Nanyi akapaasha nsenga?

Bantu bebungi bakuete kuinyongola p’abamono bantu abaluisha nsenga na muwa wi panka. Bantu balongie mianda ya mbalo ishaale bantu abashinkamisha’shi midimo ya bantu ikuete kuluisha bingi bintu bi panka na bipangua bi na muwa kukila kumpala.

Bantu abakaluisha nsenga bua looso su? Kuifuku diabakashaala mu kipuano na bingi bipangua?

Bantu aboobesha kupaasha nsenga?

Bantu balongie tulasa abashinkamisha’shi bantu be na ngobesha ya kukaluila nsenga na kunemeka bintu bi na muwa panka. Bangi bantu abakimbuulaa mianda abalesha’shi bua kupaasha nsenga, abitungu bantu bashintuule bintu bibungi musango umune. Bu kileshesho abitungu:

• kulumbuula bia kufubisha nsenga, mitamba, ma mbalo e kitelesha, na tulunga tua mema.

• kushintuula mishindo ya kudima na ya kutuusha kaalo.

• kukila ku bidibua bingi abituukila nka ku mitshi. Bino bidibua bikale bimene ku bisakisaki, na kudia muita upeela na mishipa ipeela. Na kupeelesha kusumbula bintu bisumanga.

• kukumina’shi bua kuikala na nshalelo ebuwa, t’abitungu nka kuikala na bintu bia ku mbidi bikile bungi.

Opuandikisha naminyi? Tui kukulupila’shi mbulamatadi yoso, bansunga boso na bena eumbo boso abakepushena bua kushintuula mianda mu uno mushindo su? Su omono’shi bi bukopo muanda kukii bantu bebungi be na luabi, abakimbi penda buwa buabo na bash’abatala nkalo ya bangi?​—2 Timote 3:1-5.

Kabingilo ka kuikala na lukulupilo

Bible etushinkamisha’shi planete etu ekala biya mu mafuku e kumpala. Apatuula buakinyi bioso abikitshi bantu ta mbilomane bua kupaasha nsenga. Apatuula dingi mianda ayitungu kushintuula na mushindo wabikakitshika.

Buakinyi bantu t’aboobesha kupaasha planete etu. Yehowaa Efile Mukulu bapangile nsenga, aye nkupa bantu bushito bua kuiyilama. (Kibangilo 1:28; 2:15) Bua koobesha mudimo wabo abadia kulonda nka bukunkushi bua Mupangi aabo na kuibukookiela. (Nkindji 20:24) Pamutue pa kukita biabia, mbasumbushene Yehowa na, basangula kuikitshina mianda. (Mulungudi 7:29) Bantu ta be na ngobesha ya kubaamba nsenga abo banabene, sunga balumbuula bingi bintu, mpenda bua kapindji kapeela.​—Nkindji 21:30; Yeelemiya 10:23.

Akitungu kushintuula. Mpango ya Efile Mukulu ngia kukutshisha bantu kuluisha nsenga. (Kibafumbwilwe 11:18) T’akituula mbulamatadi na ndumbuluilo ya bantu nya, eyikatusha na kutuula bungi Bufumu. (Kibafumbwilwe 21:1) Nyi buakinyi, Yehowa amba’shi: “Talayi! Nakitshi bintu bioso bipia.”​—Kibafumbwilwe 21:5.

Kuno kushintuluka akukalombana naminyi. Yehowa akakatusha mbulamatadi ya bana ba bantu bua kutuula mbulamatadi a muiyilu abetamina bu Bufumu bu’Efile Mukulu. Yawa mbulamatadi e ku bukunkushi bua Yesu Kidishitu, akamunu nsenga ishima.​—Ndanyele 2:44; Mateo 6:10.

Bufumu bu’Efile Mukulu abukalongiesha bantu buabadia kuikala na nshalelo muipushene na miiya ya kululama. Bantu p’abakashinguula Mupangi aabo na kulonda bukunkushi buaye, abakashaala mu buumune na bipangua bi pa nsenga. (Yeeshaya 11:9) Bible alesha mushindo wi mbulamatadi a Efile Mukulu, akakuasha bantu baaye buabadia kuikala na nshalelo ebuwa, anemeka planete. Uno mbulamatadi akakitshi bino:

• Akapa bantu booso bidibua.​—Misambo 72:16.

• Kualusha bintu bioso abituusha muwa.​—Yeeshaya 35:1, 2, 6, 7.

• Kualusha butaale pankatshi pa nyema na bantu.​—Yeeshaya 11:6-8; Osea 2:18.

• Kukita bia’shi lupapi taluluilanga.​—Maako 4:37-41.

Shinkamisha’shi Bufumu bu’Efile Mukulu abukashintuula bino bintu bioso binobino. Bua kuuka mianda ibungi, badika muisambo awamba’shi “Bufumu bw’Efile Mukulu abukamunu pa nsenga nsaa kinyi?”