maasa oobe!” Paapa, Abrahame bapeele nfumu tshite-mwakwidi “ky’ekumi kya bintu byooso,” kwamba’shi “ky’ekumi kya bintu bikile buuwa kya bipaulwe,” bibaatshile kunyima kwa kutshokola ba nfumu bababadi balobe.—Kib 14:17-20; Eb 7:4.

it-2-F 250 ¶3

Melkisedeke

Melkisedeke badi ‘shii na mbangilo a mafuku sunga nfudiilo a muwa waye’ mu kipaso kinyi?

Mpoolo alesha mwanda wa kukaanya pabitale Melikisede p’abambile bwaye shi: “Aye shii na nshaye sunga nyinaaye sunga kifuko sunga kuuka mafuku a kutandwa kwaye sunga nfudiilo a muwa waye, aye mwifwane Mwan’Efile Mukulu, ashaala tshiite-mwakwidi bwa iikalaika.” (Eb 7:3) Nka bikale bangi bantu, Melkisedeke bantadjikilwe aye nkufwa. Anka, eshina dya nshaye na dya nyinaaye ntandiwukibwe nya, ntambaleshe mulongo waye wa bankambwa, na bifundwe t’abilesha kantu su nkamune pabitale mbangilo a mafuku aaye sunga nfudiilo a muwa waye nya. Byabya, Melkisedeke badi mulombanyine kwikala bu mwesheeshe wa Yesu Kidishitu e bu tshiite-mwakwidi bushii na nfudiilo. Anka bu bibadi Melkisedeke shii na muntu mumubadidile sunga mumulondele mu bu tshiite-mwakwidi bwaye, Kidishitu namu tabadi na tshite-mwakwidi mukata e byadi mumubadidile nya na Bible alesha shi takwi ungi tshite-mwakwidi ekala na kya kumupyana. Kukatusha byabya, sunga byekala shi Yesu badi mutandjikwe mu kifuko mu kisamba kya Yuuda na kwikala mu mulongo wa bufumu wa Daavide, te na nkambwa a ku mbidi badi tshite-mwakwidi bu’ye nya, na dingi, nta mpa mwanda wa ngobesha yaye ya ku mulongo wa bankambwa baye kubadi mwikale bu tshite-mwakwidi na bu nfumu nya. Ino myanda yooso ibadi bu kipeta kya mutshipo wa Yehowa kwadi.

it-2-F 249

Melkisedeke

Bikale bu tshite-mwakwidi bwa Kidishitu. Mu butemuki bwa kukaanya bwa Mesiya, Yehowa badi mutshipe pabitale bu “Mwanana” bwa Daavide shi: “We tshite-mwakwidi bwa looso, bu bibaadi Melkisedeke!” (Mis 110:1, 4) Uno musambo uyokyelwe ubadi aupa bena Ebelu kabingilo ka kukulupila shi Yesu badi na kya kulombasha mwasu wa bu tshite-mwakwidi na bu nfumu. Nyi bwakinyi Mpoolo mutumibwa tabadi na kwialashena pabadi mufundjile bena Ebelu pabitale bibadi batemukye bwa yawa badi mulayibwe pa kwakula shi: ‘Yesu mmwikale tshite-mwakwidi bwa looso bu bibadi Melkisedeke.’—Eb 6:20; 5:10; tala ALLIANCE.

Kukimbuula bwa kupeta mabwe a muulo a mu kikudi

w00-F 15/8 14 ¶11

Milambu ayisankisha Yehowa

11 Mpoolo mutumibwa akula shi: “Tshite-mwakwidi mukata ooso mutuulwe bwa kulambula bya buntu na milambu ya bitapilo.” (Eb 8:3) Lamiina shi Mpoolo aabuula milambu ibabadi abatusha kwi tshite-mwakwidi mu Isaleele a kala mu mishindo ibidi; “bya buntu” na “milambu” sunga “milambu ya kushimisha nayo milwisho.” (Eb 5:1) Bantu abakambaa kutusha bya buntu bwa kulesha kifulo na lutumbu, pamune na bwa kwikala mu bu kuuku, kukuminyibwa sunga kwikala mu kipwano. (Kib 32:20; Nki 18:16) Mu kipaso kimune, milambu ibungi ibabadi abatusha muyile Mwiya ibadi bu “bya buntu” byabapa Efile Mukulu bwa kukuminyibwa naye na kwikala naye mu kipwano. P’abadi apakitshi muntu kilubilo, Mwiya ubadi autekye bwa kwalusha kipwano na Yehowa, nyi bwakinyi abadi abatusha “milambu bwa kushimisha milwisho.” Mukanda wa Efilu, Beena-Leevi, na wa Mbadiko ayisambila ngofu bwa milambu ibungi na bya buntu. Sunga byekala shi bi kwikala bukopo bwa kwiyilamiina na kwiyipusha yooso kantu pa kantu, kwi ingi mishindo ya kutusha milambu yatudi na kya kutalula.

it-1-F 79-80 ¶4

Kilombeno

Kilombeno kya mwiya nkifikye bu “kikulu” mu mushindo kinyi?

