Dee soni dee Lukasi sikifi
18 Baka di dë, hën Jesosi konda wan woto da de u lei de fa a dë fanöudu tjika u de ta begi nöömö söndö u de lasi hati. 2 A taa: „Wan kuutuma bi dë a wan köndë, nöö an bi ta fëëë Gadu, söseei an bi abi lesipeki da sëmbë. 3 Wan mujëë di manu fëën bi dëdë bi dë a di köndë dë tu. Nöö hii juu a bi nango ta piki di kuutuma taa: ’Mi ku wan sëmbë a’ soni. Mi begi i fii kuutu soni a wan leti fasi da mi baa.’ 4 Wë wan hii pisiten di kuutuma an bi kë heepi di mujëë, ma baka wan pisiten hën a pakisei taa: ’Wë hii fa ma ta lesipeki Gadu ku libisëmbë, 5 tökuseei mi o heepi ën be de dëën leti, be mi böö fëën. Ee nasö a o ta ko ta wei mi hedi ku di taki fëën nöömö.’” 6 Hën Masa Jesosi taa: „Un jei andi di kuutuma taki hii fa an ta libi bunu a Gadu wojo u? 7 Nöö wan si kuma Gadu o mbei soni waka a wan leti fasi da dee sëmbë dee a tei, söseei dee ta këë ta kai ën ndeti ku didia u? Wan si kuma a o hoi pasensi da de tu nö? 8 Mi taki e, hesihesi seei a o kuutu soni a wan leti fasi da de. Ma te di sëmbë di ko dë Libisëmbë Miii ko, a o feni sëmbë a goonliba aki di abi di lö biibi dë u?”
9 Jesosi bi konda wan woto da dee sëmbë dee bi ta si kuma de da bumbuu sëmbë, söseei dee bi ta wisiwasi wotowan. A bi taa: 10 „Tu womi bi go a di Wosu u Gadu u de go begi. Wan u de bi dë wan Faliseima, nöö di wotowan bi dë wan womi di bi ta pii lantimöni. 11 Hën di Faliseima taanpu, hën a bigi begi nëën hati. A taa: ’Ke Gadu o, gaantangi fii e, u di ma dë kuma dee sëmbë dee an ta libi bunu a i wojo. U di ma dë kuma dee fufuuma, kuma dee sëmbë dee ta waka da de mujëë, nasö kuma di pii-lantimönima aki. 12 Tu pasi a wan wiki mi ta dë söndö njan u wan pisiten. Mi ta da i di u teni pisi u hiniwan soni di mi ta feni.’ 13 Ma di pii-lantimönima bi taanpu te a wan së ala. An bi kë hopo wojo luku liba seei. A bi ta naki hënseei a hatimindi u lei fa a ta tjali tjika. A bi ta taki taa: ’Ke Gadu o, abi tjalihati u mi baa, biga mi da wan hogilibima.’ 14 Mi taki e, di di womi aki toona go a wosu, nöö Gadu bi ta si ën kuma wan sëmbë di ta libi bunu nëën wojo möön di Faliseima. Biga Gadu o saka di sëmbë di ta suku u hopo hënseei, nöö a o hopo di sëmbë di ta saka hënseei.”
15 Nöö hën sëmbë ta tja dee mii u de go a Jesosi faa buta maun a de hedi u begi da de. Ma di dee bakama fëën si di soni dë, hën de gandji da dee sëmbë. 16 Ma Jesosi bi kai dee mii ko nëën. A bi taki taa: ’Un disa dee mii be de ko a mi, wan tapa de. Biga di Tii u Gadu dë da dee sëmbë dee dë kuma dee mii aki. 17 Mi taki e, ee wan sëmbë ja ta biibi a di Tii u Gadu kumafa piki mii ta biibi soni, nöö ja o sa denda go nëën.”
