Mwisambo wa nfudiilo na baaba abakyebe kubatshishibwa

Ababatshishaa bantu nka ku bikongeno bya ba Temwe ba Yehowa. Ku nfudiilo kwa mwisambo wa lubatshisho, sha mwisambo alungula baaba abakyebe kubatshishibwa bwa’shi bemane bwa kwaluula n’eyi di bukopo ku ino nkonko ibidi:

1. We mupwe kwilanga ku milwisho yoobe welambula obe nabene kwi Yehowa na kukumiina eshinda dyaaye dya kipandjilo kukiila mwi Yesu Kidishitu su?

2. Oshinguula’shi nsaa y’obatshishibwa, b’ofiki Temwe a Yehowa na’shi b’otwele binobino mu ndumbulwilo a Yehowa su?

Kukumiina ku ino nkonko akulesha’shi baaba abakyebe kubatshishibwa ‘abakula patooka’ lukumiino lwabo mu mulambu wa nkuulo ya Yesu na’shi abelambula na mashimba aabo ooso kwi Yehowa. (Lom. 10:9, 10) Baaba abakyebe kubatshishibwa abitungu babadiile kunangushena mu luteko ino nkonko bwa’shi baluule muyiile lukumiino lwabo.

We mupwe kwilambula kwi Yehowa mu luteko, omulaa bwa kumulangwila nka penda’ye na kutuula kukita akikyeb’eshimba dyaaye pa mbalo ya kumpala mu muwa oobe su?

Oshinkamisha’shi we mupwe kwilumbuula bwa kubatshishibwa su?

Mbilamba kinyi bilombane bwa nsaa ya kubatshishibwa? (1 Tim. 2:9, 10; Yo. 15:19; Fid. 1:10)

Abitungu nfwadilo eetu aleshe “kwiyisha na binangu bibuwa” bwa kulesha “kwilambula kwetu kwi Efile Mukulu.” Byabya, baaba ababatshishibwa t’abitungu’shi bafwale bilamba bish’abilesha kwiyisha sunga bifundwe myaku kampanda nya. Nfwadilo aabo abitungu ekale mulombane, shii mako, amweka kalolo ku meso kwa bantu, na mulombane bwa wawa mwanda.

Abitungu muntu ekale na mwikeelo kinyi nsaa yabamubatshisha? (Luk. 3:21, 22)

Lubatshisho lwa Yesu ndulekyele beena Kidishitu kileshesho kibuwa lelo uno. Baadi aata dino etabula na muulo, na byabya bibaadi abimweneka mu binangu na bikitshino byaye. Byabya, t’abitungu kwela miseku ibubi, kwasha masha sunga kuywa pa mbalo ya lubatshisho nya, sunga kukita myanda kampanda isha ineemeka lubatshisho lwabakyebe kukita panka. Na dingi, mwina Kidishitu bakatuka mu kubatshishibwa t’abitungu asame bu muntu batshokola ngoshi nya. Bu bi kubatshishibwa mmwanda wa muloo, abitungu kusangala mu mushindo ulombane.

Mushindo kinyi ukumbene kwibunga na kwikala peepi na kakongye nkukwasha bwa kulombasha kwilambula koobe kwi Yehowa?

Kunyima kwa kubatshishibwa, bwakinyi abitungu’shi olame programe ebuwa a kwilongyela na kulungula mukandu wibuwa?

MAYI ABADYA KULONDA KWI BAKULU MU KAKONGYE

Nsaa ayifiki mulungudi shabandile kubatshishibwa bwa kulungula bakulu lukalo lwaye lwa kubatshishibwa, abitungu kumukankamika bwa’shi ataluule “Nkonko bwa baaba abakyebe kubatshishibwa,” mwisaki dya 185-207 dya uno mukanda. Atale’nyi mbalo yabadi bafunde’shi: “Kwi mulungudi shabandjile kubatshishibwa,” kubanga mwisaki dya 182, mwabadi bapatuule mushindo wadya kwilumbuula p’abesamba na bakulu. Anka bu byabadi bebileshe mu dyadya esaki, yawa akyebe kubatshishibwa mmukumbene kwikala na ngaluulo yadi mufunde kwisaki dyaaye mpaa na kubuula uno mukanda nsaa yabakwete kwisamba na bakulu. Byabya, t’abitungu’shi muntu kampanda ataluule naaye ino nkonko kumpala kwadya kufumankana na bakulu nya.