Kilombeno kya mwiya kibafikile bu “kikulu” pabadi Efile Mukulu muleshe ku bukwashi bwa mutemuki Yelemiya shi kubadi na kya kwikala kilombeno kipya. (Yel 31:31-34; Eb 8:13) Mu kipwa kya 33 B.B kilombeno kya Mwiya kibadi kipwe muulo wakyo kukiila ku lufu lwa Kidishitu ku mutshi wa makyenga (Kol 2:14), kilombeno kipya nyi kibadi kikipyane.—Eb 7:12; 9:15; Bik 2:1-4.

LUBINGO LWA 9-15/9/2019

BUPETA BWA MWIYI DY’EFILE MUKULU | BEENA-EBELU 9-10

“Mwesheeshe wa bintu bibuwa abikafiki”

it-2-F 490 ¶5

Kufwila lusa

Muyile mwiya ubadi Efile Mukulu mupe kisamba kya Isaleele, bwa’shi muntu bakitshina Efile Mukulu mulwisho sunga kulwishisha mukwabo ekala na kya kufwilwa lusa, bibadi abitungu shi abande kulumbuula kilubilo kyaye, akupu, mu myanda ibungi bibadi abitungu shi muntu atushe mulambu wa mase kwi Yehowa. (Lev 5:5–6:7) Nyi bwakinyi Mpoolo bakwile uno mwiya wa’shi: “Na bintu bu bioso abitooshiibwa na mase, muyile mukanda wa mwiiya; na kushii kusukumuka kwa mase takwi kulekyelwa kwa milwisho nya.” (Eb 9:22, Kilombeno kipya 2014) Bwa binobino, mase a nyema nta ngalombene kukatusha milwisho na kupa muntu kondo k’eshimba katooka nya. (Eb 10:1-4; 9:9, 13, 14) Mu kwilekena na byabya, kilombeno kipya kibadi kilayibwe nyi akitusha kufwilwa lusa kwa binyibinyi ku bukwashi bwa mulambu wa nkuulo wa Yesu Kidishitu. (Yel 31:33, 34; Mat 26:28; 1Kod 11:25; Ef 1:7) Sunga pabadi pa nsenga, Yesu badi muleshe shi e na matalwa a kufwidishena lusa p’aye kupaasha muntu badi na maladi a nsudi.—Mat 9:2-7.

cf-F 183 ¶4

“Tungunuka na kundonda”

4 Bifundwe t’abilesha kintu pabitale kufika kwa Yesu mwiyilu, bibabadi bamukukile na pabitale kwipetena kwa muloo na Nshaye nya. Anka, Bible badi mupwe kulesha kumpala kibadi na kya kukitshika mwiyilu mafuku apeela na Yesu kwimwalukiila. Munda mwa siekele ikile pa 15, bena Yuda abadi abakitshi mwanda wiselele. Efuku dimune ku kipwa, tshite-mwakwidi mukata e panundu badi atwele mu Mbalo ikile kishila ya mu ntempelo bwa kumyamina mase a milambu mwifuku dya Kutonda kwa milwisho kumpala kwa mushete wa kilombeno. Mu dyadya efuku, tshite-mwakwidi badi alesha Mesiya. Yesu badi mulombashe kibadi akilesha butemuki bwa bibabadi abakitshi dyadya efuku musango umune bwa looso padi mwalukye mwiyilu. Batwelele mu ntumbo ikile bukata kumpala kwa Yehowa, mu mbalo ikile kishila ya mwiyilu na pa nsenga, aye nkulubula kwi Nshaye muulo wa mulambu waye. (Eb 9:11, 12, 24) Yehowa badi mukumine mulambu waye su?

