Si mund t’u përgjigjesh disa kundërshtimeve të mundshme

Komente: E ardhmja e njerëzve varet nga qëndrimi i tyre kundrejt Perëndisë Jehova dhe Mbretërisë së tij, të drejtuar nga Krishti Jezu. Mesazhi i Mbretërisë së Perëndisë është entuziazmues dhe bazohet në të vetmen shpresë të besueshme për njerëzimin. Është një mesazh që të ndryshon jetën. Ne kemi dëshirë që të gjithë ta dëgjojnë. Edhe pse e kuptojmë që vetëm pak veta do ta pranojnë dhe do ta vlerësojnë atë, gjithsesi, jemi të vetëdijshëm që, më së paku, njerëzit kanë nevojë ta dëgjojnë. Në këtë mënyrë, nuk do të bëjnë një zgjedhje nga padija. Megjithatë, jo të gjithë dëshirojnë të dëgjojnë, dhe ne nuk i detyrojmë. Por, duke përdorur aftësi dalluese, shpesh mund t’i kthejmë kundërshtimet në raste për biseda të mëtejshme. Këtu paraqiten shembuj të metodave që kanë përdorur disa lajmëtarë me përvojë, teksa përpiqeshin të gjenin ata që e meritojnë. (Mat. 10:11) Nuk po të rekomandojmë t’i mësosh përmendësh këto përgjigje, por që të kesh në mendje idenë, ta shprehësh me fjalët e tua dhe të përçosh interesin tënd të sinqertë te personi me të cilin po flet. Në këtë mënyrë, do të jesh i sigurt që njerëzit me zemër të prirur, do të dëgjojnë dhe do t’u përgjigjen me çmueshmëri përpjekjeve të Jehovait për t’i tërhequr drejt masave të dashura që ai ka marrë për jetën.​—Gjoni 6:44; Vep. 16:14.

‘S’MË INTERESON’

● ‘A mund t’ju pyes nëse nuk ju intereson Bibla, apo feja në përgjithësi? Po jua bëj këtë pyetje sepse kemi takuar shumë njerëz që dikur ishin fetarë, por tani nuk shkojnë më në kishë, ngaqë atje shohin shumë hipokrizi (ose: sepse mendojnë që edhe feja është thjesht një biznes për të nxjerrë para; ose: ngaqë nuk e miratojnë përfshirjen e fesë në politikë; etj.). As Bibla nuk i miraton këto gjëra, dhe na jep të vetmen arsye për ta parë të ardhmen me shpresë.’

● ‘Nëse me këto fjalë doni të thoni se nuk ju intereson një fe tjetër, mund t’ju kuptoj. Gjithsesi, ka shumë të ngjarë t’ju interesojë se ç’e ardhme na pret, kur mendojmë për rrezikun e luftës bërthamore (ose: si mund t’i mbrojmë fëmijët që të mos abuzojnë me drogën; ose: ç’mund të bëjmë kundër krimit, që të mos kemi frikë kur ecim rrugëve; etj.). A shpresoni se do të ketë ndonjë zgjidhje të vërtetë?’

● ‘Thoni kështu, ngaqë tashmë i përkitni një feje? . . . Si mendoni: a do të vijë ndonjëherë koha, kur të gjithë do të kemi të njëjtën fe? . . . Çfarë pengesash vëreni? . . . Që të jetë diçka e vlefshme, çfarë baze mendoni se duhet të ketë?’

● ‘Ju kuptoj. Edhe unë mendoja njësoj disa vjet më parë. Por lexova në Bibël diçka që më ndihmoi t’i shihja gjërat nga një këndvështrim tjetër. (Tregoji personit çfarë ishte.)’

● ‘A do t’ju interesonte t’ju tregoja nga Bibla se si mund t’i takoni përsëri njerëzit tuaj të dashur, që ju kanë vdekur (ose: se cili është qëllimi i vërtetë i jetës; ose: si na ndihmon Bibla ta mbajmë familjen të bashkuar; etj.)?’

● ‘Nëse me këtë doni të thoni se nuk ju intereson të blini diçka, më lini t’ju sqaroj. Vepra që bëj, nuk është punë tregtie. A do t’ju interesonte të jetonit në një tokë parajsore, pa sëmundje dhe pa krime, i rrethuar nga fqinj që ju duan vërtet?’

