Dee soni dee Mateosi sikifi
3 Baka wan pisiten, hën Johanisi di Dopuma bigi ta paaja wan buka a di sabana u di pisiwata u Judea. 2 A bi ta taki taa: „Un bia ko ta libi kumafa Gadu kë e, biga di Tii u Gadu di dë a liba ala o tii abiti möön.” 3 Johanisi da di sëmbë di di tjabukama u Gadu de kai Jesaaja bi taki soni fëën, di a bi taki taa: „Wan sëmbë ta bai a di sabana taa: ’Un seeka di pasi da Jehoufa* ooo, be a dë tololoo dëën!’” 4 Johanisi bi ta bisi koosu di de mbei ku di puuma u wan mbeti de kai kamëli, nöö a ta tai wan banti nëën mindi di de mbei ku mbeti kakisa. A bi ta njan atiti, söseei a bi ta bebe höniwata. 5 Dee sëmbë u Jelusalën, ku hii dee sëmbë u Judea, ku hii dee sëmbë dee ta libi a dee köndë dee dë zuntu ku di Joodan lio tuu, bi nango nëën. 6 A bi ta dopu* de a di Joodan lio, nöö de bi ta taki a hii sëmbë fesi un hogi de du.
7 Di Johanisi si taa sömëni u dee Faliseima ku dee Saduseima bi ta ko nëën faa dopu de, hën a piki de taa: „Un sindeki mii unu, andi un ko du aki? Un mëni taa woon sa go tjubi te Gadu o kii dee hogihati sëmbë u? 8 Un bigi du soni u lei taa un kë bia ko ta libi kumafa Gadu kë. 9 Wan sai dë ta mëni taa Gadu an o sitaafu unu u di un dë bakamii u Abahamu e. Biga mi taki da unu taa ee Gadu kë, nöö a sa mbei dee sitonu i si aki kisi libi bia ko dë bakamii u Abahamu a unu kamian. 10 Di matjau dë setiseti a dee pau gogo kaa u faa de. Nöö hiniwan pau di an ta pai bumbuu njanjan, de o faa koti pisipisi tuwë a faja. 11 Mim ta dopu unu ku wata u di un kë bia ko ta libi kumafa Gadu kë. Ma di sëmbë di o ko a mi baka abi makiti möön mi. Ma fiti seei u mi puu susu fëën nëën futu. Di sëmbë dë o dopu unu ku di kaakiti u Gadu, söseei ku faja.* 12 A abi wan soni* nëën maun u puu alisi kakisa. A o seeka di kamian ka a ta fon di alisi, nöö a o tja di alisi go lai a suwa. Ma a o tjuma di alisi kakisa ku faja di an sa tapa a mundu möönsö.”
13 Bakaten, hën Jesosi kumutu a Galilea ko a Johanisi a Joodan lio dë, faa musu dopu ën. 14 Ma nöö fa a ko dë, hën Johanisi kë tapëën. A taa: „Fa i dë aki, nöö mi bi musu ko a i fii dopu mi, nöö hën i ko a mi nö?” 15 Ma Jesosi piki ën taa: „Nönö, na tapa mi e. Boo du ën nöö. Biga a di fasi aki u ta du hii soni kumafa Gadu kë.” Nöö di a taki sö kaa, hën Johanisi dopu ën awaa. 16 Di a dopu ën te a kaba, hën wantewante dë Jesosi hopo kumutu a di wata. Hën mundu jabi wajaa gbegedee nëën liba, hën a si di kaakiti u Gadu ta saka ta ko nëën liba kuma wan pomba. 17 Nöö hën wan töngö piki a liba ala. A taa: „Di lobi Womi Mii u mi hën disi. Libi fëën ta kai ku mi.”