Alushula dingi kipuano kiobe na Yehowa

KU KIPUA kioso, mikooko ibungi ina muulo ikuete kualushibua mu tukongie tua buina Kidishitu. Nangushena bukata bua “muloo mwiyilu” nsaa ayalukiila muntu umune! (Luk. 15:7, 10) Su mbakualushe mu kakongie, we mulombene kushinkamisha’shi, Yesu, ba mikeyilu, na Yehowa nabene be na muloo ukata p’abo nkumona bualuka dingi mu bia binyibinyi. Kadi, bu biualushula dingi kipuano kiobe na Yehowa, we mulombene kupeta nkalakashi. Bu nkalakashi kinyi? Na nkinyi kilombene nkukuasha?

WE KUPETA NKALAKASHI KINYI?

Bakuetu balume na bakashi bebungi, bakuete kubofula kuishimba kunyima kua’bo kualushibua mu kakongie. Pangi we kupusha nka bibapushishe Mfumu Daavide. Sunga kunyima kuabo kumufuila lusa ku miluisho yaaye, bakuile’shi: ‘Bito byande bibaadi binkambile kipimo.’ (Mis. 40:12; 65:4) Kunyima kua muntu kualukiila kui Yehowa, eyongolaa sunga kupusha buufu munda mua bipua bibungi. Isabelle,a badi mutushibue mu kakongie munda mua bipua bikile pa 20, bambile’shi: “Nadi namono bu bi bukopo bua’shi Yehowa mmulombene kukumina kunfuila lusa.” Su obanga kutshoboloka, we mulombene kubanga kubofula mpa na mu kikudi. (Nki. 24:10) Totadilanga’shi bino bikufikile.

Bangi abapushaa bu abibakalakasha buabadia kukita kintu kampanda bua kualusha dingi kipuano kiabo na Yehowa. Antoine bakuile bino kunyima kuabo kumualusha mu kakongie: “Nadi mupushe’shi ne mupue kuilua mianda yoso pabitale nshalelo ande a kala a bu muina Kidishitu.” Pa muanda’shi abepushaa mu uno mushindo, bangi abetutushaa bua kuipaana mu kukita midimo ya mu kikudi.

Tuate kileshesho, muntu mufule nshibo yaaye ngofu, kadi lupapi lubafiki lubeyiluisha, mbilombene kumukalakasha nsaa y’anangushena bungi bua nsaa na bukome abutungu’shi ayibakuule ino nshibo. Mu mushindo umune, su kipuano kiobe na Yehowa nkipue kuluishibua na miluisho we mulombene kupusha’shi bodia kunyinga dingi mu kikudi abitungu wekitshishe ngofu. Biabia, tue mulombene kuibikita obe nabene nya.

Yehowa etuitamina amba’shi: “Fikayi twisambe, na tulumbuule mianda munkatshi muetu.” (Yesh. 1:18, NWT) We mupue kuikitshisha ngofu bua “kulumbuula mianda.” Yehowa mmukufule bua biodi mupue kuikitshisha. Banda kunangushena: Bu biodi mupue kualukiila kui Yehowa mmulombene nkufubisha wekala bu kileshesho bua kulesha Satana’shi nsha madimi!—Nki. 27:11.

Bu biodi mupue kukita bino, we muifubuile kui Yehowa naye namu mmukulee’shi akefubuila koodi. (Shak. 4:8) Bibuwa bakumone kui bangi’shi bualukiila mu kakongie dingi anka, abitungu okite bibungi kukila paapa; abitungu dingi onyingishe kifulo kiobe na nshobe muikale dingi kuuku oobe Yehowa. We mulombene kukita bino naminyi?

EATSHILE BIPATSHILA BIODIA KULOMBASHA

Ekitshishe bua kuata bipatshila biodia kulombasha. Tentekiesha’shi kibangilo kiobe kia mianda ya mu kikudi—nkiukilo kiobe pabitale Yehowa na milayilo yaaye bua mafuku aafiki—ta mbishimine. Bua binobino, abitungu wekale na biubishi bibuwa, bu kileshesho kulungula mukandu wi buwa, kuenda ku bisangilo lubingo loso mpa na kukisha nsaa pamune na bakuetu balume na bakashi. Tala bino bipatshila abilondo.

