Bena Kasaka ka Bakunkushi-Bakulu babidi bapia

MUIFUKU dia 5/10/2024, abaadi baukishe muanda wi pabuao ku kisangilo kia ku kipua: Mukuetu Jody Jedele na Jacob Rumph abaadi batuudibue bu bena Kasaka ka Bakunkushi-Bakulu ka Tumonyi tua Yehowa. Bano bakuetu boso babidi, mbapue kufubila Yehowa na lulamato munda mua bipua bi bungi.

Mukuetu Jedele baadi mutandikue mu kibundi kia Missouri, mu États-Unis, na baledi baye abaadi Tumoyi tua Yehowa. Kifuko kiaye kibaadi kishale mbalo ishibaadi Tumonyi tua Yehowa tui bungi. Pa muanda wa bino, baadi muimonene na bakuetu balume na bakashi be bungi ba mu bingi bipindi bi’eumbo abaadi abafiki mu kukuasha bua kulungula mukandu wi buwa. Kifulo na buumune buabo, bibaadi bimukume kuishimba ngofu. Mukuetu Jedele baadi mubatshishibue mu 15/10/1983. Baadi mufule kulungula mukandu wi buwa, na pabapuile kalasa, babangile bu mbala-mashinda mu mueshi wa Kitema mu 1989.

Pabaadi mukuetu Jedele bukinga, baledi baye abaadi abende naye na muina aaye mukashi mukutala Betele. Bino bibaadi bibatakule bua kuifundila kepatshila ka kuenda ku Betele, na boso buabo mbalombashe kano kepatshila. Mukuetu Jedele bafikile ku Betele a Wallkill mu mueshi wa Kitema mu 1990. Babangile kufuba mu Departema a kusuula mu mashibo na kunyima mu Departema atalaa bena Betele abakumbu.

Mu aa mafuku, tukongie tua ludimi lua Espagnol tubaadi atuende na kufuima na tubaadi na lukalo lua bakuetu balume. Biabia mukuetu Jedele bayile mu kakongie kamune, na aye nkubanga kulonga ludimi lua Espagnol. Kunyima kua mafuku apela, baadi muimonene na mukuetu mukashi Damaris, baadi mbala-mashinda mu kiakia kifunda. Muenda mafuku, abaadi beyibakishene, na aye nkufika ku Betele.

Mu 2005 abakatukile ku Betele bua kupasukila baledi baabo ba sha lulamato. Mu aa mafuku abaadi bu ba mbala-mashinda ba mieshi yoso. Mukuetu Jedele baadi mulongieshi mu Kalakasa ka ba Mbala-mashinda na baadi muina Komite a kuisamba na ba munganga na mu Komite a luibako.

Mu 2013, abaadi dingi betamine mukuetu Jedele na mukashi aaye ku Betele bua luibako lua Warwick. Kubanga nka paapa, mmufube ku Patterson na ku Wallkill. Mukuetu Jedele baadi mufube mu Departema atalaa mianda ya luibako na mu Departema a kuisamba na ba munganga. Mu mueshi wa Kasatu 2023, abaadi bamutuule bu mukuashi mu Komite a Mudimo. Patentekiesha ino yoso midimo yadi mukite amba’shi: “Nsaa yopete mudimo upia, wekupusha bu’be shobesha. Anka yaya nsaa nyi yodia kutentekiesha bua kukulupila Yehowa, muanda e kuikasha muntu kiakia kioso kiakumiina.”

Mukuetu Rumph baadi mutandikue mu kibundi kia Californie, mu États-Unis. Pabaadi mukinga, nyinaye ta baadi alungula mukandu wi buwa sunga kuenda mu bisangilo, anka baadi akitshi muaye moso bua kumulongiesha bia binyibinyi bia mu Bible. Dingi, kipua kioso baadi ende mu kutala nyina aaye nkulu, baadi Kamonyi ka Yehowa ka sha lulamato. Nyina aaye kulu baadi amunyingisha bua kuuka bi bungi pabitale binyibinyi bia mu Bible, na pabalombeshe bipua 13, baatekiele buabadia kulonga Bible. Muifuku dia 27/9/1992, pabaadi ki nsongua, baadi mubatshishibue. Muanda wa muloo, nyinaye baadi mubanguule kulungula mukandu wi buwa na kutuela mu bisangilo, na musango umune boso be na kifuko abaadi bende kumpala mu kikudi na abo nkubatshishibua.

Pabaadi ki nsongua, mukuetu Rumph baadi amono muloo ubaadi nao ba mbala-mashinda. Biabia pabapuile kalasa, babangile bu mbala mashinda mu mueshi wa Kitema 1995. Mu 2000, baadi muende mu Équateur mubaadi lukalo lukata lua balungudi. Kuakua baadi muimonene na mukuetu mukashi Inga, mbala-mashinda baadi afiki ku Canada, na muenda mafuku abo nkuiyibakishena. Kunyima kuabo kuiyibakishena, abaadi bakafube mu ka kibundi kapela ka mu Équateur kabaadi na kasaka kapela ka balungudi. Lelo uno, kano kasaka takadi kakongie.

Kunyima kua mafuku, Mukuetu Rumph na mukashi aaye abaadi bebatuule bu ba mbala-mashinda ba nsaa yoso, na kunyima abaadi bafube mu mudimo wa kifunda. Mu 2011 abaadi bebetamine mu kalasa ka Galaade ka 132. Kunyima kuabo kupeta mapolome, abaadi bafube ma mbalo elekene mu nsenga, bu kufuba ku Betele, mudimo wa bu misionere na mu mudimo wa kifunda. Mukuetu Rumph baadi dingi mulongieshi mu Kalasa ka Balungudi ba Bufumu.

Pa muanda wa kipupa kia COVID-19, mukuetu Rumph na mukashi aaye abaadi balukie mu États-Unis. Kuakua abaadi bebetamine ku Betele a mu Wallkill, kubabaadi balongieshe mukuetu Rumph bia kufuba ku Departema a mudimo. Kunyima abaadi bebalushe bua nkafuba ku Betele a mu Équateur, kuanka mukuetu Rumph baadi muina Komite a Filiale. Mu 2023 abaadi bebatume ku Warwick. Mu mueshi wa Kumpala 2024, Mukuetu Rumph abaadi bamutuule bu mukuashi mu Komite a Mudimo. Panangushena ano oso ma mbalo aadi mufube, amba’shi, “Akikasha mudimo bu wi pabuao ta mbalo, kadi bantu bofubu nabo.”

Tui na lutumbu bua mudimo wa bano bakuetu, na “atutungunuka na kunemeka bantu be biabia.”​—Fid. 2:29.