Adhurimi i vërtetë po përhapet në Evropën Lindore
1 Të krishterët e shekullit të parë ishin predikues të zellshëm të Mbretërisë. Ata gëzoheshin kur kongregacionet ‘rriteshin në numër nga dita në ditë’. (Veprat 16:5, BR) Predikimi i tyre i guximshëm bëri që adhurimi i vërtetë të mbërrinte në Azi, në Afrikë dhe në Evropë, duke sjellë si rezultat një korrje të pasur besimtarësh.
2 Në këtë kohë të fundit, adhurimi i vërtetë vazhdon të përhapet veçanërisht në vendet e Evropës Lindore. Në vendet ku, deri në fillim të viteve 90, vepra ishte nën kufizimin e vënë nga qeveria, tani po përjetojmë një rritje të shkëlqyer. Libri vjetor 1999 (angl.) tregon se dy prej këtyre vendeve, Rusia dhe Ukraina, raportuan secila mbi 100.000 lajmëtarë që marrin pjesë në shërbimin publik. Në të 15 territoret e ish-Bashkimit Sovjetik, që nga viti 1991, mbi 220.000 persona i janë dedikuar Jehovait dhe janë pagëzuar! Kjo rritje e shpejtë bëri të nevojshme që të ndërtohen shumë Salla të reja të Mbretërisë dhe salla asamblesh, si edhe që të zgjerohen disa ndërtesa të degës.
3 Siç u njoftua në Shërbimi ynë i Mbretërisë, mars 1997, një pjesë e fondit të Shoqatës për Sallën e Mbretërisë, tani po përdoret për t’u dhënë hua kongregacioneve në vendet ku ekziston një nevojë shumë urgjente për më shumë salla mbretërie, por ku burimet financiare janë të kufizuara dhe ka probleme të rënda ekonomike. Gjatë periudhës mars 1996 deri tetor 1998, Shoqata ka aprovuar dhënien e huasë për 359 Salla të Mbretërisë, të kërkuar nga zyrat e degës që mbikëqyrin 11 vende të Evropës Lindore. Fondet e siguruara nga kontributet, po përdoren për të blerë tokë dhe materiale të nevojshme për ndërtimin e Sallave të reja të Mbretërisë, si edhe për të ndihmuar kongregacionet që të rimodelojnë ndërtesat ekzistuese. Fotografitë e treguara këtu, na japin një ide të asaj se si kontributet për Fondin e Shoqatës për Sallën e Mbretërisë në Shtetet e Bashkuara dhe në vendet e tjera, u kanë sjellë dobi vëllezërve tanë në Evropën Lindore.
4 Gjatë vitit 1998, Bullgaria përjetoi një rritje me 12 për qind dhe vëllezërit ishin kaq të emocionuar kur në prill të këtij viti, u dedikua Salla e tyre e parë e Mbretërisë. Kroacia gëzoi një rritje me 4 për qind dhe sot, vëllezërit në këtë vend, po ndërtojnë më shumë salla mbretërie për të çuar përpara adhurimin e vërtetë. Në Hungari, 144 kongregacione përdorin rreth 80 Salla të Mbretërisë. Kjo do të thotë se nga 235 kongregacionet në këtë vend, 61 për qind kanë vendin e tyre të adhurimit. Në Maqedoni, sipas programit të ndërtimit të Sallave të Mbretërisë, përfunduan dy salla të reja dhe të tjera akoma janë në përfundim e sipër. Në verë të vitit 1999, në Shkup, kryeqytetin e Maqedonisë, përfundoi një ndërtesë me dy Salla të Mbretërisë. Ajo ka një kapacitet të tillë që mund t’u shërbejë të paktën 6 kongregacioneve.
5 Vitin e kaluar, në Rusi pagëzoheshin mesatarisht çdo javë mbi 260 persona! Duke ndjekur shembullin e vendeve të tjera, tani Dega e Rusisë ka organizuar 12 komitete ndërtimi rajonale në të gjithë territorin e saj të gjerë, për të mbështetur projektet e ardhshme të ndërtimit të Sallave të Mbretërisë. Në pjesën më veriore të S. Pjetrogradit, po ndërtohet e para Sallë Asambleje për këtë vend, e cila do të ketë 1.600 vende. Ndërtesa do të përfshijë edhe pesë salla mbretërie me 200 vende secila. Për t’u shërbyer nevojave frymore të vëllezërve tanë, si edhe të shumë personave të interesuar në Ukrainë, janë përfunduar 84 Salla të Mbretërisë dhe 80 të tjera janë në ndërtim e sipër.
6 A nuk na gëzon zemrën kjo rritje në Evropën Lindore? Pavarësisht se ku jetojmë, përhapja e adhurimit të vërtetë na kujton se Perëndia nuk është i anshëm dhe se durimi i tij do të thotë shpëtim për «një shumicë të madhe». (Zbu 7:9, BR; 2 Pj 3:9) Çfarë privilegji për ne të kemi një pjesë të vogël në këtë kontribut që jepet për rritjen frymore të të tjerëve, madje dhe të atyre në vendet e largëta! Fjalët e urta 28:27 na siguron se «ai që i jep të varfërit nuk do të ketë kurrë nevojë». Gatishmëria jonë për të ndihmuar në mbulimin e kostos së këtyre ndërtimeve, sjell si rezultat «një barazi» në gjërat materiale, duke u dhënë mundësi të gjithëve të përjetojnë lumturinë që vjen nga dhënia dhe gëzimin që lind duke parë adhurimin e vërtetë ndërsa përhapet në mbarë botën.—2 Kor 8:14, 15; Vep 20:35.
[Figura në faqen 3]
Săkele, Rumani
[Figura në faqen 3]
Maardu, Estoni
[Figura në faqen 3]
Sevnica, Slloveni
[Figura në faqen 3]
Tiszavasvári, Hungari
[Figurat në faqen 4]
Jūrmala, Letoni
[Figurat në faqen 4]
Talin, Estoni
[Figura në faqet 4, 5]
Taurage, Lituani
[Figurat në faqet 4, 5]
Beograd, Jugosllavi
[Figurat në faqen 5]
Prievidza, Sllovaki
[Figura në faqen 5]
Mátészalka, Hungari
[Figurat në faqen 6]
Vranov nad Topl’ou, Sllovaki
[Figura në faqen 6]
Ruma, Jugosllavi
[Figurat në faqen 6]
Tornakalns, Letoni