● ‘Kështu përgjigjeni gjithnjë kur vijnë Dëshmitarët e Jehovait? . . . A keni menduar ndonjëherë përse vazhdojmë të shkojmë te njerëzit dhe se çfarë duam t’u themi? . . . Me pak fjalë, sot kam ardhur këtu sepse di diçka që mendoj se edhe ju duhet ta dini. Përse të mos dëgjoni vetëm këtë herë?’

‘S’MË INTERESON FEJA’

● ‘Mund t’ju kuptoj. Sinqerisht, kishat nuk e kanë bërë botën një vend të sigurt për të jetuar, apo jo? . . . A mund t’ju pyes nëse keni pasur gjithnjë këtë mendim? . . . Megjithatë, a besoni te Perëndia?’

● ‘Shumë njerëz mendojnë si ju. Në të vërtetë, feja nuk i ka ndihmuar dhe aq. Kjo është edhe një nga arsyet e vizitës sonë, sepse kishat nuk u kanë mësuar njerëzve të vërtetën për Perëndinë dhe qëllimin e tij të mrekullueshëm për njerëzimin.’

● ‘Megjithatë, jam i sigurt që ju intereson e ardhmja. A e dini se Bibla i kishte parathënë kushtet, në të cilat është bota sot? . . . Ajo tregon edhe përfundimin e tyre.’

● ‘Keni menduar gjithnjë kështu? . . . Ç’mendoni për të ardhmen?’

‘S’MË INTERESOJNË DËSHMITARËT E JEHOVAIT’

● ‘Shumë veta na e thonë këtë. Por, a keni menduar ndonjëherë përse njerëz si unë vijmë vullnetarisht t’ju bëjmë vizita, edhe pse e dimë që shumica e njerëzve ndoshta s’do të na mirëpresin? (Tregoji arsyen e shprehur tek Ezekieli 9:1-11, ku shpjegohet që, nga reagimi ndaj mesazhit të Mbretërisë, çdo njeriu “do t’i vihet një shenjë”, që të ruhet gjallë në shtrëngimin e madh ose që të shkatërrohet nga Perëndia.)’

● ‘Mund t’ju kuptoj, sepse edhe vetë mendoja kështu. Megjithatë, sa për t’u treguar i drejtë, një herë vendosa të dëgjoja një prej tyre. Zbulova që nuk më kishin thënë të vërtetën në lidhje me ta. (Përmend ndonjë akuzë të rreme të zakonshme, dhe pastaj shpjego çfarë besojmë ne.)’

● ‘Jo shumë kohë më parë, edhe unë iu përgjigja me po këto fjalë një Dëshmitari, që më trokiti në derë. Megjithatë, para se të ikte, i bëra një pyetje, për të cilën isha i sigurt se ai s’mund të më përgjigjej. A keni dëshirë të dini se ç’pyetje i bëra? . . . (Për shembull: ku e gjeti Kaini gruan?)’ (Këtë mund ta thonë vetëm ata që kanë pasur vërtet një përvojë të tillë.)

● ‘Nëse jeni besimtar, mund t’ju kuptoj. Pa dyshim, feja që keni, është e rëndësishme për ju. Gjithsesi, mendoj se jeni dakord që të dyve na intereson (përmend ndonjë argument të përshtatshëm).’

● ‘Atëherë, pa dyshim keni fenë tuaj. A ju vjen keq po t’ju pyes se çfarë feje keni? . . . Ne na pëlqen të flasim me njerëz të fesë suaj. Ç’mendoni për (përmend argumentin që ke zgjedhur për të folur)?’

● ‘Po, ju kuptoj. Megjithatë, arsyeja për të cilën jemi këtu është se unë dhe familja ime kemi dëshirë t’i shohim njerëzit të jetojnë në paqe. Jemi të mërzitur e të lodhur nga lajmet që çdo mbrëmje flasin për luftëra e vuajtje. Mendoj se edhe ju ndiheni njësoj. . . . Por, nga mund të vijë ndryshimi që na nevojitet? . . . Ne na kanë inkurajuar premtimet e Biblës.’

● ‘E vlerësoj që më treguat se ç’mendoni. A mund të më thoni se çfarë nuk ju pëlqen te ne? Ato që ju tregojmë nga Bibla, apo vizitat që ju bëjmë?’

