Batumibwa abakimbi dingi kwikala pa mbalo ya kineemo

Bu bibadi Yesu na balongi baye bapudishe lwendo lwabo lwa kuushi kwa Peree bwa kwenda ku Yelusaleme, abasabukile Mwela wa Yoordano pabwipi na Yeeriko. Bangi bantu abadi abende ku Kidiibwa kya lukilo kya mu kipwa kya 33 B.B.

Yesu badi kumpala kwa balongi na kitshibilo kya kufika mu kibundji pa nsaa bwa Kidiibwa kya lukilo. Anka balongi abapushanga moo. Kumpala, pabadi Lazaare mufwe na Yesu akyebe kukatuka ku Peree bwa kwenda ku Yudeya, Tomase badi mulungule bangi shi: “Twendeeyi atwe naamu, tukafwe pamune naaye.” (Yowano 11:16, 47-53) Kwenda ku Yelusaleme kubadya kwibafwishila masaku, nyi bwakinyi balongi ba Yesu abadi na moo.

Bwa kulumbuula binangu byabo bwa myanda ibadi kumpala, Yesu batshile batumibwa pa bupenka ebalungula shi: “Baba’twe abakaamina kuu Yelusaleme, Mwan’amuntu abamutuulu mu maasa a ba-tshite mwakwdi, a balambukishi ba bishila. Abamufundjila lufu, dingi abamutuulu mu maasa a ba maumbo, bwabadya kumusenga, kumukupila nfiimbo, na [kumupudika ku mutshi, NWT], ank’efuku dya kasatu, asanguka.”—Mateo 20:18, 19.

Uno ubadi musango wa kasatu ubadi Yesu mulungule balongi baye pabitale lufu na lusangukilo lwaye. (Mateo 16:21; 17:22, 23) Anka, uno musango bambile shi abakamupudika ku mutshi. Abadi bateemeshe, anka tababadi bapushe kyabipatuula nya. Pangi abadi abakulupila kwalushula kwa bufumu bwa Isaleele pa nsenga na lukulupilo lwa kusangeela muloo na kineemo mu bufumu bwa pa nsenga bwa Kidishitu.

Nyinaaye na mutumiibwa Shake na Yowano badi pangi Salome badi mu bantu babadi ende nabo. Yesu bapeele bano batumibwa babidi mashina aapatuula bu “Bana ba Nkamanyi” sunga kapandapanda, mwanda wa bukyelo bwabo. (Maako 3:17; Luka 9:54) Munda mwa mafuku, bano batumibwa babidi abakimbanga kwikala pa mbalo ya kineemo mu Bufumu bwa Kidishitu. Nyinaabo badi auku wawa mwanda. Badi mubandame kumpala kwa Yesu ebatekyela bwa shi bekale pa mbalo ya kumpala. Yesu bamwalulwile shi: “Okyebe kinyi?” Yawa mukashi bambile shi: “Tuma eyi bwa shi, mu Bufumu boobe, bana bande balume babidi bano bashikame, umune ku mboko ilume yoobe ungi ku ikashi yoobe.”—Mateo 20:20, 21.

Shake na Yowano nyi abadi abatekye byabya. Penda bwa kuleesha buufu na kuyishibwa kwa milongo kubabadi na kya kupeta, Yesu bebalungwile shi: “Taanuuku kyaanutekye. Nwi balombeene kutoma kipulu kyankatomo su?” Abadi bamwaluule shi: “Twi balombeene kwikitoma.” (Mateo 20:22) Anka tababadi abapusha kyabishinguula bwabo nya.

Nyi bwakinyi Yesu bebalungwile shi: “Kipulu kyaande, anwikitomo; anka kushikama ku mboko ilume yande na ku yande ikashi, ntshii na matalwa a kwikupaana: akupeebwa babadi beekulumbulwile kwi Nshaami.”—Mateo 20:23.

Pa kuuka pabitale kibatekanga Shake na Yowano, bangi batumibwa ekumi abafiitshile munda. Bi kwikala shi Shake na Yowano abadi baleeshe patooka kinangu kyabo munkatshi mwa batumibwa pabitale mukata kwabadi su? (Luka 9:46-48) Sunga mbyabya, uno mwanda ubabatekyele ubalesheshe shi batumibwa Ekumi na babidi abakutshilwe kufubila elango dibebapeele dya kwikala bu bashadile ku booso. Lukalo lwabo lwa kwikala na mbalo ya kineemo talubadi lupwe nya.

Yesu batshile kitshibilo kya kupudisha kyakya kyutu na mushikwa ubatukile mwabadi. Badi mwitamine batumibwa Ekumi na babidi, aye nkwibalanga na kifulo kyoso pa kwibalungula shi: “Anuuku, banfumu ba bisamba beebituule ku matalwa aabo, dingi bakata, beebimune na ngobesha yaabo. Tabiibyaabya munkatshi mwenu. Anka, su muntu akyebe kwikala mukata munkatshi mwenu, eekale mufubi eenu. Na su muntu akyebe kwikala a kumpala munkatshi mwenu, eekale mpika a booso.”—Maako 10:42-44.

Yesu batushishe kileshesho kyaye bwabadya kumulonda. Bambile shi: “Byaabya, ngi bifikye Mwan’amuntu, kushii bwa kufubilwa, anka bwa kufubila bantu, na kupaana muuwa waye bwa kukuula mwilo wa bantu.” (Mateo 20:28) Munda mwa bipwa bifikye ku bisatu, Yesu badi alambukisha bwa kukwasha bangi. Badi eebikitshi bwa kufudiisha muwa waye na kufwila bantu! Batumibwa namu abadya kwikala bu Kidishitu badi akimbi kukwasha bangi pa mutwe pa kukwashibwa na kwikala bashadile kwi bangi kushii kukimba kwikala pa mbalo ya kineemo.