We muilumbuule bua “kupyana nsenga su”?

WE MUILUMBUULE BUA KUIKASHA NSENGA BU MPALADIISO SU?

Nsaa ibaadi Yehowa mulungule bantu bua’shi ‘bafuime pa nsenga poso, bekale bu banfumu bayo’ baadi muleshe’shi nsenga yoso ishima ayikekadika Mpaladiiso. (Kib. 1:28, EEM) Uno muiya wa ku kibangilo ubaadi autengiela baaba boso abakapiana Nsenga. Nsenga tayibadia kuikala mpaladiiso ku kibangilo nya, muanda efuba dia Edene ta ndishe mmafuku e bungi. Kunyima kua Armagedone, atukekadika na mudimo ukata wa kukita bua kutokiesha Nsenga y’abakuete kuluisha binobino. Bino abikatungu kuikitshisha ngofu.

Uno mudimo awitutentekiesha mudimo ubaadi ufube bena Isaleele nsaa ibabatukiile mu bupika mu Babilone. Mu nsenga yabo ta mubaadi mushaale muntu sunga ngumune munda a bipua 70. Anka Yeshaya baadi mutemukie’shi ku miabi ya Yehowa, babaadi balombene kupeta ngobesha ya kuibakuula dingi kibundi ki buwa. Butemuki abulesha bino: “Akituula bintu byaaye byooso bibaasaaswilwe; aaluula kabaaka kaaye buu lupango lwa Edene na kipya kyaaye buu lupango lwa Yehowa.” (Yesh. 51:3) Yehowa baadi mukuashe bena Isaleele buabadia kulumbuula kibundi kiabo kalolo. Mu mushindo umune, ku miabi ya Yehowa atukobesha kulumbula nsenga na kuiyikasha bu mpaladiiso e buwa. Noobe namu kui mianda ayitungu’shi okite kubanga binobino, bua kulesha’shi okumina nkakita wawa mudimo.

Mmushindo umune watudi balombene kukita bino, mpa kulama nshibo yetu ilumbule kalolo na itookie. We kukita bilekeene na abikitshi ba nkungishanyi noobe. We mulombene kukuasha bua kusuula na kulumbula mashibo a Bufumu na mashibo a Bikongeeno. Su we na mushindo, we mulombene kuipaana mu mbalo yoodi mushale bua kukuasha bantu bapete masaku aatukila ku bintu bipangibue. Bino abilesha’shi okumiina kukuasha bakuenu balume na bakashi bena lukalo na bukuashi. We mulombene kuiyipusha obe nabene’shi, ne kulonga angi mayele andia kufubisha su Yehowa akumiina’shi nshale pa nsenga bua losoo su?

WE MUILUMBULE BUA NKAPASUKILA BANTU ABAKASANGUKA SU?

Kapindi kapela kunyima kua Yesu kusangula ka nsonguakashi ka Yayiluse, Yesu bakuile’shi nui balombene kumupa ka kudia. (Mak. 5:42, 43) Uno mudimo wa kupasukila kano ka songuakashi ka bipua 12, taubaadi bukopo nya. Banda kunangushena nsaa ayikalombasha Yesu mulayilo wa’shi: “Nsaa ayikafiki ayikapusha booso be mu ma-nyembo [a kitentekiesho] eyi diaye na abakatuuka.” (Yo. 5:28, 29, Kilombeeno Kipya 2014) Biabia Bible ta mupatuule mianda ibungi kantu pa kantu nya. Anka tui balombene kunangushena’shi, bantu abakasanguka abakekala na lukalo lua kuibakuasha na bidibua, mbalo ya kushala, na bilamba. We mulombene kulesha kubanga binobino’shi okumina nkakuasha su? Luno ndungi lukonko alutungu kutaluula.

Su babaukisha’shi mukunkushi a kifunda afiki mu kukunka kakongie keenu, we kitshishaa namu bua kumuitanyina ku shibo koobe bua’shi nudie naye kidibua pamune su? Su mukuetu afubanga mu mudimo wa nsaa yooso ku betele, babamukatusha ku betele babamutumu mu kakongie, sunga’shi mukunkushi a kifunda mudimo waye wa bu mukunkushi a kifunda ubapu, we mulombene namu kuilumbula pa kumukuasha bua kupeta mbalo ya kushala su? Su mu kibundi kienu muakitshika Kikongeeno kia mafuku asatu sunga ki’efuku dimune, we kuipaana namu bua kukuasha kumpala na kunyima kua Kikongeeno sunga kutambula bekufikie su?

ELUMBULE BUA NKALONGIESHA BANTU ABAKASANGUKA

Muyile abilesha Bikitshino 24:15, atutengiela kutambula bantu midiyala abakasanguka. Be bungi ba kuabadi, babafuile kushi kupeta mushindo wa kuuka Yehowa.a Pano mpabakebapa mushindo wa kuuka Yehowa. Bafubi b’Efile Mukulu basha lulamato na bapue kumona mianda ibungi, abakakuasha mu mudimo wa kuibalongiesha. (Yesh. 11:9) Charlotte mupue kulungula mukandu wibuwa mu Europe, Amerique a kuushi, na mu Afrique, kuete atengiela yaya nsaa. Akula na muloo’shi: “Natengiela kulongiesha bantu abakasanguka. Nsaa yanangushena pabitale muntu kampanda baadi na muwa mu mafuku a kala, nkuete kupuandikisha’shi, ‘Su yawa muntu auka Yehowa, nshalelo aye mulombene kushintuluka.’ Natengiela bua kulongiesha bantu abakasanguka pabitale Yehowa na mushindo aukalumbuka nshalelo aabo pab’akamufubila.”

Nsaa ayikasanguka bafubi ba Yehowa babaadi kuanka kumpala kua Yesu kufika pa nsenga, abakekala na bi bungi bia kulonga. Tubande kupuandikisha kineemo ki’atukekala nakio na muloo wa kupatuluila Ndaniele kulombana kua butemuki bubaadi mufunde, kadi buashi mupushe. (Nda. 12:8) Sunga’shi pabitale kukuasha Luuta na Naomi buabadia kulonga mushindo ubadi kifuko kiabo kituale mpa na ku Mesiya. Atukekala na muloo wi bungi wa kulungula mukandu wibuwa mu nsenga ishima mu bulungantu, kushii moo sunga mianda ibubi i kuanka mu uno ndumbuluilo e bubi lelo uno.

Nkinyi kiodi mulombene kukita kubanga binobino bua kulesha’shi we muilumbule bua nkalongiesha bantu abakasanguka? Mushindo umune, nyi mpa kuikitshisha bua kulumbula mayele eetu a kulongiesha na pa kuikala atulungula mukandu wibuwa aukitshika mu nsenga ishima lelo uno efuku dioso. (Mat. 24:14) Su bipua biobe sunga nshalelo oobe akukutshishua kukita bi bungi mu ano mafuku, abitungu kuikitshisha koobe kuleshe’shi we muilumbuule bua nkalongiesha bantu abakasanguka.

Oolo, lukonko lukata nduno, okuete kutengiela mu binyibinyi kupiana nsenga su? We na muloo wa kukulupila kulumbula nsenga bua kupasukila na kulongiesha bantu abakasanguka su? We kulesha’shi we muilumbuule pa kukimba mishindo ya kupetekielua ku mudimo wi mumune na wawa aukutengiela nsaa yokapiana nsenga.