‘KAM FENË TIME’

● ‘A ju vjen keq të më thoni nëse feja juaj ju ka mësuar që do të vijë një kohë, kur njerëzit që e duan drejtësinë, do të jetojnë përgjithmonë në tokë? . . . Është një mendim tërheqës, apo jo? . . . Këtë e tregon vetë Bibla. (Psal. 37:29; Mat. 5:5; Zbul. 21:4)’

● ‘Jam dakord që në këtë fushë çdo njeri duhet të vendosë personalisht. Por, a e dini që Perëndia e ka shkruar se ç’lloj njerëzish kërkon, që të jenë adhuruesit e tij të vërtetë? Vini re këtu, te Gjoni 4:23, 24. Ç’do të thotë ta adhurosh Perëndinë «me të vërtetë»? . . . A na ka dhënë Perëndia ndonjë gjë që të dimë se çfarë është e vërtetë dhe çfarë jo? . . . (Gjoni 17:17) Vëreni edhe sa e rëndësishme është kjo për ne personalisht. (Gjoni 17:3)’

● ‘A keni qenë gjithë jetën besimtar? . . . A mendoni se njerëzimi mund të bashkohet ndonjëherë në një fe të vetme? . . . Unë kam menduar shumë për këtë, i nxitur nga këto fjalë të Zbulesës 5:13. . . . Për çfarë kemi nevojë që të jemi pjesë e këtij përshkrimi?’

● ‘Shpresoja të gjeja një person si ju, që interesohet për gjërat fetare. Nuk ka shumë njerëz të tillë sot. A mund t’ju pyes ç’mendoni për premtimin e Biblës, që thotë se Perëndia do të zhdukë gjithë ligësinë dhe do ta bëjë tokën një vend, ku do të jetojnë vetëm njerëzit që e duan drejtësinë? A ju tërheq ky premtim?’

● ‘A jeni shumë aktiv në aktivitetet e kishës? . . . A mbushet kisha me njerëz gjatë shërbesave? . . . Mendoni se shumë pjesëtarë të kishës kanë një dëshirë të sinqertë për ta zbatuar Fjalën e Perëndisë në jetën e tyre të përditshme? (Ose: A mendoni që pjesëtarët e kishës janë të një mendjeje, për sa i përket zgjidhjes së problemeve botërore?) Ne mendojmë se një studim personal i Biblës në shtëpi është i dobishëm.’

● ‘Duket që jeni i kënaqur me fenë tuaj. Megjithatë, shumë njerëz nuk janë të kënaqur me kushtet e botës. Ndoshta, edhe ju vetë jeni i pakënaqur, apo jo? . . . Ku do të na shpjerë e gjithë kjo?’

● ‘Ju pëlqen të lexoni Biblën? . . . A gjeni kohë ta lexoni rregullisht?’

● ‘Faleminderit që ma thatë. Jam i sigurt se jeni dakord që, pavarësisht nga prejardhja fetare, të gjithëve na intereson të ketë paqe në botë (ose: si t’i mbrojmë fëmijët nga ndikimet e këqija; ose: të kemi komshinj që e duan vërtet njëri-tjetrin; ose: të kemi marrëdhënie të mira me të tjerët, gjë që mund të jetë një sfidë, kur të gjithë ndihen nën presion).’

● ‘Gëzohem që takoj një njeri me prirje fetare. Sot, shumë njerëz nuk e marrin seriozisht fenë. Madje, disa mendojnë se nuk ka fare Perëndi. Megjithatë, sipas asaj që juve ju kanë mësuar, ç’lloj personi mendoni se është Perëndia? . . . Shikoni se si Bibla na tregon emrin personal të Perëndisë. (Dal. 6:3; Psal. 83:18)’

● ‘Kur i dërgoi dishepujt e tij të predikonin, Jezui u tha të shkonin në çdo skaj të tokës. Në këtë mënyrë ata do të takonin shumë njerëz, feja e të cilëve ndryshonte nga e tyrja. (Vep. 1:8) Por ai e dinte se njerëzit e uritur dhe të etur për drejtësinë do të dëgjonin. Cili ishte mesazhi i veçantë, për të cilin Jezui tha se do të përhapej në kohën tonë? (Mat. 24:14) Ç’do të thotë për ne kjo Mbretëri?’

