Dee soni dee Mateosi sikifi
4 Nöö hën di kaakiti u Gadu tja Jesosi go a wan sabana, hën Didibi ko poobëën. 2 Baka di a bi dë söndö njan 40 daka, ndeti ku didia, hën hangi ko kisi ën. 3 Hën Didibi ko nëën, hën a taki dëën taa: „Ee i da miii u Gadu, nöö i fan ku dee sitonu aki be de bia ko dë bëëë.” 4 Hën a piki ën taa: „A sikifi a di Wöutu u Gadu taa: ’Na bëëë wanwan nöö ta hoi sëmbë a libi, ma hii dee soni dee Jehoufa* ta taki tuu ta hoi sëmbë a libi.’”
5 Bakaten hën Didibi tei ën tja go a Jelusalën,* hën a tjëën go a di möön hei kamian u di Wosu u Gadu. 6 Nöö hën a piki ën taa: „Tuwë iseei go a goon. Biga a sikifi a di Wöutu u Gadu taa: ’A o manda dee basia fëën u de ko heepi i, nöö de o tja i a maun fu ja musu naki futu a sitonu.’” 7 Hën Jesosi piki ën taa: „A sikifi a di Wöutu u Gadu tu taa: ’Ja musu pooba Jehoufa* di Gadu fii.’”
8 Baka di dë, hën Didibi tei ën tja go a wan gaan hei kuun liba, hën a lei ën hii dee tii u goonliba tuu ku di fa de waiti tjika. 9 Hën a piki ën taa: „Mi o da i hii dee soni aki tuu, ee i tjökö kini a goon begi* mi wan kodo pasi nöö.” 10 Hën Jesosi piki ën taa: „Go kumutu aki Saatan! Biga a sikifi a di Wöutu u Gadu taa: ’Jehoufa* di Gadu fii nöö i musu begi, nöö hën wanwan tö i musu dini.’” 11 Di a fan sö kaa, hën Didibi disëën. Baka di dë, hën wanlö basia u Gadu ko nëën ko heepi ën.
12 Di Jesosi jei taa de kisi Johanisi söötö, hën a go a Galilea. 13 Di a kumutu a Nazalëti, hën a go libi a Kapënaumi a di ze bandja a di pisiwata u Zebulön ku Nafutali. 14 Di soni dë bi mbei soni bi pasa kumafa di tjabukama u Gadu de kai Jesaaja bi taki. A bi taki taa: 15 „Un dee sëmbë u Zebulön ku Nafutali dë. Unu di ta libi a di ze bandja a di woto së banda u di Joodan lio, a di pisiwata u Galilea ka dee woto köndë sëmbë ta libi, 16 kamian o limbo da unu o! Dee sëmbë dee bi dë a dungu ko si wan gaan limbo, nöö kamian ko limbo da dee sëmbë dee dë a dëdë buka.” 17 Sensi di ten dë, hën Jesosi bigi ta konda da sëmbë taa: „Un bia ko ta libi kumafa Gadu kë e, biga di Tii u Gadu di dë a liba ala ko zuntu.”
18 Di Jesosi bi ta waka a di lampeesi u di ze u Galilea, hën a si tu womi ta tuwë nëti. Dee tu womi aki bi dë baaa, nöö de bi dë sëmbë di ta kisi fisi. Wan u de da Simön, nöö de bi ta kai ën Petuisi. Nöö di wotowan da Andiasi. 19 Jesosi piki de taa: „Un ko waka a mi baka, nöö mi o mbei un ko ta kisi libisëmbë kumafa de ta kisi fisi.” 20 Hën wantewante dë de disa dee nëti u de, hën de go ta waka nëën baka. 21 Di a waka go möön longi, hën a si tu woto womi di bi dë baaa. Wan u de da Jakobosi, nöö di wotowan da Johanisi. De bi dë a wan boto ku de tata Zebedeosi ta seeka dee nëti u de. Hën Jesosi kai de. 22 Wantewante dë de kumutu a di boto disa de tata naandë, hën de go waka a Jesosi baka.
23 Baka di dë, hën a bigi waka a hii di pisiwata u Galilea, ta lei sëmbë soni a dee wosu ka dee Dju nango dini Gadu. Söseei a bi ta paaja di bunu buka u di Tii u Gadu, ta kula hii pei siki. 24 Hën de tja hii dee sëmbë ko nëën, dee bi abi peipei siki, dee bi dë ku taku soni a de liba, dee bi abi pikimii siki, ku dee bi lan, hën a kula de. 25 Di soni dë mbei te a hia sëmbë u Galilea, u Dekapolisi,* u Jelusalën, u Judea, ku dee sëmbë u di woto së banda u di Joodan lio, bigi waka nëën baka.