it-2-F 548

Kupwidika

Kupwidika kwa mwiya wa Moyise. Mwiya ubabapele mwilo wa Isalele ku bukwashi bwa Moyise ubadi autusha mpango ya kutula tshite-mwakwidi na kutushanga kwa milambu ya nyema ilekenelekene. Yaaya mpango yoso ibadi ayikatukila kwi Efile Mukulu na ibadi ipwidikye; aku namu nka bu abibilesha mutumibwa Mpoolo ku bukwashi bwa kikudi kiselele, sunga Mmwiya, sunga tshite-mwakwidi sunga milambu ya nyema ntangilobene kufwisha bano be mushi mwa mwiya bu bapwidikye nya. (Eb 7:11, 19; 10:1) Pamutwe pa kutusha bulungantu ku mulwisho na ku lufu, mwiya ubadi autusha milwisho patooka. (Lom 3:20; 7:7-13) Ino mpango yooso ibatushishe Efile Mukulu, ibadi ayikwasha bwa kulombasha kabingilo kabadi Efile Mukulu mwiyitudile; binobino Mwiya ubadi na mufubo wa bu “ndami” sunga bu mukunkushi atwala bantu kwi Kidishitu na ubadi bu “mwesheeshe wa bibuwa abikafiki.” (Gal 3:19-25; Eb 10:1) Byabya, nsaa ayakula Mpoolo bwa ‘kyakya kibadi kikambile mukanda wa miiya, mwanda mbidi ibadi na kubofula,’ (Lom 8:3) baadi eesambila bwa bibaadi tshite-mwakwidi a ku mbidi mwina Yuuda (badi mutudibwe ku bukwashi bwa mwiya badi akitshi pa kutwela mu mbalo Ikile Kishila efuku dya kutonda kwa milwisho na mase bwa kulambula) tabadi na ngobesha ya “kupaasha ku bushima booso” babadi akwasha muyile abilesha mukanda wa Beena-Ebelu 7:11, 18-28. Sunga byekala shi kutusha milambu ku bukwashi bwa butshite-mwakwidi bwa Aaron kubadi akukwasha beena Isaleele bwa kulama kipwano kibuwa n’Efile Mukulu, takubadi akwibapa bulungantu bupwidikye bwa kukalakashwa na kondo k’eshimba ka kwikala bu bantu bukutwe kupwidika nya. Mpoolo ebilesha p’aye kwakula shi kutonda kwa milwisho takubadi kulombene “kwikasha baaba abefubwila peepi bu bapwidikye nya” pa mwanda wa kondo kabo k’eshimba. (Eb 10:1-4; pwandjikisha na Eb 9:9.) Tshite-mwakwidi tabadi na ngobesha ya kutusha muulo wa nkuulo ubadi autungu bwa kukudibwa kwa binyibinyi kwa mulwisho nya. Anka penda mudimo wa butshite-mwakwidi bwa Kidishitu na mulambu waye nyi bilombene kukuula bantu ku mulwisho.—Eb 9:14; 10:12-22.

Kukimbuula bwa kupeta mabwe a muulo a mu kikudi

w92-F 1/3 31 ¶4-6

Nkonko ya bantu ababadikaa

Mpoolo badi muleshe shi bibaadi abitungu kufwa bwa’shi kilombeno kikale na muulo pankatshi pa Efile Mukulu na bantu. Mwiya ubadi bu kileshesho. Moyiise badi afwisha kipwano pankatshi p’Efile Mukulu na Isaleele a ku mbidi. Byabya Moyiise badi na mudimo ukata; aye nyi muntu badi na bena Isaleele bwabadya kutwela mu kilombeno. Byabya Moyiise nyi badi bu muntu bakitshine kipwano kya Mwiya kibadi akikatukila kwi Yehowa. Binobino Moyiise badi munoshe mase aaye bwa’shi kilombeno kya Mwiya kikale na muulo su? Nya. Anka babadi abalambula mase a nyema pa mbalo ya Moyiise kunosha mase aaye.—Eb 9:18-22.

Kadi twi kwamba naminyi bwa kilombeno kipya kibadi Efile Mukulu mukite na kisamba kya Isaleele a mu kikudi? Yesu Kidishitu badi na mudimo ukata wa kwikala pankatshi pa Yehowa na Isaleele a mu kikudi. Sunga byekala’shi Yehowa nyi babangile kino kilombeno, anka ki ku bushito bwa Yesu Kidishitu. Kukatusha kwikala pankatshi p’Efile na bantu, Yesu badi mushale pamune na mbidi ya bumuntu na bantu ba kumpala babatwesheshe mu kino kilombeno. (Luk 22:20, 28, 29) Kukatusha byabya, badi mulombanyine kutusha mulambu ubadi autungibwa bwa’shi kino kilombeno kikale kwanka. Uno mulambu taubadi bu wa nyema bisumanga nya, ubadi wa muwa wa muntu mupwidikye. Nyi bwakinyi Mpoolo alesha Kidishitu bu muntu bakitshine kilombeno kipya. Kunyima, ‘Kidishitu . . . batwelele mwiyilu munabeene, bwa kwilubula binobino pa mwanda wetu kumpala kw’Efile Mukulu,’ nyi pabafikile kilombeno kipya na muulo.—Eb 9:12-14, 24.