‘NE JEMI VETË TË KRISHTERË’

● ‘Më bëhet qejfi. Atëherë, pa dyshim e dini që edhe vetë Jezui kreu një vepër të tillë, duke i vizituar njerëzit nëpër shtëpi, madje edhe dishepujt i urdhëroi të bënin po njësoj. A e dini se cila ishte tema e predikimit të tyre? . . . Pikërisht për këtë kemi ardhur t’ju flasim sot. (Luka 8:1; Dan. 2:44)’

● ‘Atëherë, jam i sigurt që e kuptoni sa të rëndësishme janë fjalët e Jezuit, të thëna në Predikimin në Mal. Ai u tregua shumë i drejtpërdrejtë, por edhe i dashur, kur tha . . . (Mat. 7:21-23) Pyetja që duhet t’i bëjmë vetes është: sa mirë e njoh unë vullnetin e Atit qiellor? (Gjoni 17:3)’

‘JAM I ZËNË’

● ‘Atëherë do të flas fare shkurt. Erdha vetëm që të flitja me ju për një mendim të rëndësishëm. (Përmblidhe thelbin e bisedës vetëm me nja dy fjali.)’

● ‘Mirë atëherë. Do të kthehem me kënaqësi një herë tjetër, kur të jetë më e volitshme për ju. Megjithatë, para se të iki, kam dëshirë t’ju lexoj vetëm një shkrim, që përmban diçka vërtet të rëndësishme për të menduar.’

● ‘Ju kuptoj. Edhe unë vetë jam një mama (ose: i zënë me punë; ose: student), dhe kam plot punë. Prandaj, nuk do të zgjatem shumë. Të gjithë ne jemi përballë një situatë serioze. Bibla tregon që jemi shumë pranë kohës, kur Perëndia do ta shkatërrojë këtë sistem të lig. Megjithatë, disa do të mbijetojnë. Ç’duhet të bëjmë që të jemi mes të mbijetuarve? Bibla na jep përgjigjen. (Sof. 2:2, 3)’

● ‘T’ju them të drejtën, tamam kjo është arsyeja e vizitës sime. Të gjithë jemi të zënë, madje aq të zënë, sa ndonjëherë lëmë pas dore edhe ato gjëra që kanë vërtet rëndësi në jetë, apo jo? . . . Do të flas shumë shkurt, megjithatë besoj se do t’ju interesojë ky shkrim. (Luka 17:26, 27) Askush nga ne nuk do të donte të gjendej në një situatë të tillë, prandaj, edhe pse jeta jonë është shumë e ngarkuar, kemi nevojë të shqyrtojmë çfarë thotë Bibla. (Ofroji një botim.)’

● ‘A do të ishte më mirë për ju, po të ktheheshim pas gjysmë ore, sa të vizitojmë disa shtëpi të tjera?’

● ‘Atëherë, s’po ju vonoj. Ndoshta kthehem një ditë tjetër. Megjithatë, para se të iki, kam dëshirë t’ju jap këtë botim të veçantë. (Tregoji botimin që ofrohet për atë muaj.) Me anë të këtij botimi mund të filloni një studim, i cili do t’ju njohë me përgjigjet që u jep vetë Bibla pyetjeve të tilla, si (përmend një apo dy).’

● ‘Më vjen keq që erdha në një çast të papërshtatshëm. Siç mund ta dini, unë jam një Dëshmitar i Jehovait. Desha të shqyrtonim bashkë një mendim të rëndësishëm nga Bibla. Por, meqë tani nuk keni kohë, po ju lë vetëm këtë fletushkë, e cila flet për (thuaj temën). S’do shumë kohë që të lexohet, megjithatë, do ta shihni se është mjaft interesante.’

● ‘Mund t’ju kuptoj shumë mirë. Duket vërtet sikur koha s’mjafton për të bërë gjithçka. Megjithatë, a keni menduar se sa e ndryshme do të ishte jeta, sikur të jetonit përgjithmonë? E di që kjo mund të duket e çuditshme, megjithatë më lejoni t’ju tregoj vetëm një shkrim nga Bibla, që tregon se si bëhet e mundur një gjë e tillë. (Gjoni 17:3) Kështu pra, tani kemi nevojë të marrim këtë njohuri për Perëndinë dhe Birin e tij. Për këtë arsye, po ju lëmë këtë botim.’