18 Hën wan u dee hedima u dee Dju hakisi Jesosi taa: „Di bumbuu Mësitë aki, andi mi musu du u mi sa feni di libi u teego?” 19 Hën Jesosi piki ën taa: „Faandi mbei i ta kai mi bumbuu Mësitë? Na wan sëmbë bumbuu, boiti Gadu. 20 Wë i sabi dee Wëti aki: ’Ja musu waka da di manu fii nasö di mujëë fii, ja musu kii sëmbë, ja musu fufuu, ja musu ta mindi soni, nöö i musu ta kai i mama ku i tata gaan soni.’” 21 Hën di womi taa: „Hii dee Wëti dë tuu mi ta hoi kaa sensi di mi dë miii.” 22 Di a fan sö, hën Jesosi piki ën taa: „Wë, mi jei. Ma wan soni dë di i musu du jeti. Go sei hii dee gudu dee i abi, nöö i da dee pootima di möni. Te i du sö, nöö joo abi gudu a Gadu a liba ala. Te i kaba, nöö i ko dë wan bakama u mi.” 23 Di di womi jei di soni aki, hën a hati ën, biga a bi gudu seei.
24 Hën Jesosi luku ën, hën a taa: „A o taanga da dee guduma u de denda go a di Tii u Gadu! 25 A möön taanga da wan guduma faa denda go a di Tii u Gadu möön fa a taanga da di gaan mbeti de kai kamëli faa pasa a wan aguja baaku.” 26 Nöö dee sëmbë dee jei di soni a taki dë, hakisi ën taa: „Nöö ambë seei sa feni di libi u teego?” 27 Hën Jesosi taa: „Dee soni dee libisëmbë an sa du, dee soni dë Gadu ta du.” 28 Hën Petuisi taa: „Wë u bi disa hii soni seei ko ta waka a i baka.” 29 Hën Jesosi piki de taa: „Mi taki e, hiniwan sëmbë di go disa hën wosu, hën mujëë, hën baaa, hën tata nasö hën mama, nasö dee miii fëën u di Tii u Gadu hedi, 30 o toona feni hii soni sömëni toon möön hia a di ten aki. Nöö a di ten di ta ko,* a o feni di libi u teego.”
31 Hën Jesosi kai dee apösutu fëën a së, hën a piki de taa: „Un haika e, woo go a Jelusalën, nöö hii dee soni di dee tjabukama u Gadu bi sikifi u di sëmbë di ko dë Libisëmbë Miii o pasa. 32 De o leifi ën da dee woto köndë sëmbë, de o mbei ën fa, de o libi hogi ku ën, söseei de o tunta nëën. 33 De o fon mën te de kaba, nöö de o kii ën. Ma baka dii daka, nöö a o toona weki ko a libi baka.” 34 Ma dee apösutu an bi fusutan dee soni dee a bi taki, u di de an bi a’ fusutan u dee soni dë jeti.
35 Di Jesosi bi zuntu ku Jelikou, nöö wan bookowojoma bi dë a bandja pasi sindosindo ta pidi soni. 36 Di a ta jei gaan hia sëmbë ta waka pasa, hën a bigi ta hakisi de andi ta pasa. 37 Hën de piki ën taa: „Jesosi u Nazalëti hën wë ta pasa aki!” 38 Di a jei sö, hën a bai taa: „Jesosi, Womi Mii u Dafiti, abi tjalihati um’ baa!” 39 Hën dee sëmbë dee bi ta waka a fesi bai ën be a kabuka dë. Ma tökuseei a bi bai möön taanga taa: „Womi Mii u Dafiti, abi tjalihati um’ baa!” 40 Hën Jesosi taanpu, hën a piki dee sëmbë be de tja di womi ko nëën. Di de tjëën ko, hën Jesosi hakisi ën taa: 41 „Andi i kë u mi du da i?” Hën a taa: „Masa o, mi kë fii mbei mi ko ta si soni baka.” 42 Hën Jesosi taa: „Be wojo fii ko limbo. Di biibi fii, hën mbei i ko bëtë.” 43 Hën wantewante dë wojo fëën ko limbo gbegedee. Hën a bigi ta waka a Jesosi baka ta gafa Gadu. Nöö di dee sëmbë si andi bi pasa, hën hii de tuu gafa Gadu.