Mwanda wa 68

Baana balume babidi babapasukile

SU OFWA, nyin’obe mukumbeene kupusha naminyi su opasuka? Binyibinyi ekala na muloo ukile! Kadi muntu mupwe kufwa mukumbeene kwikala dingi na muwa? Tabibakitshikile su?

Tala uno muntu e mu kifwatulo, na uno mukashi na kano kansongwalume. Uno mulume nyi mutemuki Eliya. Mukashi nyi mukashi mufwishe mulume a mu Sarepta, na kano kansongwalume nyi mwana aye. Dingi efuku, uno mwana baadi mukumbe. Mukumbo ubakidile bukopo mpa na bibafwile. Paapa Eliya balungwile mukashi shi: ‘Mpe mwan’obe.’

Eliya batshile mwana enda naaye ku nshibo ya kwiyilu amuladisha ku lusala. Paapa aye nkwela luteko shi: ‘Yehowa Efile Mukulu ande, muwa wa uno mwana walukye munda mwaaye.’ Ndjo nsongwalume nkubanda dingi kupuuka! Paapa Eliya bayikile na mwana aye nkulungula mukashi shi: ‘Tala, mwana obe e na muwa!’ Nyi bwakinyi omono nyina mwana e na muloo ukata.

Ungi mutemuki mukata a Yehowa nyi Elisha. Baadi bu mukwashi a Eliya. Kadi kunyima, Yehowa baadi mupe Elisha bukome bwa kukita bipaso. Dingi efuku Elisha bayile ku lupata lwa Shuname, kubaadi mukashi umune baadi mumuleshe bumuntu. Kunyima uno mukashi batandile mwana mulume.

Dingi efuku, ku namashika, aye mwana bapu kutentuluka, balondele nshaye ku mafuba. Musango umune nsongwalume badidile ‘mutwe busungu!’ Pababamutwadile ku nshibo, mwana bafwile. Nyin’aye baadi mwinyongole ngofu! Bayile lubilo mu kwitanyina Elisha.

Pabafikile, Elisha bayile na kitanda kya mwana mu nshibo ya kwiyilu. Batekyele Yehowa, aye nkumuladiila. Musango umune, mbidi ya mwana ibapetele kibobo, na nsongwalume belele nkisha misango musambobidi. Nyina mwana baadi na muloo ukile pabafikile aye nkumona mwan’aye na muwa!

Bantu bakile bungi bakwete kufwa. Bino bikwete kwinyongosha bakwabo na bifuko byabo ngofu. Tatwi na bukome bwa kubuusha bafwe nya. Kadi Yehowa e na bwabwa bukome. Kunyima atukyebe kumona mushindo wakyebe kubuusha midiyo ya bantu ku lufu.

1 Banfumu 17:8-24; 2 Banfumu 4:8-37.