‘PËRSE VINI KAQ SHPESH?’

● ‘Sepse besojmë që po jetojmë në ditët e fundit, për të cilat flitet në Bibël. Ne mendojmë se është e rëndësishme që të gjithë të mbajmë parasysh se ç’përfundim do të kenë kushtet e tanishme. (Përmend nja dy ngjarje a situata të kohëve të fundit.) Pyetja që lind, është: ç’duhet të bëjmë, nëse duam të mbijetojmë në fund të këtij sistemi?’

● ‘Sepse e duam Perëndinë dhe njerëzit. Kështu duhet të bëjnë të gjithë, apo jo?’

‘TASHMË E NJOH SHUMË MIRË VEPRËN TUAJ’

● ‘Më vjen mirë që i dëgjoj këto fjalë. Mos keni ndonjë shok të ngushtë a familjar që është Dëshmitar? . . . Nëse mund t’ju pyes: a e besoni atë që ne u mësojmë të tjerëve nga Bibla, domethënë, se po jetojmë «në ditët e fundit», se së shpejti Perëndia do t’i shkatërrojë të ligjtë, dhe se kjo tokë do të kthehet në një parajsë, ku njerëzit mund të jetojnë përgjithmonë, me një shëndet të përsosur, të rrethuar nga fqinj që e duan vërtet njëri-tjetrin?’

‘S’KEMI PARA’

● ‘S’jemi këtu për të mbledhur fonde. Përkundrazi, po ju ofrojmë një kurs falas për studimin e Biblës në shtëpi. Për shembull, një nga temat e këtij kursi flet për (lexo titullin e ndonjë kapitulli nga botimi që po përdor). A mund t’jua tregoj për pak minuta se si bëhet? S’do t’ju kushtojë asnjë qindarkë.’

● ‘Ne na interesojnë njerëzit, jo paratë. (Vazhdo bisedën. Tregoji një nga botimet, dhe shpjegoji se ç’dobi mund të nxjerrë. Nëse shfaq interes të sinqertë dhe premton se do ta lexojë, lërja botimin. Po të jetë e përshtatshme, shpjego si financohet vepra jonë ndërkombëtare e predikimit.)’

KUR DIKUSH THOTË: ‘JAM BUDIST’

● Mos dil në përfundimin se bindjet e atij personi janë të ngjashme me ato të budistëve të tjerë. Mësimet budiste janë të vagëta, dhe interpretimi ndryshon nga personi në person. Budizmi japonez është krejt i ndryshëm nga budizmi i Azisë Juglindore. Edhe pikëpamjet e njerëzve ndryshojnë. Gjithsesi, në vija të përgjithshme, pikat e mëposhtme mund të jenë të dobishme: (1) Budizmi nuk njeh një Perëndi ose një Krijues si person. Shumë budistë adhurojnë shëmbëlltyra dhe relike të Budës. (2) Siddhartha Gautama, personi që mori titullin Budë, u konsiderua nga ithtarët e tij si ideali fetar për t’u imituar. Ai nxiste arritjen e ndriçimit përmes studimit të njerëzimit nga një pikëpamje njerëzore, si dhe shkuljen e rrënjëve të vuajtjes, duke kontrolluar mendjen, për të eliminuar çdo dëshirë tokësore. Ai mësonte se në këtë mënyrë një person mund të arrijë Nirvanën, lirinë nga cikli i rilindjeve të transmigrimit. (3) Budistët adhurojnë të parët e tyre, sepse i konsiderojnë si burimin e jetës.

