Oukanga su?

Bintu bya kala abishinkamisha abyakula Bible naminyi?

NSHIBO ya bintu bya kala (musée) ya mu Yelusaleme, mwi ebwe dibadi difundwe pangi mu 700-600 kumpala kwa bino bipungo byetu (K.B.B.). Dino ebwe abadi bedipete mu bwina bwa mashama peepi na Hebrone mu Isaleele. Myanda ifunde kwanka ayamba’shi: “Hagaf mwana a Hagav mmwedibwe mulao kwi Yahweh Sabaot.” Bino abishinkamisha abyakula Bible naminyi? Abilesha’shi eshina dy’Efile Mukulu Yehowa dibadi adifundibwa na YHWH mu kina Ebelu kya kala, dibadi diukibwe kalolo na abadi abedifubisha efuku dyoso mu kipungo kya Bible. Mu aa mashama mwi angi mabwe afundwe aalesha’shi bantu abadi abeakitshi, abadi abeabungu bwa kwiafya mwamwa. Abadi abakamba kufunda eshina dy’Efile Mukulu pamune na mashina aabo mpa na maleta eeshina dy’Efile Mukulu ku midimba ya mashama.

P’akwila ano mabwe afundwe, Dr. Rachel Nabulsi a ku kilongyelelo kikata kya mu Georgie amba’shi: “Kufubisha eshina YHWH misuusa na misuusa kwi na muulo. . . . Myanda ifundwe na ano mabwe, abilesha’shi muntu sha dino eshina YHWH badi na muulo mu muwa wa bena Isaleele na be Yuuda.” Bino abikwatshishena Bible, amusanganyibwa eshina dy’Efile Mukulu difundwe mu malata a mu kina Ebelu YHWH, na e mwanka misuusa binunu. Kebungi mashina a bantu abadi asangye n’eshina dy’Efile Mukulu.

“Yahweh Sabaot,” abadi bafunde kwibwe apushisha’shi “Yehowa sha bilwilo.” Byabya, abimweka’shi bantu mu kipungo kya Bible, abadi abafubisha eshina dy’Efile Mukulu na kishima “Yehowa sha bilwilo.” Bino abikwatshishena dingi Bible mufubishe mwaku “Yehowa sha bilwilo,” wi mwanka misuusa 283 mu bifundwe bya kina Ebelu, bikishekishe mu mukanda wa Yeshaya, Yelemiya na Sekadya.