Apandise

Kwi baledi beena Kidishitu:

Bu byodi muledi, we na lukalo lwa kukwasha bana boobe boodi mufule bwa’shi bafule Yehowa na belambule kwadi. Nkinyi kyodya kukita bwa kwibakwasha bwa’shi belumbuule bwa lubatshisho? Nsaa nkinyi yabadya kwikala balombane bwa kwela dino etabula dikata?

Yesu balungwile balondji baaye’shi: “Ndayi, mu miilo yooso, nwibekashe bu balondji bande, nwibabatshishe.” (Mat. 28:19) Pabitale uno mwanda, kintu kya kumpala akitungu kukita bwa kubatshishibwa nkwikala mulongi​—muntu shikwete penda kupusha na kukumiina myanda ya Kidishitu, kadi kwete dingi kwiyilonda kalolo. Kino nkintu kilombeene kukita mpaa na baaba bakii bakinga.

Ikala kileshesho kibuwa kwi bana boobe, na ebakune malongyesha a Yehowa mu mashimba aabo. (Miy. 6:6-9) Bino mbitale kutumika na myanda i mu mikanda bu A nkinyi akitulongyesha Bible? na Bya kushaala mu kifulo ky’Efile Mukulu bwa kwibalongyesha mushindo wa kunangushena ku mayi a kulonda e mu Bible na kwikala na nshalelo mwipushene nao. Kwasha bana boobe bwabadya kwikala na mushindo wa kupatuula bi lukumiino lwabo mu bishima byabo banabene. (1 Mp. 3:15) Kyukilo na mayi akwibanyingisha nao byabapete koodi na mu kwilongyela kwabo, mu lulangwilo lwa mu kifuko, mu bisangilo bya kakongye, na munkatshi mwa bantu bebuwa; abikyebe kwibakwasha bwa kwenda kumpala bwa’shi babatshishibwe na kunyiisha kutama mu kikudi. Ikala webakwasha bwabadya kwikala abanangushena ku mushindo wabadya kwifubwila peepi na Yehowa.

Mukanda wa Nkindji 20:11 awamba’shi: “Abaukaa bi eyikashi dya mwana ku bikitshino byaaye, su bi buwa na bilulame.” Mbikitshino kinyi bilombeene kulesha’shi mwana, mulume sunga mukashi baapu kulombana bwa kwikala mulongi a Yesu Kidishitu, na taadi peepi bwadya kubatshishibwa?

Abitungu mwana kwete kwenda kumpala bwa kubatshishibwa, akokyele baledi baaye. (Bik. 5:29; Kol. 3:20) Bible amba pabitale Yesu pabaadi na bipwa 12 shi: “Baadi mwibakookyele [baledi baaye].” (Luk. 2:51) Eyendo, twe mulombeene kutunga’shi mwana oobe ekale mupwidikye nya. Anka yawa e na lukalo lwa kubatshishibwa mmukumbeene kwikala akitshi mwaye mooso bwa kulonda kileshesho kya Yesu na kulesha’shi kwete kukookyela baledi baaye.

Mmukumbeene kulesha dingi lukalo lwadi nalo lwa kulonga bya binyibinyi bya mu Bible. (Luk. 2:46) Mwan’oobe akuminaa kutwela mu bisangilo na kwalula ku nkonko yabeele su? (Mis. 122:1) Asangelaa kwibadikila Bible na kwilongyela su?​—Mat. 4:4.

Mwana kwete kwenda kumpala bwa kubatshishibwa akitaa mwaye mooso bwa kutuula myanda ya Bufumu pa mbalo ya kumpala. (Mat. 6:33) Awuku’shi e na bushito bwa kulungula bangi bi lukumiino lwaye. Kwete kwipaana mu mishindo ilekeene ya bulungudi na, te na buufu bwa kulungula balongyeshi baaye sunga bena kalasa naaye’shi, Temwe a Yehowa. Aata midimo yabadi bamupe bwa kukita mu Kisangilo kya Bwina Kidishitu na mudimo wetu na muulo.

Mulombeene dingi kukita mwaye mooso bwa kwikala selele mu mwikelo na kupela bakuuku bebubi. (Nki. 13:20; 1 Kod. 15:33) Bino mbilombeene kumwenekyela ku bintu byakumiina bu mizike, ma filme, bintu byabalesha ku televizio, maasha a video, na mushindo w’atumika na Internet.

Bana bebungi mbashintulukye pa mwanda wa kwitatshisha kwa baledi baabo, mbekashe bya binyibinyi bu byabo na mbalombashe myanda itekibwe bwa kubatshishibwa abo bakii bakinga. Yehowa enwelele myabi bu byanukwete kukwasha bana benu bwabadya kukita kino kintu ki na muulo bwa kwikala mu kipwano naye.

Kwi mulungudi shabandjile kubatshishibwa:

We na kineemo kikata kya kutumika na kakongye bu mulungudi shabandjile kubatshishibwa. Atukutumbula ngofu bwa mushindo okwete kwenda kumpala na mu mudimo ofubila Efile Mukulu. Ku bukwashi bwa kulonga kwa Eyi dy’Efile Mukulu we mufikye mu kumuwuka na kutuula lukumiino mu milayilo yaaye.​—Yo. 17:3; Eb. 11:6.