P’aye kwakula bwa Moyiise na Yesu bu bantu abakitshine kilombeno, Mpoolo tabadi alesha shi abo nyi abadi ba sha kilombeno nya, kibadi kilombeno ky’Efile Mukulu. Byabya bano bantu babidi babadi bemutwele bwa kwikala pankatshi p’Efile Mukulu na bantu bwa kufwisha kiinyi kilombeno. Na mu mishindo yooso, bibadi abitungu shi kwikala lufu, nyama ibadi ayifu bwa Moyiise na Yesu batushiishe mase a muwa waye’ye nabeene bwa baba be mu kilombeno kipya.

it-1-F 263-264

Lubatshisho

Luka alesha shi Yesu badi mwele luteko nsaa ya lubatshisho lwaye. (Luk 3:21) Akupu, mufundji a mukanda wa Beena-Ebelu alesha shi Yesu Kidishitu “pa kufika pano pa nsenga” (kushii kufika kwa pabadi mutandikwe mwanda tabadi na ngobesha ya kubadika na kwakula nya, anka pabadi mwilubule aye nabene bwa kubatshishibwa na kubanga mudimo waye) badi mwakule ano mayi e mu Misambo 40:6-8, (LXX) ambashi: “Milambu ya bitapilo na ya bingi bintu, twemwiyikyebe, anka bonkitshine mbidi . . . Nyi’mi nkwamba shi: byandji bino (binfundwe mu mifungofungo wa mukanda pabintale shi) naafiki, Efile Mukulu mu kukita kyookyebe.” (Eb 10:5-9) Yesu badi mutandjikwe mwina kisamba kya Yuuda, kisamba kibadi mu kilombeno n’Efile Mukulu, kilombeno kya Mwiya. (Efi 19:5-8; Nga 4:4) Pa mwanda wa kano kabingilo, Yesu badi mupwe kwikala mu kipwano kya kilombeno n’Efile Mukulu pabafikile kwi Yowano bwa kubatshishibwa. Yesu bakitshi binobino mwanda utabukile na bibadi abimutekye Mwiya. Badi elambula aye nabeene kwi Nshaye Yehowa bwa kukita “kikyebe ky’eshimba” dya Nshaye mpa na mu kulambula mbidi yaaye ‘ibakitshine’ nayo bwa kukatusha milambu ya nyema ibabadi abatusha muyile Mwiya. Nyi bwakinyi Mpoolo mutumibwa bafundjile shi: “Mu kuno kukyeba, nyi mwatudi batooshibwa ku mulambu wa mbidi ya Yesu Kidishitu, ulambulwe musuusa umune bwa looso.” (Eb 10:10) Kikyebe ky’eshimba dy’Efile Mukulu bwa Yesu nkitale dingi mudimo wi mu kwipushena na Bufumu na mudimo wa Yesu nabeene. (Luk 4:43; 17:20, 21) Yehowa badi mukumiine uno mulambu wa Mwa’aye, aye nkumushinga mwimu wa kikudi kiselele pa kwakula shi: “Obe we mwana’ande a kifulo kikata, ne noobe muloo ukata.”—Mak 1:9-11; Luk 3:21-23; Mat 3:13-17.

LUBINGO LWA 16-22/9/2019

BUPETA BWA MWIYI DY’EFILE MUKULU | BEENA-EBELU 11

“Bwakinyi kwikala na lukumino kwi na muulo?”

w16.10 27 ¶6

Tuula lukumiino loobe mu milayilo ya Yehowa

6 Mu mukanda wa Beena-Ebelu 11:1, Bible alesha mushindo wikale lukumiino. (Badika.) (1) Lukumino nyi “kishinkamisho kia bintu abikulupilwa.” Mu Bintu ‘byatukulupila’ mwi milayilo y’Efile Mukulu bwa mafuku aafiki. Bu kileshesho, twi bashinkamishe’shi abakakatusha buntomboshi booso na bakatule nsenga ipya. (2) Lukumiino nyi “kuleshiibwa kwa patooka” sunga kushinkamisha binyibinyi, “biabia bishabimweka.” Atwiuku’shi Yehowa Efile Mukulu na Bufumu bwaye, Yesu Kidishitu, na ba mwikeeyilu, be kwanka, sunga tabamweneka. (Eb 11:3) Twi balombeene kulesha’shi twi na lukumiino mu milayilo y’Efile Mukulu na mu bintu bishabimweneka naminyi? Tukwete kuleesha bino mu nshalelo eetu, mu myanda yatwakula na yatukitshi.

w13-F 1/11 11 ¶2-5

“Apeyaa baba abamukimbi bwedi”

Twi kusangasha Yehowa naminyi? Mpoolo bafundjile shi: “Kushii lukumiino, takwi kipaso kya kulongamina Efile Mukulu”. Mpoolo t’akula shi bi bukopo bwa kulongamina Efile Mukulu kushii lukumiino. Anka akula shi takwi kipaso kya kwibikita nya. Mu ungi ngakwilo, lukumiino lwi na muulo ukata bwa kusangasha Efile Mukulu.

