We kupeta myabi ya Mupangi eetu bwa looso

Efile Mukulu balayile Mutemuki Abrahame’shi kekulu kaye kabadi na kya kutwala myabi kwi “bisamba byoso bya pa nsenga.” (Kibangilo 22:18) Nnanyi badi na kya kwikala kaaka kekulu?

Takudi bipwa bikile pa 2 000, Efile Mukulu badi mupe Yesu, aye badi kekulu ka Abrahame bukome bwa kukita bilengyeleshi bya kukanya. Byabya bilengyeleshi bibalesheshe’shi mulayilo ubabalayile Abrahame ubadi na kya kulombana ku bukwashi bwa Yesu.​—Beena-Ngalatea 3:14.

Bilengyeleshi bibakitshine Yesu bibakwashile bwa kumutundula bu muntu ababasangwile kwi Efile Mukulu bwa kutwadila bantu myabi, akupu bibalesheshe dingi kipaso kibadya kumufubisha Efile Mukulu bwa kutwadila bantu myabi ya ikalaika. Tala bilengyeleshi bya Yesu byabilesha ingi ya ku ngikashi yaaye ibuwa.

Kalolo​—Yesu bapashishe ba sha mikumbo.

Pabadi muntu sha nsudi mutekye Yesu bwadya kumupaasha, Yesu bamukumine aye nkumulungula’shi: “Nakumiina!” Musango umune, nsudi ibamupwile.​—Maako 1:40-42.

Kupaana​—Yesu badi mudiishe bantu be na nsala.

Yesu tabadi akumiina bwa’shi bantu bekale na nsala nya. Ungi musango, badi mudiishe binunu bya bantu p’aye kufwimisha mikate na mishipa ipeela. (Mateo 14:17-21; 15:32-38) Kunyima kwa kudya, booso babadi beekute na bya kudya bibungi nkushaala.

Lusa​—Yesu badi musangushe bantu ku lufu.

Yesu badi musangushe ka nsongwalume ka mukashi kilele badi na kinyongwa mwanda “bapushiishe lusa.”​—Luka 7:12-15.