Sugjerime për biseda: (1) Kur të flasësh me budistë, thekso se ti nuk bën pjesë në të ashtuquajturin krishterim. (2) Budistët i respektojnë «librat e shenjtë», dhe për këtë arsye, në përgjithësi, ata e respektojnë Biblën. Në vend që të përqendrohesh në filozofinë budiste, prezanto mesazhin pozitiv të Biblës. Bëju të ditur se Bibla nuk përmban thjesht filozofi njerëzore, por është Fjala plot autoritet e Krijuesit të njerëzimit, Perëndisë Jehova. Pyeti me mirësjellje nëse mund t’u tregosh një pikë interesante nga ky libër i shenjtë, Bibla. (3) Shumë budistë janë thellësisht të interesuar për paqen e për jetën familjare, dhe dëshirojnë të bëjnë jetë të moralshme. Bisedat rreth këtyre çështjeve janë shpesh të mirëpritura. (4) Tregoju se Bibla flet për një qeveri të drejtë qiellore, që do të sundojë tokën, e cila do të jetë zgjidhja e vërtetë e problemeve të njerëzimit. Ajo shpjegon të ardhmen e tokës dhe perspektivën e mrekullueshme të jetës së përhershme në parajsën tokësore. (5) Mund të theksosh se Bibla shpjegon origjinën e jetës, domethënien e saj, gjendjen e të vdekurve, shpresën e ringjalljes dhe arsyen përse ekziston ligësia. Zemra e personave ngjashëm deleve do t’i përgjigjet me çmueshmëri kësaj paraqitjeje me mirësjellje të të vërtetave të Fjalës së Perëndisë.

Broshura Në kërkim të një Ati (anglisht) është përgatitur veçanërisht për dobinë e budistëve të sinqertë.

KUR DIKUSH THOTË: ‘JAM HINDUIST’

● Mbaj parasysh që filozofia hinduiste është shumë e ndërlikuar dhe nuk përputhet me logjikën normale. Mund ta kesh më të lehtë, po të mbash ndër mend pikat e mëposhtme: (1) Hinduizmi mëson se perëndia Brahman përfshin tri forma: Brahma Krijuesin, Vishnu Ruajtësin, dhe Siva Shkatërruesin. Megjithatë, hinduistët nuk e mendojnë Perëndinë si një person me një ekzistencë më vete. (2) Hinduistët besojnë se të gjitha objektet në natyrë zotërojnë një shpirt që nuk vdes kurrë; se shpirti përjeton një cikël pothuajse të pafund rimishërimesh; se format në të cilat rilind, përcaktohen nga veprat që ka bërë (Karma); se çlirimi nga ky «rrotullim pa fund» është i mundur vetëm po të zhdukësh çdo dëshirë fizike; dhe se, po të arrihet kjo, shpirti do të shkrihet me frymën universale. (3) Përgjithësisht, hinduistët i respektojnë fetë e tjera. Ata besojnë se të gjitha fetë të çojnë tek e njëjta e vërtetë, pavarësisht nga fakti që mësojnë doktrina kontradiktore.

Në vend që të përpiqesh të merresh me filozofinë e ndërlikuar hinduiste, paraqit të vërtetat e kënaqshme të Biblës së Shenjtë. Masat e dashura që ka marrë Jehovai për jetën, vlejnë për njerëz të çdo lloji, dhe të vërtetat e pastra të Fjalës së tij do t’u prekin zemrën atyre që janë të etur për drejtësi. Vetëm Bibla përmban një shpresë vërtet të besueshme për të ardhmen; vetëm Bibla u jep përgjigje vërtet të kënaqshme pyetjeve të rëndësishme me të cilat përballet gjithë njerëzimi. Jepu mundësinë t’i dëgjojnë këto përgjigje. Është interesante që himni hinduist, Rig-Veda, 10. 121, titullohet «Perëndisë së panjohur». Në disa raste mund të jetë e përshtatshme t’i referohesh këtij himni, ashtu siç iu referua apostulli Pavël altarit të «Një Perëndie të Panjohur» në Athinë. (Vep. 17:22, 23) Interesant është edhe fakti që emri i perëndisë hinduiste Vishnu, pa digamën, është Ish-nuh, që në gjuhën kaldease do të thotë «njeriu Noe». Trego se çfarë thotë Bibla për domethënien e Përmbytjes globale të ditëve të Noesë. Ata që janë të munduar nga perspektiva e një cikli të pafund rimishërimesh, mund të ndihmohen nga materiali që gjendet në faqet 322, 323, te tema «Rimishërimi».

Librezat Shtegu i së vërtetës hyjnore që të çon në çlirim (anglisht) dhe Nga Kurukshetra në Harmagedon: dhe mbijetesa juaj (anglisht), përmbajnë informacione shumë të vlefshme për hinduistët e sinqertë.

