Dee soni dee Maikusi sikifi

7 Dee Faliseima ku so u dee sabima u Wëti dee bi kumutu a Jelusalën, bi go a Jesosi. 2 Nöö hën de si dee bakama u Jesosi ta njan ku sundjusundju maun. Hën da de an bi wasi* de maun ufö de njan. 3 Dee Faliseima ku dee Dju an bi ta njan ee de an bi wasi de maun dou a de agomaun, kumafa dee gaansëmbë u de bi ta du ën. 4 Te de bi kumutu a wojowojo ko, nöö de bi musu ta wasi ufö de sa njan. Sömëni woto guwenti dë di de bi abi tu. De bi ta doki dee paabi lai u de a wata ufö de du soni ku de. Dee soni kuma kan, bata ku dee köpö gansë u de de bi ta doki a wata. 5 Hën dee Faliseima ku dee sabima u Wëti hakisi Jesosi taa: „Faandi mbei dee bakama fii an ta du dee soni di dee gaansëmbë fuu bi guwenti du? Biga de ta njan söndö wasi maun.” 6 Hën a piki de taa: „Un dee bödjëëma aki. Fuunu di tjabukama Jesaaja bi taki di a bi taki taa: ’Dee sëmbë aki, ku de buka de ta du kuma de ta hei mi, ma de an pena lobi mi seei. 7 U sösö seei de ta dini mi, u di na dee wëti u mi de ta lei sëmbë, ma libisëmbë wëti de ta lei sëmbë.’ 8 Un ta buta dee wëti u Gadu a wan së, nöö un ta libi ku dee guwenti u libisëmbë.”

9 Hën a piki de tu taa: „Un saanfa u buta dee guwenti u dee gaansëmbë fuunu a dee lei u Gadu kamian. 10 Mosesi bi taki taa ’i musu ta kai i mama ku i tata gaan soni’, söseei a taa ’sëmbë musu kii di sëmbë di ta kosi hën mama ku hën tata ta wisiwasi de’. 11 Ma uun ta taki taa ’ee wan sëmbë ta piki hën mama ku hën tata taa: „Di soni di mi bi abi u da unu, hën mi tei buta a wan së kaa u mi da Gadu,*”’ 12 nöö aanfu heepi hën mama ku hën tata a soni möön. 13 A sö wan fasi un ta buta dee wëti u Gadu a wan së, nöö un ta hai dee lei fuunu tja ko buta a de kamian. Nöö sö fuunu kaa.” 14 Hën Jesosi toona kai dee gaan hia sëmbë dee bi sai dë ko nëën, hën a piki de taa: „Dee sëmbë o, un haika mi e, nöö un mbei möiti u fusutan andi mi ta taki. 15 Na dee soni dee wan sëmbë ta njan, de ta sundju ën a Gadu wojo, ma dee hogi soni dee a ta pakisei, de ta sundju ën a Gadu wojo.” 16* ——

17 Di Jesosi disa dee sëmbë naandë, hën a go a wan wosu. Hën dee bakama fëën ko hakisi ën andi di woto di a bi konda da dee sëmbë kë taki. 18 Hën a piki de taa: „Wan fusutan di woto tu nö? Wan sabi taa di soni di wan sëmbë ta njan tuwë go nëën bëë an sa mbei a ko sundju a Gadu wojo u? 19 Dee soni di wan sëmbë ta njan an nango nëën hati, ma de nango nëën bëë. Te u kaba fëën de ta toona kumutu baka.” Jesosi bi taki di soni aki, u di a bi kë u de fusutan taa de sa njan hii soni. 20 A piki de tu taa: „Dee hogi soni dee wan sëmbë ta pakisei, de ta sundju ën a Gadu wojo. 21 Dee taku pakisei dee ta kumutu a wan sëmbë hati da fanafiti libi a di së manu ku mujëë soni,* fufuu, kii, 22 waka libi, langawojo, hogihati, bödjëë libi, di hogi di sëmbë ta du söndö sen, haun, kosi, gaanfasi, ku wisiwasi tan. 23 Hii dee lö soni aki ta kumutu a wan sëmbë hati, nöö de ta sundju ën a Gadu wojo.”

24 Hën Jesosi kumutu naandë, hën a go a di pisiwata u Tilusi ku Sidön, hën a denda go a wan wosu. An bi kë u sëmbë sabi taa a bi sai dë, ma tökuseei sëmbë bi ko sabi taa a sai dë. 25 Wan mujëë bi sai dë di bi abi wan piki mujëë mii fëën, nöö taku soni bi dë a di mujëë mii liba. Di di mujëë jei taa Jesosi sai dë, hën wantewante dë a ko nëën, hën a tjökö kini nëën fesi. 26 Di mujëë aki bi dë wan Giiki sëmbë, nöö de pai ën a Finisia di dë a Silia köndë. A bi ta hakisi Jesosi nöömö faa jaka di taku soni puu a di mujëë mii fëën liba. 27 Ma Jesosi piki ën taa: „Be dee mii njan te bëë u de fuu ufö. Biga an fiti u puu bëëë a dee mii maun tuwë da dagu mii e.” 28 Hën di mujëë piki taa: „Aai Masa, sö a dë tuu o. Ma dee pikipiki pisi dee ta puu ta kai a di tafa basu wë? Dee dagu mii an sa njan de nö?” 29 Di a taki sö kaa, hën Jesosi piki ën taa: „U di i taki sö, mbei i sa toona go fii a wosu e. Biga di taku soni kumutu a di mujëë mii fii liba kaa.” 30 Hën di mujëë toona go a wosu, hën a si di mii fëën dë kandikandi a bedi. Di taku soni bi kumutu nëën liba.

31 Di Jesosi kumutu a di pisiwata u Tilusi naandë, hën a pasa a di pisiwata u Sidön toona pasa a di pisiwata u Dekapolisi* faa go dou a di ze u Galilea. 32 Di a dou, hën de tja wan bookojesima ko nëën di an bi sa fan bumbuu. Hën de begi ën faa buta maun nëën liba. 33 Nöö hën Jesosi puu di womi a dee sëmbë mindi naandë tja go a wan së. Hën a buta finga a di womi jesi, hën a tunta te a kaba, hën a panjan di womi töngö. 34 Hën a luku liba, nöö hën a hai böö go a liba. Hën a piki di womi taa: „Efata,” di kë taki: „Jabi.” 35 Nöö hën di womi ko ta jei soni seei gbegedee, söseei a ko ta fan limbolimbo. 36 Hën Jesosi piki dee sëmbë taa de an musu konda di soni di pasa dë da na wan sëmbë. Ma möön a bi ta bai de, möönmöön seei de bi ta paajëën nango. 37 Di soni bigi da dee sëmbë te na soni. Hën de taa: „Hii dee soni dee a ta du tuu bunu. Biga a ta mbei dee tapabukama ko ta fan, söseei a ta mbei dee bookojesima ko ta jei soni.”