Dee soni dee Mateosi sikifi
8 Di Jesosi bazia di kuun, hën gaan hia sëmbë bigi ta waka nëën baka. 2 Te wan pisi, hën wan womi di bi abi kököbë ko nëën, hën a tjökö kini a goon nëën fesi, hën a taa: „Masa o, ee i kë, nöö i mbei mi ko bëtë* baa.” 3 Hën Jesosi tëndë maun panjëën, hën a taa: „Aai, mi kë! Ko bëtë.” Nöö hën wantewante dë a ko bëtë. 4 Baka di dë, hën Jesosi piki ën taa: „Na konda di soni aki da na wan kodo sëmbë e. Ma go a di begima be a luku i, nöö i tja di soni di dee Wëti u Mosesi bi taki taa wan sëmbë di ko limbo musu tja go tjuma da Gadu, be de si taa i bëtë tuutuu.”
5 Di a dou a Kapënaumi, hën wan hedima u sodati ko nëën, hën a begi ën faa heepi di wookoma fëën. 6 A taa: „Masa o, di wookoma u mi dë a wosu kandikandi, a lan, nöö a dë ku gaan fuka seei.” 7 Hën Jesosi piki ën taa: „Antoobi, te mi dou ala, nöö mi o kulëën.” 8 Hën di hedima u sodati piki ën taa: „Masa o, ma bumbuu tjika fii ko a mi wosu. Ma i sa fan leti ka i dë aki nöö, nöö di wookoma u mi o ko bëtë. 9 Biga fa mi dë aki, sëmbë abi taki a mi liba, nöö mi abi sodati di mi a’ taki a de liba tu. Ee mi piki wan u de taa: ’Go ala’, nöö a nango. Ee mi piki wan wotowan taa: ’Ko aki’, nöö a ta ko. Nöö ee mi piki wan saafu u mi taa: ’Du di soni aki’, nöö a ta du ën.” 10 Di Jesosi jei andi di womi taki, hën a bigi dëën tee. Hën a piki dee sëmbë dee bi ta waka nëën baka taa: „Mi ta piki unu gbelin taa, na wan daka seei mi si wan sëmbë a Isaëli di abi sö wan biibi e. 11 Ma mi taki e, taa gaan hia sëmbë o kumutu a sömëni köndë,* nöö de o sindo a tafa ku Abahamu, Isaki ku Jaköpu, a di Tii u Gadu di dë a liba ala. 12 Ma de o tuwë dee sëmbë dee bi musu dë a di Tii u Gadu go a döö, a dungudungu. Ala de o dë ta këë, ta njan tanda.” 13 Hën Jesosi bia piki di hedima u sodati taa: „Toona go fii a wosu e. Be soni pasa kumafa i kë, u di i lei taa i abi biibi.” Nöö hën di wookoma ko bëtë wantewante dë.
14 Di Jesosi go a Petuisi pisi, hën a go si Petuisi mai suwakisuwaki a bedi, u di fëbë bi kisi ën. 15 Nöö hën Jesosi panjëën a maun, hën a ko bëtë. Hën a bigi seeka soni u njan da Jesosi. 16 Di kamian ko dungu, hën sëmbë tja sömëni sëmbë ko dëën di bi dë ku taku soni a de liba. Wan soni nöö a bi ta taki, nöö dee soni bi ta kumutu a dee sëmbë liba. A kula hii dee sëmbë dee bi dë ku suwaki. 17 Di soni aki bi mbei soni pasa kumafa di tjabukama de kai Jesaaja bi taki. A bi taki taa: „A puu dee siki fuu ku dee pen fuu a u liba.”
18 Di Jesosi si taa sömëni sëmbë bi lomboto ën, hën a piki dee bakama fëën u de tei boto go a woto banda. 19 Hën wan sabima u Wëti waka ko a Jesosi, hën a piki ën taa: „Mësitë, mi o nango ku i a hii kamian ka i nango.” 20 Ma Jesosi piki ën taa: „Dee matu dagu abi baaku ka de ta libi, nöö dee fou u liba ala abi wosu. Ma di sëmbë di ko dë Libisëmbë Miii, an abi kamian ka a ta duumi e.” 21 Wan woto bakama fëën piki ën taa: „Masa, da mi pasi u mi bei mi tata ufö baa.” 22 Ma Jesosi piki ën taa: „Ta waka a mi baka nöömö, nöö be dee dëdë sëmbë bei dee sëmbë u de dee dëdë.”
23 Hën Jesosi ku dee bakama fëën subi a boto. 24 Ma te u de mëni, wan gaan ventu ko. Hën di wata ta seki nango a di boto dendu tee kuma a sa singi di boto. Ma Jesosi bi dë ta duumi. 25 Dee bakama fëën go weki ën, hën de piki ën taa: „Masa, heepi u oo. Woo singi!” 26 Hën a piki de taa: „Faandi mbei un ta fëëë sö? Di biibi fuunu an taanga tjika nö?” Hën a hopo, hën a gandji da di ventu ku di ze. Wantewante dë, hën di ventu ku di ze kötö piii. 27 Di soni di pasa dë bi bigi da hii dee womi dee bi sai dë. Hën de taa: „Ambë seei da di womi aki? Te kisi di ventu ku di ze seei ta du andi a taki!”
28 Di a dou a woto banda, a di pisiwata u dee Galasëni sëmbë, hën tu womi di bi abi taku soni a de liba waka ko miti ën. Dee womi aki bi ta libi a dee geebi mindi, nöö de bi hogi seei te na wan sëmbë an bi sa waka pasa a di kamian ka de bi sai dë. 29 De bigi ta bai taa: „Andi u ku i abi, ju di Womi Mii u Gadu dë? Ko i ko aki fii ko sitaafu u ufö di juu dou nö?” 30 A di pisiten dë, wanlö hia hagu bi sai dë ta njan. 31 Hën dee taku soni dee bi dë a dee womi liba naandë begi Jesosi taa: „Wë ee joo jaka u puu aki, nöö da u pasi fuu go a dee hagu ala.” 32 Hën Jesosi piki de taa: „Un go!” Hën wantewante dë dee taku soni kumutu a dee womi liba go a dee hagu. Hën dee hagu kule ku baai gbulululu go kai a ze dëdë tuu fiaa. 33 Hën dee sëmbë dee bi ta luku dee hagu kule go a ganda. Hën de go konda hii soni di de bi si da dee sëmbë u di köndë, te kisi di soni di bi pasa ku dee womi dee bi abi taku soni a de liba. 34 Hën hii dee sëmbë u di köndë booko gililili ko miti Jesosi. Hën de begi ën faa kumutu a di pisiwata u de.