Kumpala kwa kubanga kulonga na ba Temwe ba Yehowa ingi misango boodi otwele mu kingi kipwilo sunga’shi twekalanga otwele mu kipwilo su nkimune nya. Pangi boodi okitshi myanda kampanda ishi ipushene na mayi a kulonda a mu Bible. Kadi binobino bolesha lukumino loobe p’obe kwilanga kwishimba, bino abilesha’shi bwenyongola ngofu bwa myanda iboodi okitshi kala, na bolesha dingi lukumino p’obe kwaluluka, abilesha’shi we mulekye nshalelo mubi oboodi naye na kwata kitshibilo kya kukita myanda ibuwa ku meso kw’Efile Mukulu.​—Bik. 3:19.

Pangi nka bu bibaadi Timote, owuku bifundwe biselele “byatshiile ku bukinga.” Bino mbikukwashe bwa’shi twekalanga na mwikeelo wibubi sunga kukita milwisho ikata. (2 Tim. 3:15) We mulongye bya kukambila bitompwanga bya kukita myanda ayikutumu benoobe bwa kukita na kupela kukita ingi myanda ibubi ku meso kwa Yehowa. We muleshe lukumino p’obe kushaala mukwatshiile ku lulangwilo lw’eyendo na p’obe kulungula bangi myanda itale lukumino lobe. Mbakulongyeshe mushindo wa kulungula mukandu wibuwa. Binobino bwata kitshibilo kya kufubila Yehowa bu mulungudi shabandile kubatshishibwa.

Sunga wekala mulongye bya kuuka Yehowa kubanga ku bukinga sunga ku bukulu, binobino, we mukumbeene kunangushena pabitale angi matabula abidi aatungu kwela bwa kwenda kumpala mu kikudi, kwilambula na kubatshishibwa. Welambula kwi Yehowa p’omulungula mu luteko na kumulesha’shi bwata kitshibilo kya kwipaana kwadi na kumulangwila nka penda aye bwa losoo. (Mat. 16:24) Bwa kulesha’shi we mwilambule kwi Efile Mukulu, okyebe kubatshishibwa mu meema. (Mat. 28:19, 20) P’obe kwilambula na kubatshishibwa, ofiki mufubi a Yehowa Efile Mukulu. Kino nkineemo kikata!

Anka bu byodi mumone mu kulonga koobe kwa Bible, kukita kwa bino byooso akukyebe nkufwishila bitompwanga na nkalakashi. Tentekyesha’shi mafuku apeela kunyima kwa’ye kubatshishibwa, Yesu “batwadilwe mu kabaaka kwi kikudi bwa nkatompibwa kwi Diabulu.” (Mat. 4:1, Kilombeno kipya 2009) Kunyima kwa lubatshisho loobe bu mulongi a Yesu, uuka’shi opete bitompwanga. (Yo. 15:20) Abikafiki mu mishindo ilekeene-lekeene. Pangi beena kifuko n’obe mbalombeene kubanga nkushikwa. (Mat. 10:36) Bena kalasa noobe, bena mudimo mpaa na bakuuku boobe ba kala mbalombeene nkusenga. Kadi abitungu wekale nsaa yooso otentekyesha mayi a Yesu e mu mukanda wa Maako 10:29, 30, (Kilombeno kipya 2009): Awamba’shi: ‘Takwi muntu balekye nshibo, sunga bakwabo balume, sunga bankashanaye, sunga yaaya, sunga taabo, sunga baana, sunga mabala [mafuba], bwa kifulo n’ami na bwa kifulo na mukandu wi buwa; shapete binobino, ku kino kipindji, misuusa lukama kukila, mashibo, na bakwabo balume, na bankashanaye, na ba taabo, na baana, na mabala, na kubingwabingwa pamune; na ku kipungo akifiki, muwa wa losoo.’ Byabya tungunuka na kukita moobe mooso bwa kushaala peepi na Yehowa na kwikala na nshalelo mwipushene na miiya yaaye.

Su bwata kitshibilo kya kubatshishibwa, lungula mukunkushi a midimo ya kasaka ka bakulu. Nkonko i muushi mwa ano mayi ayinukwasha bwa kwisamba na bakulu bwa’shi bamone su we mulombane bwa kubatshishibwa. We mukumbeene kubanga kutaluula ino nkonko mu programe obe a kwilongyela.

P’welumbuula bwa kwisamba na bakulu, ata nsaa ya kubadika na kunangushena pabitale ma verse abadi batemune. Pangi we kumona’shi bibuwa kufunda ingi myanda yoobe muno mu mukanda sunga mu angi mapupwa. We mukumbeene kubuula uno mukanda sunga aa angi mapupwa nsaa y’anwisamba na bakulu. Su topusha ingi nkonko kalolo, totshinanga kwipusha yawa alongaa n’obe Bible sunga bakulu nya.

Pokwete kwisamba na bakulu, tomonanga’shi abitungu otuushe myalulo ila sunga kwakula myanda ibungi nsaa yokwete kwalula nya. Lwalulo lobe lupelepele na alupushika lotuusha mu bishima byobe ndukumbane. Bwa kwalula ku ingi nkonko ibungi, bibuwa kutemuna ma verse aalesha’shi luno lwalulo alufiki mu Bifundwe.

Su twe mubande kupeta kyukilo kilombane kya malongyesha a mbangilo a mu Bible, bakulu abakyebe kukita mwabo mooso bwa’shi opete bukwashi bwa kobesha kwakula kalolo mu oobe mayi na kwikala mulombane bwa kubatshishibwa kunyima kwa mafuku.

[Kwi bakulu mu kakongye: Mayi a kulonda pabitale mushindo wa kwisamba na bantu abakyebe kubatshishibwa e mwisaki 208-212.]