2 | ‘Ngushëllimi nga Shkrimet’

BIBLA THOTË: «Gjithçka që u shkrua kohë më parë, u shkrua për mësimin tonë, që, me anë të qëndrueshmërisë sonë dhe me anë të ngushëllimit nga Shkrimet, të kemi shpresë.»—ROMAKËVE 15:4.

Ç’do të thotë ky shkrim

Bibla ka mendime ngushëlluese që na japin forcën dhe qëndrueshmërinë e nevojshme për t’i bërë ballë mënyrës negative të të menduarit. Gjithashtu mesazhi i saj na jep shpresë se dhembjet emocionale së shpejti do t’i përkasin së shkuarës.

Si na ndihmon

Të gjithë ne ndonjëherë ndihemi të dëshpëruar; por ata që vuajnë nga depresioni ose ankthi nuk gjejnë paqe nga lufta e përditshme që mund të kenë me emocionet e dhembshme. Si mund të ndihmojë Bibla?

Në Bibël gjejmë shumë mendime pozitive që mund të zëvendësojnë ato negativet. (Filipianëve 4:8) Ajo na mbush mendjen me mendime ngushëlluese e qetësuese që na ndihmojnë t’i mbajmë nën kontroll emocionet.—Psalmi 94:18, 19.
Bibla na ndihmon të luftojmë mendimin se jemi të pavlerë.—Luka 12:6, 7.
Mjaft fragmente të Biblës na sigurojnë se nuk jemi vetëm dhe se Perëndia, Krijuesi ynë, i kupton plotësisht ndjenjat tona.—Psalmi 34:18; 1 Gjonit 3:19, 20.
Bibla premton se Perëndia do t’u japë fund kujtimeve të dhembshme. (Isaia 65:17; Zbulesa 21:4) Kur vuajmë nga ndjenja dhe mendime frikësuese, ky premtim mund të na japë forcë të mos dorëzohemi.

Ndihmë nga Bibla: Xhesika

Si ndikon depresioni tek unë

«Kur isha 25 vjeçe, pësova një krizë nervore dhe u diagnostikova me depresion të rëndë. Kujtimet e hidhura që më vinin papritur, më torturonin. Mjekët më ndihmuan të kuptoja se depresioni im kishte lidhje me mënyrën negative të të menduarit, që shkaktohej nga ngjarje traumatike të jetës sime. Përveç mjekimit të duhur, kisha nevojë për terapi që të identifikoja e të ndreqja mënyrën e dëmshme të të menduarit.»

Si më ndihmon Bibla

«Në momentet më të zymta të depresionit, kaloja kriza paniku, ankth të jashtëzakonshëm dhe pagjumësi. Shpesh gjatë natës mbytesha nga mendime torturuese që më vërshonin në kokë. Siç thotë Psalmi 94:19, Perëndia na ngushëllon dhe na e ledhaton shpirtin kur na mbytin mendimet turbulluese. Prandaj, pranë krevatit, mbaja Biblën dhe një bllok me shkrime inkurajuese. Kur s’më zinte gjumi, lexoja disa vargje nga Bibla, dhe kështu lejoja që mendimet e Perëndisë të më ngushëllonin.

Bibla na nxit t’i hedhim poshtë mendimet që bien ndesh me njohurinë që kemi për Perëndinë. Në të shkuarën, isha e bindur se isha e pavlerë, e padobishme dhe se nuk e meritoja të më donin. Por kam kuptuar se bindje të tilla janë në kundërshtim me Biblën, e cila e paraqet Perëndinë si një Atë të dashur e të dhembshur, që merakoset për ne individualisht. Dalëngadalë kam filluar t’i mbaj nën kontroll mendimet në vend që të më kontrollojnë ato mua. Kam mësuar ta shoh veten siç më sheh Perëndia. Ky ishte një hap i rëndësishëm për të flakur tej pikëpamjen negative që kisha për veten.

Mezi pres kohën kur kujtimet e dhembshme dhe mënyra e dëmshme e të menduarit do të zhduken. Dijenia se çrregullimet mendore nuk do të ekzistojnë më, më jep forcën të përballoj tani kufizimet e mia dhe shpresën e mrekullueshme të së ardhmes kur lufta ime me depresionin më në fund do të mbarojë.»