Ndukumiino lwi naminyi alusangashaa Efile Mukulu? Abitungu twikale na lukumiino mu mishindo ibidi. Wa kumpala, ‘twi na kya kukumiina shi e kwanka binyibinyi.’ Mu angi ma Bible mbakule shi “kukumiina shi Efile nga binyibinyi” na “kukumina shi e kwanka.” Mwanda tatwi bya kusangasha Efile Mukulu su atwelesha mpaka shi te kwanka. Nyi bwakinyi lukumiino talwimena penda pa kukumiina shi Yehowa e kwanka mwanda mpana ba demon abakuminaa shi Yehowa e kwanka. (Shak 2:19) Abitungu lukumino lwetu lwa’shi Efile Mukulu e kwanka lumwenekyele mu bikitshino, na kwitutuma mu kukita myanda ayisankisha Yehowa.—Shak 2:20, 26.

Wa kabidi, ‘twi na kya kukumiina shi’ Efile Mukulu apeeya abamukimbi “bwedi.” Muntu e na lukumino lwa binyibinyi ekalaa na kushinkamisha shi kwitatshisha kwaye bwa kwikala na nshalelo asankisha Efile Mukulu nta kwa mu bisumanga. (1 Kod 15:58) Twi kusankisha Efile Mukulu naminyi su twi na mpaka bwa ngobesha yaaye sunga lukalo lwaye lwa kwitupa bwedi? (Shak 1:17; 1 Mp 5:7) Mwanda muntu amono shi Efile Mukulu t’ekalashaa bwetu, tasangalaa netu na shii te na kalolo t’auku Efile Mukulu a mu Bible nya.

Yehowa apeyaa bantu ba mushindo kinyi bwedi? Mpoolo akula shi: ‘baaba abamukimbi n’eshimba dimune.’ Ungi mukanda wabafubaa nao kwi bantu abalulaa Bible aulesha kishima kya mu Greke kyabadi balule bu ‘kukimba n’eshimba dimune’ t’akilesha “kwenda na kukimba” Efile nya, anka akilesha kwifubwila kwadi “mu lulangwilo.” Ungi mukanda aupatuula shi uno verbe a mu kiina Greke alesha kukimba ngofu na kwitatshisha kukata. Eyendo, Yehowa afutaa baba be na lukumiino alwibatakula mu kumulangwila n’eshimba dioso dya kifulo na muloo.—Mat 22:37.

w16.10 23 ¶10-11

Nyingisha lukumiino loobe mu myanda yoodi mukulupile

10 Mu mukanda wa Beena-Ebelu 11, Mpoolo mutumiibwa bambile’shi: “Bakashi babaatambwile dimo bakwabo abafwile, mwanda babaasangukile. Anka bangi babaadi bakumiine kufwambushiibwa, bapela kupoosodibwa, bwa kupeta kusanguka kukile bukata.” (Eb 11:35) Bantu bebungi abaadi banyingile nkalakashi na kushaala na lulamato kwi Efile Mukulu mwanda abaadi na lukumiino lwi bukopo mu lusangukilo lwabadi balee kwi Efile Mukulu. Abaadi abauku’shi mu mafuku aafiki, Yehowa akebapa muwa dingi, na bakashale bwa ikalayika pa nsenga. Tentekyesha Nabote na Sekadya. Bano bantu abaadi bebayipee ku mabwe pa mwanda wa kukookyela kwabo kw’Efile Mukulu. (1 Bf 21:3, 15; 2 Mya 24:20, 21) Ndanyele abaadi bamwele mu bwina bwa ntambwe i na nsala, na dingi aye na ba kuuku baaye abaadi bebeele mwilungulunugu dya kaalo. Abakuminyine kufwa pamutwe pa kukutwa lulamato kwi Yehowa. Bano bantu abaadi na lukumiino lwi bukopo’shi Yehowa mulombeene kwibapa kikudi kyaye ki selele na kwibakwasha bwabadya kunyingiila makyenga aabo.—Nda 3:16-18, 20, 28; 6:13, 16, 21-23; Eb 11:33, 34.

11 Batemuki bebungi, bu Mika na Yeelemiya, abaadi abebasepe sunga kwibeela mu nkano. Bangi namu, bu Eliya “abaadi abalaalakana mu tubaaka na mu myengye mu mpako ya mbwebwe na ya nsenga.” Booso bwabo abaadi banyingiile nkalakashi na kushaala na lulamato kwi Efile Mukulu mwanda abaadi na “kishinkamisho kia bintu abikulupilwa.”—Eb 11:1, 36-38; 1 Bf 18:13; 22:24-27; Yel 20:1, 2; 28:10, 11; 32:2.

