Dee soni dee Mateosi sikifi
22 Hën Jesosi toona tei wan woto u lei de soni. A taa: 2 „Di Tii u Gadu di dë a liba ala, dë kuma wan könu di seeka wan gaan tööu piizii da di womi mii fëën. 3 Hën a manda dee saafu fëën u de go kai dee sëmbë dee a bi kai a fesi, u de ko a di tööu, ma de an bi kë ko. 4 A toona manda woto saafu u go kai de. A piki de taa: ’Piki dee sëmbë dee mi bi kai taa: „Mi seeka soni u njan. Dee kau ku dee woto mbeti u mi dee u bi kiija buta naandë tuu seeka boi kaa. Un ko a di piizii.”’ 5 Ma dee sëmbë an bi pena dë a di soni dë. So u de go a de goon dendu, wotowan go du woto wooko u de. 6 Nöö dee wotowan kisi dee saafu u di könu, hën de fon de, hën de kii de.
7 Hën di könu hati boonu te na soni, hën a manda dee sodati fëën u de go kii dee sëmbë dee bi kii dee saafu fëën, hën a suti faja a di köndë u de tjuma gbegedee. 8 Hën a piki dee saafu fëën taa: ’Hii soni seeka fuu hoi di tööu piizii, ma dee sëmbë dee mi bi kai an bi fiti u de ko a di piizii aki. 9 Wë un sabi ö, un go a dee gaan pasi ku dee pikiwan tuu, nöö un kai hiniwan sëmbë di un si u de ko a di piizii.’ 10 Hën dee saafu go a dee sitaati, hën de kai hii sëmbë di de si kaa, bunuwan ku hogiwan tuu. Hën de tja de ko a di piizii te di wosu fuu pöö ku sëmbë.
11 Di di könu ko luku ambë ku ambë ko a di tööu piizii, hën a si wan womi ko dë di an bisi tööu bisi. 12 Hën di könu piki di womi taa: ’Womi o, unfa a waka i ko aki söndö tööu lai?’ Hën di womi dë piii, an sa piki na wan soni. 13 Hën di könu piki dee saafu fëën taa: ’Un tai hën maun ku hën futu, nöö un vindëën go a döö a dungudungu ala. Ala a o dë ta këë ta njan tanda.’
14 Gadu kai sömëni sëmbë, ma wantu u de nöö a ta tei.”
15 Hën dee Faliseima go a së go kai kuutu luku unfa de o du feni Jesosi kisi tai ku fan. 16 Hën de manda dee bakama u de makandi ku dee bakama u di paatëi u Helodi, u de go piki Jesosi taa: „Mësitë o, u sabi taa i ta taki tuutuu soni, nöö i ta lei u soni u Gadu gbelingbelin kumafa de dë. Söseei ja ta suku bunu në a sëmbë. Biga ja ta luku fesi. 17 Wë nöö piki u baa, unfa i si di soni aki? A fiti u paka di Gaan könu u Loomë lantimöni ö, naa an fiti u pakëën?” 18 Ma u di Jesosi bi sabi taa hogi de bi ta pakisei, mbei a bi taki taa: „Un dee bödjëëma aki! Faandi mbei un ta suku mi u tai ku fan? 19 Un lei mi di möni di un ta paka lanti i si.” Hën de tja wan soofu möni* ko dëën. 20 Hën a piki de taa: „Ambë abi di në ku di fesi di dë a di möni liba aki?” 21 Hën de taa: „Di Gaan könu.” Hën Jesosi piki de taa: „Wë nöö un da könu di soni di dë u könu, nöö un da Gadu di soni di dë u Gadu.” 22 Di de jei andi a taki, hën a bigi da de seei, nöö hën de go u de.
23 Di daka dë seei, hën dee Saduseima ko nëën. Dee sëmbë aki an bi ta biibi taa dëdë sëmbë sa toona weki ko a libi baka. Hën de hakisi ën taa: 24 „Mësitë o, Mosesi bi taki taa: ’Ee wan womi dëdë söndö u pai miii, nöö di baaa fëën musu tööu ku di mujëë fëën, nöö a musu pai mii ku ën da di baaa fëën.’ 25 Wë nöö de bi dë seibi baaa a u mindi aki. Nöö hën di gaanwan tööu. Te wan pisi a ko lasi libi, ma hën ku di mujëë fëën an bi pai möönsö. Hën di baaa fëën tööu ku di mujëë. 26 Te wan pisi hënseei ko lasi libi, ma hën ku di mujëë an bi pai möönsö. Nöö sö hii dee seibi baaa tööu ku di mujëë, ma na wan u de pai miii ku ën möönsö. 27 Te u kaba fëën, hën di mujëë seei ko lasi libi tu. 28 Wë nöö ee dee seibi baaa aki o toona ko a libi baka, nöö undi u dee seibi baaa o abi di mujëë? Biga de tuu bi tööu ku ën.”
29 Hën Jesosi piki de taa: „Wan ta fusutan di soni bumbuu. Wan ta fusutan andi sikifi a di Wöutu u Gadu, söseei wan sabi di kaakiti di Gadu abi tu. 30 Biga te sëmbë dëdë toona weki, nöö de an o tööu möön e, ma hii sëmbë tuu o dë kuma dee basia u Gadu dee dë a liba ala. 31 Wan bi lesi andi Gadu bi taki a fesi u dee sëmbë dee o weki ko a libi baka u? A bi taki taa: 32 ’Mi da di Gadu u Abahamu, di Gadu u Isaki ku di Gadu u Jaköpu.’ An dë di Gadu u dee sëmbë dee dëdë, ma a dë di Gadu u dee sëmbë dee dë ku libi.” 33 Di dee hia sëmbë dee bi sai dë jei andi Jesosi taki, nöö a bi bigi da de seei.
34 Di dee Faliseima jei taa dee Saduseima an bi sa toona piki di fan u Jesosi, hën de hai ko miti a wan. 35 Hën wan u de di bi sabi dee Wëti u Mosesi finifini, ko hakisi Jesosi taa: 36 „Mësitë o, undi u dee wëti da di möön gaanwan?” 37 Hën a piki ën taa: „’I musu lobi Jehoufa* i Gadu ku hii i hati, ku hii i libi, söseei ku hii i fusutan.’ 38 Di wëti aki da di möön gaanwan, söseei a dë di fosuwan. 39 Di u tu wëti da: ’I musu lobi wotowan kumafa i lobi iseei.’ 40 Hii dee Wëti ku dee soni di dee tjabukama bi sikifi tuu kumutu a dee tu wëti aki.”
41 Jesosi hakisi dee Faliseima dee bi sai dë taa: 42 „Andi un ta mëni u di Keesitu? Ambë mii a dë?” Hën de piki ën taa: „A dë wan bakamii u Dafiti.” 43 Hën Jesosi hakisi de taa: „Nöö unfa a waka taa di kaakiti u Gadu bi mbei Dafiti kai ën Masa? A bi taki taa: 44 ’Jehoufa* taki da mi Masa taa: ’Ko sindo a mi leti së maun u te mi buta dee felantima fii a i basu futu.’’ 45 Wë ee Dafiti ta kai ën Masa, nöö unfa a sa dë mii fëën?” 46 Na wan u de bi saanfa u piki ën möönsö. Nöö sensi di daka dë, na wan u de bi a’ hati u go hakisi ën soni möön.