KUR DIKUSH THOTË: ‘JAM JUDE’

● Së pari, sigurohu se në ç’kuptim ai person e quan veten jude. Vetëm pak judenj janë fetarë. Për shumicën prej tyre, të jesh jude është thjesht një përcaktim etnik.

Ja disa pika që është mirë t’i mbash ndër mend: (1) Judenjtë fetarë e konsiderojnë të ndaluar shqiptimin e emrit të Perëndisë. (2) Për shumë judenj «Bibla» është një libër i krishterë, kurse po të përdorësh terma të tillë, si «Shkrimet Hebraike», «Shkrimet» ose «Tora», nuk do ta kenë problem. (3) Tradita është një pjesë thelbësore e besimit të tyre, dhe shumë judenj fetarë e konsiderojnë atë si të ketë autoritet të barabartë me Shkrimet. (4) Ata mund ta lidhin Jezu Krishtin me përndjekjen brutale që përjetuan judenjtë nga i ashtuquajturi krishterim, në emër të Jezuit. (5) Shpesh, ata besojnë që Perëndia kërkon nga judenjtë të mbajnë Sabatin, besim i cili përfshin mospërdorimin e parave në atë ditë.

Që të vendosësh një bazë të përbashkët, mund të thuash: (1) ‘Sigurisht që jeni dakord se, pavarësisht nga prejardhja jonë, në botën e sotme, të gjithë përballemi me të njëjtat probleme. A besoni se do të ketë vërtet ndonjë zgjidhje të përhershme për problemet e mëdha që po has ky brez? (Psal. 37:10, 11, 29; 146:3-5; Dan. 2:44)’ (2) ‘Ne s’jemi pjesë e të ashtuquajturit krishterim, dhe nuk besojmë te Triniteti. Përkundrazi, adhurojmë Perëndinë e Abrahamit. Jemi veçanërisht të interesuar për çështjen e së vërtetës fetare. A mund t’ju pyes si e përcaktoni ju se ç’është e vërtetë, duke u nisur sidomos nga fakti që mes judenjve ka dallime të mëdha në bindjet e tyre? . . . (Ligj. 4:2; Isa. 29:13, 14; Psal. 119:160)’ (3) ‘Ne jemi thellësisht të interesuar për premtimin që Perëndia i bëri Abrahamit, se përmes farës së tij do të arrijnë të marrin bekime të gjitha kombet. (Zan. 22:18)’

Po të jetë që personi shprehet se nuk beson te Perëndia, pyete nëse ka menduar gjithnjë kështu. Pastaj, mund të diskutoni përse Perëndia ka lejuar ligësinë dhe vuajtjet. Për shkak të kujtimeve të holokaustit nazist, shumë judenj janë të interesuar për këtë temë.

Nëse bisedoni për rëndësinë e përdorimit të emrit të Perëndisë, fillimisht zbulo se ç’mendon personi për këtë. Thekso që Dalja 20:7 ndalon të zësh në gojë kot emrin e Perëndisë, por nuk ndalon përdorimin e tij me respekt. Pastaj, arsyeto në lidhje me shkrime të tilla, si: Dalja 3:15 (ose Psalmi 135:13); 1 Mbretërve 8:41-43; Isaia 12:4; Jeremia 10:25; Malakia 3:16.

Kur të diskutoni për temën e Mesisë: (1) Së pari, fol për bekimet e ardhshme nën sundimin e tij, dhe jo për identitetin e tij. (2) Pastaj, arsyeto në lidhje me shkrimet që flasin për Mesinë si person. (Zan. 22:17, 18; Zak. 9:9, 10; Dan. 7:13, 14) (3) Mund të jetë e nevojshme të flasësh për dy ardhjet e Mesisë. (Krahaso Danielin 7:13, 14 me Danielin 9:24-26.) (4) Kur të flasësh për Jezuin, përmende në një kontekst që thekson natyrën progresive të qëllimit të Perëndisë. Përmend faktin që, kur Jezui mësonte, ishte afër koha kur Perëndia lejoi që tempulli i dytë të shkatërrohej, për të mos u rindërtuar kurrë më. E megjithatë, Jezui e vuri theksin te plotësimi i Ligjit dhe i fjalëve të Profetëve, si dhe tek e ardhmja e lavdishme drejt së cilës këto do t’i drejtonin njerëzit me besim.