Bible mmulombene nkukuasha bua kunyingiila masaku aatukila mu kuluila kua klima su?
We munkatshi mua bantu midiyo bakuete kufumanka na masaku aatukila mu kuluila kua klima su? Masaku aatukilaa mu kuluila kua klima na nkalakashi yaatusha, ayimuenekaa mu mishindo ilekene. Bingumbongumbo sunga bipapi bibukopo biabetamina bu typons, cyclones na ma tornades abifuishaa masaku ebungi akaa bu kuula ku miela, mpeshi ebukopo, sunga bipapi abiluishaa bintu. Mpeshi ebukopo mmulombene kutanya nsenga, na bipapi bibukopo mbilombene kutembesha kaalo kakumbene kuluisha bintu. Munanga, kibobo kibukopo, na bipapi bibukopo na kipungo kia mashika ebukopo mbilombene kutuusha masaku akata.
Mu ma mbalo ebungi masaku aatukila mu kuluila kua klima akuete kutuusha nkalakashi ikile pa bungi misusa yooso. Ingi rapore ya Fédération internationale des Sosiétés de la Croix-Rouge et du Croissant-Rouge ayilesha’shi: “Bantu bakuete kupeta masaku aatukila ku bipangua bakuete nka kuenda na kufuima. Nsaa ayinoko mpeshi ebukopo, bipapi bibukopo, na kibobo kikile, nshalelo a bantu na nyema e mu masaku akile. Nyi buakinyi, bantu midiyo na nyema bakuete kusuuka mu ma mbalo abadi bashaale bua nkashaala kungi.”
Nsaa ayikitshikaa ano masaku, bantu abakiengaa ku mbidi na mu binangu. Mbalombene kushimisha bintu, mashibo, mpa na kufuisha bakuabo na ba kuuku baabo.
Su bofumankana na masaku aatukila mu kuluila ngofu kua klima, Bible mmulombene nkukuasha bodia kuianyingiila. Akusamba, nkupa lukulupilo, na malango ebuwa, akuashe bantu bebungi bafumankane na masaku aatukila mu kuluila ngofu kua klima. (Bena-Loma 15:4) Aluula ding ku nkonko yabeyelaa kui bantu bebungi bu’shi: Buakinyi Efile Mukulu mmutadiile ino mianda ayikitshika—ndinyooka di’Efile Mukulu su?
Kuluila ngofu kua klima lelo uno ta ndinyooka di’Efile Mukulu nya
Bible alongiesha’shi makienga a bantu ta ngatuukile kui Efile Mukulu nya na ta nkilubilo ki’efile nya. Bible etubatamisha mashimba pa kuitulungula’shi: “Efile Mukulu ta mulombene kutompa muntu na mianda ibubi mpa na aye nabene ta mulombene kutompibua na mianda ibubi nya.” (Shake 1:13) Bino abilesha’shi ta nnaye nsulo ya masaku aatukila mu kuluila kua klima akuete kukiengiesha bantu lelo uno nya.
Mu Bible mui miisambo ayilesha’shi mu bingi bipungo, Efile Mukulu baadi mufube na bintu bi na bukome biadi mupangie bua kunyooka bantu bebubi. Anka ino mianda ngilekene ngofu na masaku akuete kukitshika lelo uno, akuete kufika mu kimpulunkamba, bantu kushii kuuka na ayifuilaa bantu bebuwa na bebubi. Anka, miisambo i mu Bible ayilesha’shi Efile Mukulu baadi nsaa yooso akaluila bantu be ku lupese luaye, baadi adimusha bantu, mpa na kupatuula buakinyi akitshi kintu ki biabia. Bu kileshesho, Efile Mukulu baadi mupatuule buakinyi afuisha mpeshi a kabutu mu nsenga ishima ibaadi ishaale Nowa, baadi mudimushe bantu kumpala kua kunokiesha mpeshi, na aye nkukaluila Nowa na kifuko kiaye.—Kibangilo 6:13; 2 Mpyeele 2:5.
Bua kuuka kitukuashe bua kuuka’shi masaku aatuuku lelo uno ta ndinyooka di’Efile Mukulu, tala muisambo awamba’shi: “Les catastrophes naturelles: qu’en dit la Bible?”
Efile Mukulu apasukilaa booso abapete masakua aatukila mu kuluila kua klima
Bible alesha’shi Yehowaa Efile Mukulu apasukilaa bantu na kuituula pa mbalo yaabo. Banda kutala ano ma verse aanyingisha.
Yeeshaya 63:9: “Nsaa yoso ibaabadi abakienge, aye [Efile Mukulu] badi namu akienge.”
Kiabipatuula: Yehowa enyongolaa nsaa yamono bantu abakiengie.
1 Mpyeele 5:7: “Kuete kuinupasukila.”
Kiabipatuula: Yehowa ekalakashaa ngofu bua buwa buetu.
