Ouuku eshina dy’Efile Mukulu na weditanyinaa su?

We mulombene kwikala na muntu omonaa bu kuuku a p’eshimba kadi oshy’ouku eshina dyaye? Ta bii kukitshika nya. Ungi mwana mukashi a mwiumbo dya Bulgarie abetaminaa bu Irina bakwile kalolo pabitale uno mwanda shi: “Bi bukopo bwa kwikala bukuukw’Efile Mukulu su towuku eshina dyaye.” Eyendo, nka bu bibatumono mu mwisambo wa kumpala, Efile Mukulu akumiina shi wekale kuuku’aye. Byabya, ku bukwashi bwa Bible, kwete kwilungula koodi shi: “Nnaami Yehowa. Dyadya ngi eshina dyande.”​—Yeeshaya 42:8.

Ku meso kwa Yehowa kuuka na kwitamina eshina dyaye sunga kukutwa kwibikita ta kwi na mwanda su? Tubande kutala: Eshina dy’Efile Mukulu dyabadi bafunde na maleta ananka a mu kina Ebreeyi abetanyina bu tetragramme, atwidisangana mu bifundwe bya kina Ebreeyi kya kala misango i pepi na 7 000. Ndikile kula angi mashina ooso atupete mu Bible. Kino nyi nkishinkamisho akilesha shi Yehowa akumiina shi tumuukye na tumwitanyine mwishina dyaye.a

Anka bangi be kumona shi, bu bi Efile Mukulu nyi Sha bukome booso na e selele, kutemuna eshina dyaye nkukutwa kwa kanemo. Oolo, kutemuna eshina dy’Efile Mukulu mu kipaso kishii kikumbane ta kwi buwa nya, nka bu byoshii mulombene kutemuna eshina dya kuuku oobe a p’eshimba mu kipaso kishii kikumbane. Kadi, Yehowa akumiina shi baaba be naye kifulo na abamunemeka bawukishe eshina dyaye. (Misambo 69:30, 31; 96:2, 8) Tentekyesha shi Yesu baadi mulungule balongi baye bwa kuteka shi: “Yaay’eetu e mwiyilu, eshina dyoobe dyende ntumbo.” Twi balombene kutumbisha eshina dy’Efile Mukulu pa kwidyukisha kwi bantu. Kukita byabya akwitwikasha pepi naye ngofu.​—Mateo 6:9.

Bible kwete kulesha shi Efile Mukulu kwete kumona “baaba abatshinyi Mwanana na abadingi eshina dyaye.” (Malakii 3:16) Pabitale yawa muntu akitshi byabya, Yehowa alaa shi: “Naamulama, mwanda aukw’eshina dyande. Su angitaanyina, naamwitaba, neekala naye mu mpombo.” (Misambo 91:14, 15) Kuuka na kwitamina eshina dya Yehowa kwi na muulo ukata su atukyebe kwikala naye mu kipwano.