Muntu ooso akumiina kubatshishibwa abitungu awukishe mukunkushi a midimo ya kasaka ka bakulu. Su yawa muntu e na lukalo lwa kubatshishibwa baapu kupeta nsaa ya kutaluula “Nkonko ya baaba abakyebe kubatshishibwa,” mukunkushi a midimo ya kasaka ka bakulu amwipusha su bapu kwilambula pa bupenka mu luteko kwi Yehowa bwa kukita akikyebe eshimba Dyaaye. Su yawa muntu mmupwe kwilambula, mukunkushi a midimo ya kasaka ka bakulu aata mpángo ya’shi bakulu babidi bataluule na yawa muntu “Nkonko ya baaba abakyebe kubatshishibwa”. Abitungu’shi mukulu a ku bano babadi basangule ataluule naye kipindji kampanda kya ku bipindji bibidi. T’abitungu kutengyela mpaa na nsaa yabatuusha mafuku a kikongeno kya kifunda sunga kya mafuku asatu bwa kutalula naaye ino myanda nya.

Bino bipindji bibidi, kipindji kyooso abekikitshi munda mwa nsaa umune, sunga mbyabidi’shi tabi bubi kwata nsaa ibungi pakudi mushindo. Kipindji kyooso abekibanga na kwikifudiisha na luteko. Mukulu sunga muntu akyebe kubatshibwa t’abitungu ekale akidi lubilolubilo nsaa yabataluula ino nkonko nya. Mukulu mupebwe kipindji kya kutaluula abitungu atuule uno mwanda pa mbalo ya kumpala.

Abikalaa buwa kutaluulanga nkonko na muntu ooso akumiina kubatshibwa pabwaye kushi mu kisaka. Nsaa yakwete kuteemesha abyaluula yawa akyebe kubatshishibwa, mukulu mmulombene kwikala na mushindo wa kushinguula bi bukata bwa mpushiisho aaye, kushii kwialashena su mulombene sunga kukutwa kubatshishibwa. Na dingi, yawa akyebe kubatshishibwa abitungu ekale aakula bi mwishimba dyaaye nsaa yanutaluula ino nkonko. Nwi balombene kutaluula ino nkonko na mulume na mukashi’aaye pamune.

Su mukwetu mukashi ndjo akyebe kubatshishibwa, mukulu mmulombene kutaluula naaye mu mbalo ayibamono bantu, kadi kushii kupusha byabesamba. Su byatunga ungi muntu a kasatu, be kwata mukulu sunga mufubi a midimo muyiile kipindji kyanutaluula, bu byabileshibwa mu kino kikoso akilondo.

Mu kakongye mwi bakulu bapeela, bafubi ba midimo be na binangu bibuwa na kapatupatu mbalombene kutaluula na bantu nkonko ya lubatshisho i mu “Kipindji kya 1: Nkumiino ya mwina Kidishitu.” Nkapenda bakulu ndjo balombene kutaluula “Kipindji kya 2: Nshalelo a bwina Kidishitu.” Su kakongye kakutwa bantu balombane bwa kutaluula na abakyebe kutambula, mbalombene kulungula mukunkushi a kifunda su kakongye ke peepi nkalombene kutuusha bukwashi.

Pakudi’shi yawa akyebe kubatshishibwa kii mukinga, abitungu’shi muledi sunga baledi baaye beena Kidishitu bekale panka nsaa yabataluula naaye. Su muledi sunga baledi baaye ta mbalombene kwikala panka, yaaya nsaa bakulu babidi (sunga mukulu na mufubi a midimo mupunda kipindji kyabataluula) mbalombene kutaluula naaye mu kipindji kyooso.

Bakulu abakyebe kutaluula su yawa muntu akyebe kubatshishibwa mmupwe kupeta mpushisho mukumbane a malongyesha a mbangilo a mu Bible. Na dingi, abakyebe kushinkamisha su uno akyebe kufika mufubi a Yehowa kwete kusangeela bya binyibinyi na kulesha kaneemo kakata bwa ndumbulwilo a Yehowa. Su tapusha kalolo malongyesha a mbangilo a mu Bible, bakulu abaata mpángo ya’shi bamukwashe bwadya kwikala mukumbane bwa kubatshishibwa mu mafuku aafiki. Kwi bangi mbilombene kuteka nsaa ibungi bwa’shi baleshe’shi abasangeela mudimo wa bulungudi ngofu na kukookyela ku mpángo ya ndumbulwilo. Bakulu ndjo balombene kwikala na nkatshinkatshi pabitale nsaa y’abakisha ku kipindji kyooso bwa kutala kalolo su muntu mmulombane bwa kubatshishibwa. Sunga abitungu kukisha nsaa ibungi ku ingi nkonko na kukisha nsaa ipeela ku ingi, abitungu kutaluula nkonko yooso.