Kukimbuula bwa kupeta mabwe a muulo a mu kikudi

it-1-F 907 ¶6

Lukumino

Bileshesho bya kala bya lukumino. Bantu booso ba mu “kisaka kikata kya tumonyi” babakwila kwi Mpoolo (Eb 12:1) babadi na kabingilo ka kwikala na lukumino. Bu kileshesho, Abele badi auku kalolo mulayilo w’Efile Mukulu pabitale “keekulu” kabadi na kya kusoosa “nyoka” ku mutwe. Akupu bamwene bishinkamisho bya mayi abadi Yehowa mulungule baledi baye mu Edene. Pabatukile Adame mu Edene, aye na kifuko kyaye ababangile kudiila kwituputa dyabo mwanda nsenga ibadi yediibwe mulwa, ayo nkutusha milobo na nsanya. Abele bamwene bibadi dingi lukalo lwa Eva kwi Adame na bibadi Adame mumune mukashi aaye. Kushii mpaka, bapushishe dingi bibadi abyakula nyinaaye pabitale mitanyo ya pa kutanda. Akupu, kubadi miikeyilu ibaadi ayilama ku kitwelelo kya lupango lwa Edene na tupete twi na ndjimi ya kaalo. (Kib 3:14-19, 24) Ino myanda yooso ibadi “kipaso kya kushinkamisha” kibapeele Abele lukumiino lwa shi kipandjilo akikafikila ku ‘keekulu kabadi kalayibwe.’ Nyi bwakinyi pa mwanda wa lukumiino, “balambwile Efile Mukulu mulambu” ubadi utabukile kula mulambu wa Kayine.—Eb 11:1, 4.

wp17.1 12-13

“Baadi asangasha Efile Mukulu”

Byabya, mu mushindo kinyi mubaadi Henoke ‘mutwadibwe bwa kumukumba ku lufu’? Yehowa bakatwishe Henoke ku muwaa amutwala na kalolo kooso ku lufu, bwa kumukumba ku lufu lwa makyenga mu maasa a beshikwanyi naaye. Anka, kumpala kwa kufwa, bantu ‘babaashinkamiishe pa mwanda wa [Henoke]’shi baadi mulongamine Efile Mukulu.’ Mu kipaso kinyi? Kapindji kapeela kumpala kwa lufu lwaye, pangi Henoke baadi mumone kimonwa kya kwi Efile Mukulu, mu kyanka pangi baadi mumone nsenga yaluulwe mpaladiiso. Bu bibaadi mumone kino kitundwilo akileesha’shi mmukuminyibwe na Yehowa, Henoke balaadile mu tulo twa lufu. Nsaa ibafundile pabitale Henoke na bangi balume na bakashi basha lukumiino, Mpoolo mutumiibwa bambile’shi: “Ku lukumiino babafwile booso.” (Eb 11:13) Kunyima kwa paapa, beshikwanyi naaye babakimbile kitanda kyaye, anka “tambamumone dimo,” pa mwanda wa’shi Yehowa bekikatwishe, bwa kupela tala bekikita bibubi sunga kufuba nakyo bwa kukita lulangwilo lwa madimi.

LUBINGO LWA 23-29/9/2019

BUPETA BWA MWIYI DY’EFILE MUKULU | BEENA-EBELU 12-13

“Dinyoka—adilesha kifulo kya Yehowa”

w12-F 15/3 29 ¶18

T’okumanga kutala “bintu bi ku mongo”

18 Dinyoka aditapa kwishimba. Twi kwikala balame nsungu bwa dinyoka dyabadi betupe su? Bino nta mbilobene penda kwitukyengeysha nya, bi kwitukalakasha na ‘kwitubofusha.’ (Eb. 12:5) ‘Kupeesha’ elango, kwamba shi kwidisumbushena sunga ‘kubofula’ kwamba shi kukumiina elango kadi kushii kwidilonda akufishaa muntu ku masaku. Nyi bwakinyi mbikile buwa kulonda mayi a Salomone shi: “Lama kalolo byabakulambukisha, twebisumbushenanga, ebilame, abyo ndjo abikupa muuwa.” (Nki. 4:13) Nka bu shofeele alondo miiya ya kutambusha, tutungunukyeyi na kulonda malango, twiakumiine na kwiafubila bwa kwenda kumpala.—Nki. 4:26, 27; badika Beena-Ebelu 12:12, 13.

w12-F 1/7 21 ¶3

“P’anutekye, ambayi’shi, ‘Yaaya’”

