“Nwikale anunêmeka bantu be byabya”

KUBANGA mu kipwa kya 1992, Kasaka ka Bakunkushi Bakulu kababangile kutuula bantu bashidimukye, bakulu banyingye mu kikudi bwa kukwasha ma komiteee bwaadya kulombasha mudimo wao kalolo.a Bano bakwashi abatuukila mu “ingi mikooko” bakwete kukwatshisheena ngofu Kasaka ka Bakunkushi Bakulu. (Yowano 10:16) Ku lubingo looso, abatwelaa mu kisangilo kya komitee abadi bebatuule. Be na mudimo wa kwakula myanda yabebatekye na kuleesha byabapwandikisha. Kasaka ka Bakunkushi Bakulu nyi akaataa kitshibilo kya nfudiilo, akupu, bakwetu abebakwasha abalondesha su kitshibilo kyabekeele baate kwi Kasaka ka Bankukushi Bakulu kibalombana. Bano bakwetu mbepaane bwa kukita kyooso kyabebatekye. Abashindjikilaa beena Kasaka ka Bakunkushi Bakulu ku bikongeno bya pa bwabyo na bya nsenga ishima. Mbalombeene dingi kwibatuma mu kutala ma filiale bu bantu abaleesha mpala ya biro byetu bika bya nsenga ishima.

Mukwetu umune kwete kufuba bu mukwashi kubanga mu 1992 akula’shi: “Nsaa yandombasha mudimo wande kalolo, Kasaka ka Bakunkushi Bakulu nkalombeene kwipaana ngofu mu kulombasha nkalo ya mu kikudi.” Ungi mukwetu baapu kufuba bu mukwashi munda mwa bipwa 20 akula’shi: “Nkineemo kikata kikile byoso binaadi mulombeene kupeta.”

Kasaka ka Bakunkushi Bakulu nkape bano bakwetu abebakwasha mudimo ukata na kusangeela mudimo wibukopo wabakwete kufuba na lulamato looso. Byabya, atwe booso, ‘twikaleeyi atunêmeka bantu be byabya.’​—Beena-Fidipe. 2:29, EEM.