Ikala webilungula Yehowa nsaa yoso. Nshobe auku tuinyongoshi todi nato bua bilubilo bioyikalanga mukite na mbilombene nkuikela bukopo bodia kumuteka. (Lom. 8:26) Kadi, “ikala na katshintshi mu nteko,” lungula Yehowa mushindo okumina kuikala dingi naye mu kipuano. (Lom. 12:12) Andrej atentekiesha’shi: “Napushaa lukalakashi ngofu mpa na buufu. Anka kunyima kua kuela luteko looso, bino bioso abinkatukaa. Na napushaa butaale mu binangu.” Su touku kia kuteka, we kutala kileshesho kia luteko lua Mfumu Davide lua kuilanga kuishimba luatupete mu Misambo 51 na 65.

Ebadikile Bible nsaa yoso. Bino abikukuasha bua kuikala na lukumino lunyingie na nkukuasha dingi bua kutamisha kifulo kiobe bua Yehowa. (Mis. 19:7-11) Felipe bakuile’shi: “Bu binadi mukutue kuikala na programe ebuwa a kuilongiela na kubadika Bible efuku dioso, nadi mubofule na, ami nkuleka Yehowa. Na dingi ntshinadi mukumine kukita kino kilubilo bua mususa wa kabidi nya. Nadi muate kitshibilo kia kuikasha kuibadikila kua Bible bu kintu akinkaluila.” Nobe namu we kukita nka biabia. Su we na lukalo lua kusangula mianda kampanda ya kuilongiela mu kuibadikila kobe kua Bible efuku dioso, we mulombene kuteka kuuku oobe e mu kipuano kibuwa na Yehowa buadia nkukuasha.

Alushula dingi kipuano kiobe na bakuenu balume na bakashi. Bangi abanangushena’shi nsaa y’abalushibua mu kakongie, bena kakongie abakekala na mueneno ebubi pabibatale. Larissa akula’shi: “Nadi napusha buufu bukile. Nadi napusha’shi nenyongosha bakuetu balume na bakashi. Nadi mukite mafuku ebungi na bino binaadi napusha muishimba.” Shinkamisha’shi bakulu na bangi bakuenu banyingie mu kikudi be na muloo wa nkukuasha bodia kualushula dingi kipuano kiobe na Yehowa. (Tala kashibo akamba’shi: “Bakulu mbalombene kukita kinyi?”) Be na muloo p’abo nkumona bualukiila na abakumina namu’shi wekale na muloo!—Nki. 17:17.

Nkinyi kilombene nkukaka bua kuifubuila pepi na kakongie? Epaane bua kukita midimo yoso y’abakitshi kui bakuenu balume na bakashi mu kakongie—tuela mu bisangilo bioso, lungula mukandu wibuwa nsaa yoso. Bino bi nkukuasha naminyi? Felix bakuile’shi: “Bakuetu babaadi abantengiela’shi ngalukie mu kakongie. Nampushishe’shi mbanfule. Boso buabo babankuashishe, buandia kualukiila dingi mu kifuko kia Yehowa, buandia kupusha’shi Yehowa mmunfuile lusa na buandia kutungunuka na kumufubila.”—Tala kashibo akamba’shi: “Kiodia kukita.”

TOKOOKANGA!

Satana akatungunuka na nkutumina “bitompuanga” bibungi bibukopo buashi atompe nkubofusha nsaa y’akumono walushula kipuano kiobe na Yehowa. (Luk. 4:13) Ikala muilumbuule bua kunyingisha kipuano kiobe na Yehowa.

Pabitale mukooko waaye, Yehowa alaa’shi: ‘Nyema mushimine namukimbi mwilamuune namwalusha, mukooko utshokokye nakewanya mooshi wa kilamba akumbu namunyingisha.’ (Es. 34:16) Yehowa mmukuashe bantu bebungi buabadia kualushula dingi kipuano naaye. Shinkamisha’shi akumina nkukuasha, bodia kuikala dingi mu kipuano ki bukopo naaye.

Bakulu mbalombene kukita kinyi?

