Kutia e pyetjes

◼ A janë të detyruar lajmëtarët dhe pionierët të kontribuojnë për veprën mbarëbotërore sa herë marrin literaturë për në shërbim në Sallën e Mbretërisë?

Jo. Lajmëtarët mund të kontribuojnë për të mbështetur veprën mbarëbotërore sipas mundësisë dhe dëshirës, kurdo që zgjedhin ta bëjnë këtë.​—2 Kor. 8:10-15; 9:6-14.

Disa lajmëtarë kanë zgjedhur të kontribuojnë kur marrin literaturë. Këtë e bëjnë ngaqë kjo u kujton në mënyrë të përshtatshme privilegjin dhe përgjegjësinë që të mbështetin rregullisht veprën mbarëbotërore. Të tjerë bëjnë kontributin e tyre kur hedhin në kuti kontributet që u kanë dhënë të interesuarit në shërbim. Shumë kanë vendosur të kontribuojnë një shumë të caktuar çdo javë. Kurse disa të tjerë lënë mënjanë çdo muaj një shumë parash për veprën mbarëbotërore, pikërisht siç bëjnë edhe me shpenzimet për Sallën e Mbretërisë.

Pavarësisht se kur kontribuojmë, çdonjëri prej nesh duhet të vendosë çfarë mund të japë në mbështetje të veprës mbarëbotërore. Kjo dhënie duhet bërë rregullisht sipas mbarësisë që ka secili. (1 Kor. 16:2) Kur bëjmë kontribute të tilla, duhet të mbajmë parasysh se nuk po kontribuojmë thjesht për të mbuluar koston e literaturës, por për të mbështetur të gjitha aspektet e veprës mbarëbotërore.