Dee soni dee Lukasi sikifi
15 Hën hii dee pii-lantimönima ku dee sëmbë dee an ta libi bunu a Gadu wojo ko a Jesosi, u de ko haika andi a abi u taki. 2 Ma dee Faliseima ku dee sabima u Wëti bi ta guunjëën ta taki taa: „Di womi aki ta nama ku dee sëmbë dee an ta libi bunu a Gadu wojo, nöö a ta njan ku de tu.” 3 Hën Jesosi konda wan woto da de. A piki de taa: 4 „Ee wan sëmbë abi 100 sikapu fëën ta kiija, hën wan u dee sikapu dë lasi, nöö andi i si kuma a o du? An bi o go disa dee 99 sikapu a di sabana, nöö a go suku di wan di lasi u te a feni ën u? 5 Nöö te a feni ën, nöö a o wai seei hopo ën buta a gangaa baaku tja. 6 Nöö te a ko a wosu, nöö a o kai dee mati fëën ku dee sëmbë dee ta libi zuntu ku ën. Nöö a o piki de taa: ’Un ko mbei piizii ku mi e, dee sëmbë. Biga di mbeti u mi bi lasi, nöö mi feni ën baka.’ 7 Mi taki e, fa i si hii sëmbë ta wai dë, nöö sö nöö a ta dë a liba ala te wan sëmbë di an ta libi bunu a Gadu wojo biëën libi ko ta libi kumafa Gadu kë. De ta piizii ku ën möön leki dee 99 woto sëmbë dee bi dë bumbuu kaa.
8 Ee wan mujëë abi teni kpëngëlë möni,* hën wan u de lasi, nöö a o sëndë faja bai di wosu ta suku ën u te a feni ën, na sö nö? 9 Nöö te a feni ën kaa, nöö a o kai dee mati fëën ku dee sëmbë dee ta libi nëën bandja tuu ko. Nöö a o taki da de taa: ’Dee sëmbë o, mi feni di möni u mi di bi lasi. Un ko wai ku mi o!’ 10 Mi taki da unu e, leti sö nöö dee basia u Gadu ta wai te wan sëmbë di an bi ta libi bunu a Gadu wojo bia libi ko nëën.”
11 Hën a toona taki da de möön taa: „Wan tata bi dë, nöö a bi abi tu womi mii fëën. 12 Hën di möön pikiwan ko hakisi ën taa: ’Taata o, da mi di u mi gudu di mi musu kisi.’ Nöö hën di tata paati dee gudu fëën da de. 13 Baka wantu daka, hën di möön pikiwan tei hii dee gudu fëën tuu, hën a go a wan longi köndë, hën a go poi di möni fëën tuu ku jajo libi. 14 Di a njan hii di möni fëën tuu, hën wan gaan hangi ko a di köndë, hën pena ko ta kii ën seei. 15 Nöö hën a go a wan sëmbë u di köndë go suku wooko. Nöö hën di sëmbë mandëën faa musu go ta luku dee hagu fëën dëën. 16 Nöö hangi bi ta kii ën tee dee hagu njanjan seei a bi kë njan, ma na wan sëmbë dëën soni u njan möönsö.
17 Nöö hën a sai dë tee wan pisi, hën wojo fëën ko limbo. Hën a taa: ’Luku fa mi dë aki. Sömëni wookoma mi tata abi ta da njanjan, nöö hën mi ko dë aki ta pena da hangi ta kii! 18 Mi o toona go a mi tata, nöö mi o piki ën taa: „Taata o, mi du hogi ku i tee dou ku Masa Gadu a liba ala tuu. 19 Ma fiti fii tei mi kuma miii fii möön seei, ma tei mi kuma wan wookoma fii nöö.”’ 20 Nöö hën a hopo tei pasi ta waka nango nëën tata. Di di tata si ën a longi ta waka ta ko, nöö hën tjali fëën kisi ën tee. Hën a hopo vu kule go kisi ën baasa, hën a bosi ën, hën a wai ku ën te a bigi. 21 Nöö hën di womi mii piki ën taa: ’Taata o, mi du hogi ku i tee dou ku Masa Gadu a liba ala tuu. Ma fiti möön fii musu tei mi kuma miii fii e.’ 22 Ma di tata bai piki dee saafu fëën taa: ’Un hesi go tei di möön waiti wojo koosu tja ko bisi dëën. Nöö un go tei andelu tja ko tuusi nëën finga, nöö un tja susu ko dëën be a bisi. 23 Nöö un go kii di möön fatu kau mii tja ko boo boi njan mbei piizii. 24 Biga di womi mii u mi aki bi dëdë, ma a toona ko a libi baka. A bi lasi, ma u feni ën baka.’ Hën de bigi mbei piizii.
25 Nöö a di ten dë seei, di gaan baaa fëën bi dë a goon dendu. Di a kumutu a goon ta ko, hën a jei de ta wai ta pëë ta mbei piizii ta baja. 26 Nöö hën a kai wan u dee wookoma fëën tata ko, hën a hakisi ën andi ta pasa. 27 Hën di wookoma piki ën taa: ’Wë di piki baaa fii di bi go, hën wë toona ko a wosu. Nöö hën i tata kii di möön fatu kau mii, hën a ta wai ku i piki baaa u di a toona ko ku libi a wosu baka.’ 28 Hën hati fëën boonu tee an kë denda go a wosu. Hën di tata go nëën a döö go begi ën faa denda go a wosu. 29 Hën a piki ën tata taa: ’Wë sömëni jaa longi mi ku i dë aki. Mi ta wooko da i ta du hii dee soni dee i ta hakisi mi u mi du, ma na wan daka seei i da mi wan kaabita mii u mi mbei piizii ku dee mati u mi. 30 Ma di womi mii fii aki an pena dou seei, hën i go tei di möön fatu kau mii fii kii u mbei wan gaan piizii dëën, hii fa a go poi dee gudu fii tuu ku jajo mujëë.’ 31 Hën di tata taa: ’Baa o, fa mi ku i ta libi makandi aki, nöiti i go disa mi möönsö, nöö hii dee soni dee mi abi aki tuu dë fii. 32 Wa bi musu mbei piizii wai ku i piki baaa fii nö? Biga a bi dëdë, ma a toona ko a libi baka. A bi lasi, ma u feni ën baka.’”