Yehowa etukuashaa muanda etupasukilaa na kuituula pa mbalo yetu. Etunyingishaa ku bukuashi bua malango e mu Bible na mmulee’shi mu mafuku ekumpala, masaku oso aatukila mu kuluila kua klima aapu.—2 Bena-Kodinda 1:3, 4.
Nsaa ayikapu masaku aatukila ku kuluila kua klima
Bible alesha’shi Yehowa mmulee “kuuitupa nshalelo ebuwa mu mafuku e kumpala mpa na lukulupilo.” (Yeelemiya 29:11) Lukalo luaye ndua’shi bantu bekale na muwa mu mpaladiso, mush’amuikala moo wa masaku aatukila ku kuluila kua klima.—Kibangilo 1:28; 2:15; Yeeshaya 32:18.
Efile Mukulu akebikitshi ku bukuashi bua Bfumu buaye, buikale mbulamatadi a muiyilu akakunkushibua na Yesu. (Mateo 6:10) Yesu e na binangu mpa na bukome bua kuimika masaku aatukila mu kuluila kua klima. Yesu pabaadi pano pa nsenga, baadi muleshe’shi e na bukome bua kusaashila kipapi kikata sunga masaku aatukila ku klima. (Maako 4:37-41) Akakunkusha na kapatupatu na binangu, akalongiesha bantu mushindo wa kukaluila mema, mitamba na bipangua bina muwa bua’shi tabebiluishanga. (Yeeshaya 11:2) Ku bukunkushi bua Yesu, klima t’akafuishila bantu masaku dingi nya.
We kuiyipusha’shi, ‘Nsaa kinyi ayikafubisha Yesu bukome buaye bua kukaluuila klima?’ Bua kualula ku luno lukonko, tala muisambo awamba’shi: “Bufumu bw’Efile Mukulu abukamunu pa nsenga nsaa kinyi?”
Bia kukila na kuluila kua klima lel uno
Elango di mu Bible ndilombene nkukuasha bua kumona bia kunyingiila nsaa ayiluila klima kumpala na kunyima kua kuluila kuaye.
Kumpala: Elumbuule bua kuata kitshibilo.
Akiamba Bible: “Muntu mudimukie amonaa masaku na kuiafuama, anka muntu shina binangu abatungunka na kuenda na biabapete masaku.”—Nkindji 22:3.
Kiabipatuula: Emuene masaku paakii kula na wate kitshibilo kia kuiasuuka na kukaluila kifuko kiobe.
Muanda ukishikie: “Dingi efuku tubaadi bapande ku kaalo ka mitamba, manda tubaadi belumbuule bua kuikasuuka. Tubaadi na tubuta tuetu tuatubaadi bele bintu bia kuitukuasha nsaa ayituuku masaku. Tubaadi na buanga, mpa na bilamba. Bantu betuifunyishe tababaadi abauku kia kukita, tababaadi na mushindo wa kunangushena kalolo. Anka tubaadi na bintu bioso biatubaadi nabio lukalo, natumbulaa Yehowa bua uno muanda!”—Tamara, a mu Californie, mu États-Unis.
Mu nsaa ya masaku: Tuula binangu ku mianda i na muulo.
Akiamba Bible: “Sunga muntu ekala na bintu bibungi, bintu biaye t’abimupa muwa nya.”—Luka 12:15.
Kiabipatuula: Muwa wi na muulo kukila bintu.
Muanda ukitshike: “Pabaadi kipapi kikata kiabetamina bu Typhon Lawinb kiluishe nshibo yetu, ntshinaadi na mushindo wa kunangushena kalolo pabitale kiandia kukita. Anka kintu kimune kinaadi mukite nkuela luteko kui Yehowa Efile Mukulu n’eshimba diande dioso. Ami nkumona’shi, tubaadi bashimishe bintu bia ku mbidi anka tatubaadi bashimishe muwa wetu nya.”—Leslie, a mu Philippines.
Kunyima kua masaku: Tuula binangu ku mianda i kuanka binobino kushi ku mianda ya malooba.
Akiamba Bible: “Tanuikalakashanga bua malooba muanda, malooba e na yao nkalakashi.”—Mateo 6:34.
Kiabipatuula: Tuekalakashanga ngofu pabitale mianda ayikitshika malooba.
Muanda ukitshikie: “Kunyima kua kipapi kikata kiabetamina bu Irma tubakatukile mu nshibo yetu ibaadi iule mema, bibaadi abitungu’shi ngate bitshibilo bibungi, kukila kumpala. Naadi muikalakashe ngofu. Natompele kulonda elango dia mu bible dia kupela kuikalakasha ngofu bua malooba. Ku bukuashi bua Yehowa, naadi munyingiile nakalakashi yanshinaadi napuandikisha’shi ne kuiyingiila.”—Sally, a mu Floride, mu États-Unis.
Bua kuuka kia kukita, tala muisambo awamba’shi: “Catastrophes: des mesures qui sauve des vies.”