Oukanga Uno Mwanda su?

Bantu ba kala abaadi abatembesha kaalo naminyi pabadi mu lwendo?

Mu mukanda wa Kibangilo shapitre a 22, Bible aleesha’shi Efile Mukulu balungwile Abrahame bwadya kwenda ku mbalo i kula na kibundji kyabo mu nkamulambula mulambu wa kushiika. Bible aleesha’shi: “Abrahame nkwata nteete bwa mulambu wa kushiika nkwiyitenteka mwan’aye Isaake; aye nkwata mwiyaasa . . . kaalo na kapete, booso babidi nkwenda pamune.”​—Kibangilo 22:6.

Mu Bible ta mbaleeshe kipaso kibabadi abatembesha kaalo kwi bantu ba kala nya. Byabya twi kwamba’shi Abrahame na Isaake abaadi basemune mwengye wa kaalo su? Ungi muntu bambile’shi ta bibaadi bibofule bwa “kusemuna mwengye wa kaalo bwa kwenda nako mbalo i kula nya.” Anka, Abrahame na mwan’aye abaatshile bintu bya kutembesha nabyo kaalo.

Bangi bantu abakula’shi mu aa mafuku tabibaadi bibofule bwa kukasa kaalo. Ngi bwakinyi pakudi mushindo, bantu abaadi abakumina kwata ekala dya kaalo ku kyoto kyabadi bapwe kutembesha, pangi kwa ungi muntu. Bantu bebungi balongye myanda ya mu Bible abakumina’shi Abrahame batshile makala a kaalo ku kyooto kibabadi abooto kumpala kwa kubanga lwendo. Baadi mulombeene kwela anka mu ka kidiba sunga kalondo ka buma kabaadi mwele mooshi, na baadi mwikatwale nsaa ibabadi abende. (Yeeshaya 30:14) Kunyima baadi mwate bikambi na bisama bya mitshi byume bwa kutembesha kaalo mbalo yooso yakumina.