Tokimbanga nka penda buwa bobe’be nabene bu bantu ba mu ino nsenga
BANTU be bungi lelo uno abakumiinaa’shi bebakitshine mianda mu mushindo wi pabuao. Sunga bebakitshina mianda mu uno mushindo, abakumiina nka’shi bebakitshine mianda kukila paapa. Bantu be bino, abakimbaa nka penda buwa buabo’bo banabene, na ta be na lutumbu bua biabebakitshina. Bible baadi mupue kulesha’shi bino nyi abikekala bantu mu mafuku a ku nfudiilo.—2 Ti. 3:2.
Eyendo, kino kikudi ta kibangie binobino nya. Adama na Eva abaadi besanguile ki buwa na ki bubi, nyi buakinyi tukuete kukienga. Bipua nkama kumpala, Nfumu Uza a mu Yunda baadi munangushene’shi, baadi na matalua a kulambula kabanda ku ntempelo, anka kino kibaadi kilubilo kikata. (2 Mya. 26:18, 19) Mu mushindo umune, Bafadisee na Basanduseo abaadi abamba’shi abitungu Efile Mukulu ebakitshine mianda kalolo kukila bangi penda muanda wa’shi mbekulu ba Abalahama.—Mat. 3:9.
Tui munkatshi mua bantu abakimbaa nka penda buwa buabo’bo banabene, na tuikuambula bino binangu. (Nga. 5:26) Tui kubanga kunangushena’shi abitungu tupete mashito akampanda, sunga’shi betukitshine mianda mu mushindo wi pabuao. Mushindo kinyi watudia kusuuka uno ngielelo a binangu? Kia kumpala, abitungu tuukie bi mueneno a Yehowa pabitale uno muanda. Mayi abidi a kulonda ngalombene kuitukuasha.
Yehowa nyi auku kitulombene. Tala ndambo ya bileshesho.
Mu kifuko, mulume akuminaa’shi mukashi aaye amunemekie, mukashi namu akuminaa’shi mulume aaye amufule. (Ef. 5:33) Abitungu mulume na mukashi bekale abeleshena kifulo. (1 Ko. 7:3) Abitungu bana bekale abakokiela baledi babo, na baledi namu abitungu bafule na kupasukila bana babo.—2 Ko. 12:14; Ef. 6:2.
Mu kakongie, abitungu tunemekie bakulu, abo bakuete kufuba ngofu. (1 Te. 5:12) Anka, t’abitungu’shi bekale abakitshisha bakuabo balume na bakashi mianda pa bukopo.—1 Mp. 5:2, 3.
Efile Mukulu mupe mbulamatadi matalua a kuteka bitadi, na kupeta kineno kui bantu babakunkusha.—Lom. 13:1, 6, 7.
Yehowa muitupe bintu na kifulo kioso kukila mpa na biatudi balombene. Pa muanda tui bantu ba sha miluisho, tuibalombene nka penda lufu. (Lom. 6:23) Anka, pa muanda wa kifulo kiaye ki na lulamato, Yehowa muituelele miabi i bungi. (Mis. 103:10, 11) Mudimo oso wawa watupete, atuiupete ku kalolo ka Yehowa.—Lom. 12:6-8; Ef. 2:8.
KIAKUKITA BUA KUPELA KUKIMBA NKA PENDA BUWA BOBE’BE NABENE
Dimuka tala obanga kunangushena bu bantu ba mu uno ndumbuluilo a Satana. Kushi kutundula, tuikubanga kunangushena’shi, abitungu bekale abetukitshina mianda kukila bangi. Yesu baadi mufubishe kileshesho kia bafubi babaadi bafute ndenie umune, bua kulesha biabidi bibofule bua kubanga kunangushena mu uno mushindo. Bangi be na mudimo ababangile mudimo ku namashika buee na abo nkufuba efuku dishima mu kaanya ke bukopo; bangi abaadi bafube penda munda mua nsaa umune. Kisaka kia kumpala kibaadi akiamba’shi, abitungu bekifute makuta e bungi bua mudimo ubabakitshi. (Mat. 20:1-16) Dilongiesha dibaadi Yesu mutushe ndino: abitungu balongi baye basankie na biabia abibapa Efile Mukulu.
Bantu abafubile ngofu efuku dishima abaadi abamba’shi, abitungu bebafute makuta e bungi bua mudimo ubabakitshi
Ikala na lutumbu, na t’otengiela nka’shi bantu bakukitshine mianda. (1 Te. 5:18) Ambula Mpoolo mutumibua, shi baadi atekie bakuetu ba mu Kodinda bintu bibaadi nabio lukalo, sunga bibaadi na matalua a kuibikita. (1 Ko. 9:11-14) Abitungu tuikale na lutumbu bua bintu biabetupa, na kushi kutengiela nka’shi betupe bintu.
Mpoolo mutumibua ta baadi mutekie makuta
Ikala na kuiyisha. Nsaa i muntu abanga kukimba nka penda buwa buaye’ye nabene, abanga kumona’shi abitungu bamupe bintu bi bungi kukila bangi. Kuiyisha akuitukuasha bua kupela kunangushena bino.
Kuiyisha kua mutemuki Ndanyele kubaadi kumuikashe na muulo ku meso kua Yehowa
Mutemuki Ndanyele baadi mulekie kileshesho ki buwa kia kuiyisha. Baadi mu kifuko kia kinemo, baadi buwa, baadi na binangu, na baadi na ngobesha ibaadia kumutakula mu kunangushena’shi abitungu bamukitshine mianda mu mushindo wi pabuao na kupeta kinemo. (Nda. 1:3, 4, 19, 20) Anka, Ndanyele bashele muiyishe, na dino eyikashi dibaadi dimuikashe na muulo ku meso kua Yehowa.—Nda. 2:30; 10:11, 12.
Tulekieyi eyikashi dia kukimba nka buwa buetu’tue banabene dipalakane mu nsenga lelo uno. Anka tutungunukieyi na kupeta muloo mu miabi yoso y’abetuelela kui Yehowa kukiila ku kalolo kaye.