Bakulu be na mudimo ukata wa kukuasha bantu balushibue mu kakongie buashi balushule kipuano kiabo na Yehowa. Tala kiabadi balombene kukita bua baba balushibue mu kakongie.

Ebashinkamiisheyi. Mpoolo mutumibua baadi muukie’shi muntu belanga ku miluisho, mulombene “kuneemenwa na kinyongwa kikile bukata.” (2 Kod. 2:7, Kilombeeno Kipya 2014) Muanda mulombene kukutua lukulupilo na kupusha buufu. Mpoolo badi mupe kakongie elango’shi: “Numufwile lusa na kumusamba.” Bantu balushibue mu kakongie be na lukalo na kuibashinkamiisha’shi, Yehowa na balanguidi nabo, mbebafule ngofu. Nsaa ayibatumbula bakulu na kuibapa bukuashi buabadi nabo lukalo bino abibakuasha bua kuleka kutshoboloka.

Tekayi nabo pamune. “Luteko lwa kwisendeela lwa muntu mululame alufubaa na bukome bwi bungi.” (Shak. 5:16, Kilombeeno Kipya 2014) Larissa, atupuile kutemuna kunundu akula’shi: “Nalunguile bakulu pabitale kuitutusha na moo binadi nabio. Babaadi bele nami luteko pamune. Na dingi napushishe’shi bakulu tababadi banfiitshile munda. Abadi bakumine kunkuasha buandia kualusha kipuano kiande na Yehowa.” Theo amba’shi: “Nteko ya bakulu nginshinkamiishe’shi Yehowa mmunfule binyibinyi na a monaa mianda ibuwa i munda muande kushi nka mianda ibubi.”

Ikalayi ba kuuku babo. Bantu balushibue be na lukalo lua kupeta ba kuuku mu kakongie. Ungi mukulu abetaminaa bu Justin akula’shi: “Kimba mishindo yoso yakuibetamina bua kukita nabo mudimo wa bulungudi na, muanda wi na muulo ukata, nkuibatembela ku mashibo kuabo. Kuikala bu ba kuuku babo nyi muanda wi na muulo ukata!” Ungi mukulu abetaminaa bu Henry amba’shi: “Su bangi bena kakongie bamona abikitshisha bakulu bua kuikala ba kuuku ba bano bantu balushibue mu kakongie, n’abo namu abekitshisha bua kuikala ba kuuku babo.”

Ebakuashe bamone biabadia kuilongiela. Kuuku munyingie mu kikudi e kukuasha muntu mualushibue mu kakongie, buadia kuikala dingi na kiubishi kibuwa kia kuilongiela. Ungi mukulu abetaminaa bu Darko amba’shi: “Ne mufule kuibanyingisha mu kikudi na mianda ikata yampetaa mu kuibadikila kuande na nebaleshaa bungi bua muloo wampetaa mu kuibadikila kua Bible. Nelumbulaa dingi bua kulonga ingi mikanda i na mianda ayinyingisha pamune nabo.” Mungi mukulu abetamina bu, Clayton, akula’shi: “Nebanyingishaa buabadia kutala mianda ya kala i mu Bible pabitale bantu abaadi bapete mianda i mumune na yaabo na malongiesha abadi balombene kuikupetela.”

Ebalameyi kalolo. Bantu balushibue mu kakongie abamonaa’shi mudimo wa bakulu mu kakongie nka penda kutshiba biimu. Anka kukatusha biabia, bantu balushibue mu kakongie be na lukalo lua kumona bakulu bu balami. (Yel. 23:4) Ikalayi nabukidi bua kuibateemesha na bua kuibatumbula. Ikalayi anuisamba nabo nsaa yoso. Pushayi abikitaa mungi mukulu abetamina bu Marcus nsaa y’ende mu kutembela bantu balushibue mu kakongie: “Atutentekiesha nabo mianda i mu Bifundue, kuibatumbula, kuibashinkamiisha’shi tui na nfiedi pa muanda wabo bua biabadi bekitshishe buabadia kualuka, na Yehowa’nyi e na nfiedi pa muanda wabo. Kunfudiilo kua kutembela muntu oso, atuataa dingi efuku dia kumualukiila.”

a Angi mashina mu uno muisambo mbeashintuule.