Nshee bana e na kifulo, anyokaa bana baye mwanda ekalakashaa pabitale bumuntu bwabakekala nabo. (Ef 6:4) Ebanyokaa na kishima kushii n’etombo nya. Mu kipaso kimune, Nshetu e mwiyilu e kumona shi bi na muulo kwitunyooka ingi nsaa. Anka dinyoka dy’Efile Mukulu adikalaa nsaa yooso penda bwa kifulo kushi bwa kwitukyengesha. Nka bu Nshaye, Yesu tabadi na kikiso nya, sunga nsaa ibadi balongi baye na lotoolo lwa kutumikila bibadi ebalungula.—Mat 20:20-28; Luk 22:24-30.

w18.03 32 ¶18

“Teemeshaayi [dinyooka] bwa kwikala baa-sha-binangu”

18 Dinyooka ndilombene kwitwinyongosha, anka bipeta abituuku nsaa yatusumbushena dinyooka dy’Efile Mukulu mbilombene kwitwinyongosha kukila papa. (Eb 12:11) Twi kupeta dilongyesha ku kileshesho kibubi kya Kayina na kya Nfumu Sedekiya. Nsaa ibamwene Efile Mukulu’shi Kayina mmushikwe mukwabo mulume na’shi akumina kumwipaa, badi mudimushe Kayina’shi: “Bofiitshi munda bwakinyi? Dingi bwenyongola bwakinyi? Su bookitshi bibuwa obanduula lukyebo loobe; su bookitshi kiibubi, milwisho yoobe ayikubelamina pa kiibi kyobe bwa nkushimisha. Anka obe eyikambile.” (Kib 4:6, 7) Kayine badi musumbushene dinyooka dya Yehowa, aye nkwipaa mukwabo, kunyima badi mukyengye ngofu bwa uno mwanda mu muwa waye oso. (Kib 4:11, 12) Su Kayine badi mupushishe Efile Mukulu, tabadya kupeta tuno twinyongoshi toso nya.

Kukimbuula bwa kupeta mabwe a muulo a mu kikudi

w11-F 15/9 17-18 ¶11

Suuka lubilo na mufwaka

11 Bafubi ba Yehowa abashadile na lulamato kwadi mpa na ku nfudiilo kwa myuwa yabo nyi abadi mu “kisaka kikata kya tumonyi.” Abadi nka bu bantu abasuuku lubilo. Abasukile lubilo mpa na ku nfudiilo abo nkupeta efuto. Sunga byekala shi tababapwile kufwa, bakwete kunyingisha booso ababanga kusuuka bwabadya kunyingiila pa kulonda kileshesho kyabo. Banda kunangushena bilombene muntu mupya babanga kusuuka lubilo su amono shi mbamwifunyishe kwi bantu abauku kusuuka lubilo kalolo. T’omono shi ekala na kya kwitatshisha sunga kukita bitabukile ngobesha yaaye? Kyakya kisaka kikata kya tumonyi akitushinkamisha shi twi balombe koobesha mu lubilo lwa mu kifwanyi mpa na ku nfudiilo. Byabya, p’abo kutungunuka na kutuula mu binangu kileshesho kya “kisaka kikata kya tumonyi,” beena Kidishitu ba mu Ebelu ba mu siekele a kumpala abapetele kunyingishibwa bwa ‘kusuuka lubilo na mufwaka’ nka bu byatudi balombene namu kwibikita lelo.

w89-F 15/12 22 ¶10

Tuusha milambu ayisankisha Yehowa

10 Bibadi abitungu shi beena Ebelu betatshishe bwa kupela ‘kupambushibwa na ndambukiisho yeenyi ya bipaso byoso’ bya bantu abadi abanemeka bipikwa bya kala bya beena Yuuda. (Gal 5:1-6) Mwanda shi bibadi ku bukwashi bwa ‘buntu bw’Efile Mukulu kubabadya kunyingishibwa ku mashimba’ bwa kushala banyingiile mu bya binyibinyi. Abimweneka shi bangi abadi abefiitshishena munda mwanda wa bidiibwa na milambu, nyi bwakinyi Mpoolo bambile shi eshimba tadibadi dingyinshibwe “kwi bidiibwa, abyo bishiii bikwashe sunga nguba umune baaba babebilaminanga bishila.” Aku namu abadya kupeta bukwashi penda mu kwipana ku myanda ya mu kikudi na kuleshga lutumbu bwa nkuulo, kushii mu kudya bidiibwa kampanda sunga kunemeka bishila bya mafuku. (Lom 14:5-9) Kukatusha byabya, mulambu wa Kidishitu ubadi ushimishe muulo wa milambu ya beena Leevi.—Eb 9:9-14; 10:5-10.