Kunyima kwa kutaluula kipindji kya kabidi, bakulu babekeele basangule bwa kutaluula ino nkonko, abebungu bwa kwata kitshibilo pamune su mmulombene kubatshishibwa. Abitungu bakulu bataluule kalolo myanda ya kala, ngobesha, na ingi myanda itale muntu ooso akyebe kubatshishibwa. Binangu byetu byooso abitungu bikale kwi baaba abalambula mashimba aabo kwi Yehowa na abalamiina malongyesha akata a bya binyibinyi bya mu Bible. Ku bukwashi bwanutuusha na kifulo kyooso, baaba abakyebe kubatshishibwa abekala balumbuulwe mu kipaso kilombane bwa kukita uno mudimo wa muulo ukata bu balungudi ba mukandu wibuwa.

Kunyima kwa byabya, mukulu umune sunga babidi ba ku bano abataluulanga na muntu akyebe kubatshishibwa, abemonena naye bwa kumulungula su mmulombane bwa kubatshishibwa. Su yawa muntu mmulombane bwa kubatshishibwa, abitungu bakulu bataluule naaye “Mwisambo wa nfudiilo na baaba abakyebe kubatshishibwa,” wi mwisaki dya 206-207. Su yawa muntu ta mubande kupudisha kulonga kwa mukanda wa Akitulongyesha Bible na wa Kushaala mu kifulo ky’Efile Mukulu bakulu abamunyingisha bwa’shi atungunukye na kwiyilonga kunyima kwa kubatshishibwa. Nulungule yawa muntu’shi efuku dya lubatshisho lwaye abedifundu mu fishe a Rapore ya mulungudi mu kakongye n’eshina dyaaye. Mutentekyeshe’shi bakulu abata ino myanda kwadi bwa’shi ndumbulwilo atungunukye na kukunkusha midimo ya lulangwilo lwa ba Temwe ba Yehowa mu nsenga ishima bwa’shi ekale na mushindo wa kukita midimo yabadi balumbuule kwi kakongye na kupeta bukunkushi na kunyingishibwa kwi bakulu. Dingi bakulu mbalombene kutentekyesha yawa mulungudi mupya’shi myanda yaye ya bupenka yooso abeyilama mu kuneemeka kwa miiya ya ba Temwe ba Yehowa, i mu jw.org itale kulama myanda ya muntu mu nsenga ishima. Abitungu kukita uno mwisambo penda munda mwa minite ekumi sunga muushi mwayo.

Kipwa kimune kunyima kwa lubatshisho lwa mulungudi, abitungu bakulu babidi bemonene na muntu bwa kumunyingisha na kumupa malango alombane. Umune a ku baaba bakulu abitungu ekale mukunkushi a kasaka ka bulungudi ke yawa muntu. Su yawa baabatshishibwa kii mukinga, abitungu’shi muledi aaye sunga baledi baaye beena Kidishitu bekale panka. Mwisambo waabo wikale wa muloo na aunyingisha. Bakulu abakyebe kulesha mushindo wakwete kwenda kumpala mu kikudi na kutuusha malango alombane pabitale kyubishi kya kwilongyela na kubadikanga Bible kwifuku n’efuku, lulangwilo lwa mu kifuko lwa ku lubingo, kwibunganga mu bisangilo na kwalula ku nkonko, na kwendanga mu bulungudi ku lubingo looso. (Ef. 5:15, 16) Su ta mubande kupudisha kulonga kwa mukanda wa Akitulongyesha Bible na wa Kushaala mu kifulo ky’Efile Mukulu, bakulu mbakumbene kwata mpángo ya’shi mulungudi umune amukwashe bwa kwiyilonga. Abitungu bakulu bekale na kalolo na lutumbu. Misango ibungi, elango na mayi a kulonda pabitale mwanda umune sunga ibidi mbilombane.