Të drejtojmë studime biblike me librin Të jetosh përgjithmonë

¹ Duke iu referuar librit Të jetosh përgjithmonë, një grua ka thënë: «Pas Biblës, ky është libri më i saktë, frymëzues dhe argumentues që kam lexuar ndonjëherë.» E pranojmë të gjithë që ky është një nga librat më të mirë që janë botuar për të ndihmuar njerëzit që të kuptojnë Biblën dhe kryesisht për t’i nxitur që të bëhen lavdërues aktivë të Jehovait.

² Gjatë vitit të shërbimit 1992, kur u vu në dispozicion libri Të jetosh përgjithmonë, në gjuhën shqipe, kishte një mesatare prej 35 lajmëtarësh që drejtonin 14 studime biblike. Tani ka më tepër se 125 lajmëtarë që drejtojnë më shumë se 262 studime biblike. Gjer më sot janë shtypur 62 milion kopje të librit Të jetosh përgjithmonë, në 115 gjuhë. Ky libër po luan një rol me të vërtetë të dukshëm në veprën tonë botërore.

³ Vini pikësynime: Kjo rritje e jashtëzakonshme është rezultat i bekimit të Jehovait dhe e dëshirës së gjallë të popullit të tij për të ndihmuar personat e sinqertë duke u dërguar atyre mesazhin jetëshpëtues të Biblës. (Rom. 10:13-15; 1. Tim. 2:4) Ne e njohim urgjencën e kohërave dhe nevojën për të shpallur me zell Mbretërinë e Perëndisë.

⁴ Sigurisht që organizata përparon, por çfarë të themi për ne individualisht? A jemi të vendosur që të marrim pjesë plotësisht në veprën jetësore të bërjes së dishepujve? Për ta bërë duhet të vëmë pikësynime personale. A mund të jemi më të zellshëm për të kultivuar interes? Përse të mos vëmë për pikësynim që në maj të fillojmë një studim të ri biblik?

⁵ Kush mund të drejtojë studime biblike?: Lajmëtarë të çdo shtrese shoqërore kanë qenë të gëzuar që të drejtojnë një studim biblik me librin Të jetosh përgjithmonë. Thjeshtësia me të cilën është shkruar ky libër e lehtëson detyrën e drejtuesit duke u dhënë mundësi edhe lajmëtarëve më të rinj të marrin pjesë në këtë vepër të rëndësishme. Përveç kësaj shumë prej nesh e kanë studiuar personalisht, kështu që e njohin mirë përmbajtjen e tij. Një lajmëtar që para se të përdorte librin Të jetosh përgjithmonë nuk kishte drejtuar kurrë ndonjë studim biblik ka shkruar: «Kam tre studime dhe jam duke filluar një të katërt. Nuk di si t’ju falenderoj që e keni bërë kaq të lehtë drejtimin e studimeve biblike.»

⁶ Edhe të rinjtë marrin pjesë aktivisht në veprën e studimeve biblike duke përdorur librin Të jetosh përgjithmonë. Një vëlla i ri e la librin mbi bankën e shkollës. Kjo ka bërë të mundur fillimin e bisedave të bukura dhe të studimeve të ndryshme biblike. Disa të rinj përdorin mënyrën direkte duke u kërkuar leje prindërve që takojnë në shërbimin derë më derë për të studiuar Biblën me fëmijët e tyre. Fëmijët tanë nuk janë kurrë tepër të vegjël për të folur mbi premtimin e Jehovait, për jetën e përhershme mbi një tokë parajsore.

⁷ Si të rinjtë edhe të moshuarit, një nga gëzimet më të mëdha që mund të kenë në shërbim është drejtimi i një studimi biblik në shtëpi. Le të kërkojmë pra personalisht ndihmën e Jehovait në lutje dhe të shfrytëzojmë çdo mundësi për të shpallur shpresën tonë publikisht. Të përdorim librin Të jetosh përgjithmonë për t’i ndihmuar të tjerët që të kuptojnë si mund ta lavdërojnë edhe ata Perëndinë tonë Jehova.—Psalmi 148:12, 13.