LUBINGO LWA 30/9/2019-6/10/2019

BUPETA BWA MWIYI DY’EFILE MUKULU | SHAKE 1-2

“Eshinda aditwala ku mulwisho na lufu”

g17.4-F 14

Kutompibwa

Atutompibwaa kebungi nsaa yatudi na lukalo lwa kintu, bikishekishe kintu ki bubi. Bu kileshesho, we kumona kintu kyodi nakyo lukalo nsaa yoodi mu kisalwe. Kinangu ki nkufwila shi we kwiba kyakya kintu kushii lukalakashi bankutwa nkumona. Anka, kondo koobe k’eshimba kabakutunyisha! Akupu bokatusha byabya binangu bwekilekye. Paapa, bokambila kyakya kitompwanga kibakufwila.

AKYAMBA BIBLE

Kutompibwa takukwikasha bu muntu e bubi nya. Mwanda Bible etulungula shi atukafumankana na bitompwanga. (1 Kod 10:13) Anka mwanda wi na muulo, nyi nkipaso kyatukitshi nsaa yatutompiibwa. Bangi abalekaa binangu bibubi mwishimba na kwibilombasha musango umune sunga mwenda mafuku. Bangi namu akatushaa musango umune byabya binangu bibubi.

“Oooso muntu atompibwa kwi lwabi lwaye aye nabeene alumukaka.”—Shak 1:14.

g17.4-F 14

Kutompibwa

Bible aleesha matabula aafishaa muntu mu kukita bibubi. Mukanda wa Shake 1:15 awamba shi: “Lwabi [lwibubi] paalwimita, alutanda milwisho.” Mu ungi ngakwilo, nka byabidi shi su mwana mukashi e n’eyimi afudilaa nka mu kutanda mwana, su atulama lwabi lwibubi mwishimba, atukafudilaa nka mu kukita mwanda wibubi. Nyi bwakinyi abitungu twitatshishe bwa kupela kwikala na lwabi lwibubi na kwilukambila.

Kukimbuula bwa kupeta mabwe a muulo a mu kikudi

it-2-F 168

Etaata

Yehowa mwikale “Yaya sh’etaata.” (Shak 1:17) Nta “mutuule [penda] nguba bwa kumunyika kaanya, na mweshi na nyenyeene, mu mulongo wabyo bwa kutoosha bufuku” (Yel 31:35) anka mwikale dingi Nsulo y’etaata dyoso dya mu kikudi. (2Kod 4:6) Miiya Yaaye, bitshibilo byaye n’eyi dyaye mbikale etaata kwi baba abatadiila bwabadya kuludikibwa nabyo. (Mis 43:3; 119:105; Nki 6:23; Yesh 51:4) Nyi bwakinyi mufundji a Misambo bambile shi: “Kw’etaata dyobe, atumwen’etaata.” (Mis 36:9; pwandjikisha na Mis 27:1; 43:3.) Nka bu bi etaata dya nguba “adyend’aditamanga mpaa na munkatsh’efuku,” eshinda dya balulame, dikwete kutungunuka nka na kumunyikibwa na kinangu ky’Efile Mukulu. (Nki 4:18) Bwatudya kutambukila mwishinda adimunyika Yehowa, abitungu tulonde miya yaaye. (Yesh 2:3-5) Mu kwilekeena na byabya, su muntu atala kintu na binangu bibu, e mu mufito ukata wa mu kikudi. Nka bu bibambile Yesu: “Su eyiso dyobe di na mukumbo, mbidi yoobe yooso ishima ayikala mu mufito. Byaabya su etaata dii munda moobe dii bu mufito, mmufito kinyi awikala mwanka!”—Mat 6:23; pwandjikisha na Miy 15:9; 28:54-57; Nki 28:22; 2Mp 2:14.

it-2-F 162 ¶7

Mwiya

‘Mwiya wa bufumu.’ ‘Mwiya wa bufumu’ ubadi mu ingi miiya itale kipwano na bantu na bumuntu bubadya kwikala nabo nfumu kwi bantu. (Shak 2:8) Kifulo nyi kibadi bu kitako kya kilombeno kya Mwiya; na dingi, mwiya wa bufumu wa’shi: “Ofule muntu noobe buu’be nabeene” ubadi Mwiya wa kabidi ku Miya yooso na ku bulambukishi bwa batemuki. (Mat 22:37-40) Sunga byekala’shi bena Kidishitu ta be mu Mwiya wa kilombeno, be mu mwiya wa Nfumu Yehowa na Mwana’aye Nfumu Yesu Kidishitu mu kwipushena na kilombeno kipya.

    Mikanda ya mu Kisongye (2011-2025)
    Tuuka
    Tuela
    • Kisongye
    • Tumina muntu
    • Byokumina
    • Copyright © 2025 Watch Tower Bible and Tract Society of Pennsylvania
    • Pabitale bya kufubisha
    • Bya kufubisha
    • Bya kufuamisha yobe
    • JW.ORG
    • Tuela
    Tumina muntu