Dee soni dee Maikusi sikifi
11 Di de dë zuntu u Jelusalën, a di pisiwata u Bëtifaigi ku Betania di dë a di Olëifi Kuun, hën Jesosi manda tu u dee bakama fëën go, 2 hën a piki de taa: „Un go a di köndë di un ta si a unu fesi dë, nöö te un denda a di köndë, nöö woon si wan buliki mii taitai. Na wan sëmbë sindo nëën liba wan daka. Un lusu ën tja ko da mi. 3 Ee wan sëmbë hakisi unu taa: ’Faandi mbei un ta lusu di buliki mii?’, nöö un musu piki ën taa: ’Masa abi ën fanöudu, nöö a o toona mandëën da unu wantewante.’” 4 Hën de go dou, hën de si di buliki mii taitai a wan dööbuka a bandja pasi, hën de lusu ën. 5 Ma so u dee sëmbë dee bi dë taanputaanpu naandë hakisi de taa: „Faandi mbei un ta lusu di buliki mii u du?” 6 Hën de piki de leti kumafa Jesosi bi taki da de, hën dee sëmbë disa de be de go.
7 Hën de tja di buliki mii ko a Jesosi, hën de jabi koosu nëën liba, hën Jesosi go sindo nëën liba. 8 Sömëni sëmbë bi ta jabi dee koosu u de a di pasi liba, nöö wotowan bi go koti pau maun a dee goon ko tuwë a di pasi liba. 9 Nöö dee sëmbë dee bi ta waka nëën fesi, ku dee bi ta waka nëën baka bi ta bai taa: „Kee Masa Gadu, u ta begi i fii tjubi ën baa. Be di sëmbë di Jehoufa* manda ko feni gaan bunu! 10 Be soni waka bunu da di Tii fuu tata Dafiti. Ju di Gadu di dë a di Möön Hei kamian a liba ala, u ta begi i fii tjubi ën da u baa!” 11 Di Jesosi dou a Jelusalën, hën a denda go a di Wosu u Gadu, hën a luku hii dee soni dee bi sai dë, hën a kumutu dë go a Betania ku dee tuwalufu apösutu, u di a bi ko lati kaa.
12 Di debooko fëën di de bi ta kumutu a Betania, hën hangi kisi ën. 13 Hën a tuwë wojo go te ala, hën a si wan fuuta pau de kai figa, nöö a si taa a dë ku uwii seei. Nöö hën a go suku njanjan nëën, ma an feni na wan kodo, biga di ten an bi dou jeti u di pau pai njanjan. 14 Hën a piki di pau taa: „Sëmbë an o njan fuuta fii nöiti möön.” Nöö fa a fan dë, hën dee bakama fëën jei andi a taki.
15 Di de dou a Jelusalën, hën Jesosi denda go a di Wosu u Gadu, hën a bigi jaka hii dee sëmbë dee bi ta sei soni, söseei dee bi ta bai soni naandë. A tuwë dee tafa u dee sëmbë dee bi ta booko möni ku dee bangi u dee sëmbë dee bi ta sei pomba djolou a goon. 16 An bi ta da sëmbë pasi u de waka pasa a di Wosu u Gadu ku dee soni u de. 17 A bi ta lei sëmbë soni, nöö a bi ta piki de taa: „A sikifi a Gadu Buku taa: ’Di Wosu u mi da wan kamian ka sëmbë u hii nasiön musu ko ta begi.’ Ma uun butëën ko tan kamian u fufuuma.” 18 Di dee fesima u dee begima ku dee sabima u Wëti jei di soni aki, hën de bigi ta suku fasi u de kii ën. De bi ta fëëë ën, u di hii dee sëmbë bi foondo u di fasi fa a bi ta lei de soni.
19 Hën de dë tefa sonu go, hën de kumutu a di köndë. 20 Di debooko fëën, hën Jesosi ku dee bakama fëën toona si di figa pau, nöö hën de si taa dee uwii fëën dëë tjakaa. Di pau dëdë seei te dou a lutu. 21 Nöö hën Petuisi ko mëni fa Jesosi bi fan ku di pau, nöö hën a piki Jesosi taa: „Labi o, luku di figa pau di i bi siba, a dëdë tuu.” 22 Hën Jesosi bia piki de taa: „Un musu ta biibi Gadu e. 23 Mi taki e, ee wan sëmbë piki di kuun aki taa: ’Hopo kumutu aki, nöö go a di ze’, nöö a ta biibi nëën hati taa di soni di a taki dë sa pasa tuutuu, nöö a o pasa leti kumafa a taki dë. 24 Fëën mbei mi taki da unu taa, ee un hakisi Gadu wan soni, nöö un ta biibi a unu hati taa un abi di soni kaa, nöö woon feni ën e. 25 Te i ta begi, hën i ko mëni taa i ku sëmbë a’ soni, nöö i musu dëën paadon, nöö di Tata fii di dë a liba ala o da i paadon u dee hogi dee i ta du.” 26* ——
27 Hën Jesosi ku dee bakama fëën toona go a Jelusalën. Di Jesosi bi ta waka a di Wosu u Gadu, hën dee fesima u dee begima ku dee sabima u Wëti ku dee gaanwomi u di köndë ko nëën, 28 hën de hakisi ën taa: „Ambë manda i fii du dee soni aki? Ambë da i taki fii du dee soni aki?” 29 Hën Jesosi piki de taa: „Miseei o hakisi unu wan soni tu. Ee un piki mi, nöö miseei o piki unu ambë dam’ taki u mi du dee soni aki. 30 Ambë bi manda Johanisi faa dopu sëmbë? Gadu ö, naa libisëmbë? Un konda da mi.” 31 Hën de go a së go dë ta pakisei di soni nango ta ko. De ta taki taa: „Ee u piki taa: ’Gadu hën mandëën’, nöö a o hakisi u taa: ’Nöö faandi mbei wan biibi ën?’ 32 Ma wa sa taki taa: ’Libisëmbë hën mandëën.’” De bi ta fëëë taa dee sëmbë o du soni ku de, u di de bi ta si Johanisi kuma wan tjabukama u Gadu. 33 Hën de piki Jesosi taa: „Wë wa sabi.” Hën a piki de taa: „Nöö miseei an o piki unu ambë da mi taki u mi du dee soni aki.”