Dee soni dee Mateosi sikifi
2 De pai Jesosi a Bëtëlëhën a di pisiwata u Judea. A di pisiten dë Könu Helodi* hën bi ta tii. A di pisiten dë seei wanlö womi di bi ta koti luku ku teeja,* bi kumutu a di së u sonu kumutu ko dou a Jelusalën. 2 Di de dou, hën de hakisi taa: „Naasë di könu u dee Dju di de pai woto daka aki dë? Biga di u bi dë a di së u sonu kumutu, hën u si wan teeja di lei u soni fëën, nöö hën u ko aki u ko tjökö kini bendi hedi dëën.” 3 Di Könu Helodi ku hii dee woto sëmbë u Jelusalën jei di soni dë, hën a toobi de gaanfa seei. 4 Hën a kai dee fesima u dee begima ku dee sabima u Wëti* u de ko nëën. Hën a hakisi de u de piki ën naasë de bi o pai di Keesitu.* 5 Nöö hën de piki ën taa: „De o pai ën a Bëtëlëhën, a di pisiwata u Judea. Biga Gadu bi mbei di tjabukama fëën taki taa: 6 ’Bëtëlëhën, ju di köndë u Juda dë. Ja dë di möön lagi köndë di dee tiima u Juda ta tii e. Biga a di köndë fii de o pai wan gaan tiima, di o tii hii dee Isaëli sëmbë kuma wan sëmbë di ta kiija sikapu.’”
7 Hën Könu Helodi kai dee womi dee ta koti luku u de ko nëën söndö u sëmbë sabi. Hën a hakisi de u de konda dëën finifini na un ten de bi si di teeja. 8 Baka di dë, hën a manda de go a Bëtëlëhën. A piki de taa: „Un go suku di mii. Nöö te un feni ën, nöö un ko piki mi, sö taa miseei sa go ala u tjökö kini a goon bendi hedi dëën tu.” 9 Di de jei fa di könu fan dë, hën de tei pasi nango. Te wan pisi, hën de toona si di teeja di de bi si, di de bi dë a di së u sonu kumutu. Hën di teeja ta waka a de fesi tefa a fika taanpu piii a di kamian ka di mii bi dë. 10 Di de si di teeja hoi zëngëë, hën de wai seei te na soni. 11 Di de denda go a di wosu ka di mii ku hën mama Malia bi dë, hën de tjökö kini a goon bendi hedi da di mii. Hën de dëën gudu. De dëën goutu ku tu sumëësuti puili.* 12 Ma u di Gadu bi mbei dee womi aki sunjan wan sunjan taa de an musu toona go a Könu Helodi möön, hën de tei wan woto pasi waka go a de köndë.
13 Di dee womi aki toona go a de köndë, hën wan basia u Jehoufa* ko piki Josëfu a sunjan taa: „Womi o, hopo! Tei di mii ku hën mama, nöö un fusi go a Egepiti köndë. Nöö un dë ala u te mi piki i fii sa kumutu ala baka, biga Helodi ta suku di mii faa musu kii ën.” 14 Hën Josëfu hopo, hën a di ndeti dë seei a tei di mii ku hën mma, hën de go a Egepiti. 15 Hën de dë ala u te fa Helodi dëdë. Di soni aki mbei di soni di Jehoufa* bi mbei di tjabukama fëën taki, pasa tuutuu. A bi taki taa: „Mi kai di mii u mi puu a Egepiti köndë.”
16 Di Helodi ko fusutan taa dee womi dee ta koti luku ganjëën, hën hati fëën boonu seei te na soni. Hën a manda sëmbë go a Bëtëlëhën ku hii dee köndë dee dë zuntu ku ën, u de kii hii dee womi mii u tu jaa tja go basu. A bi du sö u di dee womi dee bi ta koti luku bi konda dëën finifini taa di mii bi sa abi dee jaa dë. 17 Sö a ko pasa taa di soni di di tjabukama u Gadu de kai Jelemia bi taki, bi ko pasa tuutuu. A bi taki taa: 18 „A di köndë de kai Lama, de ta jei wan sëmbë ta këë ta kai logologo wolo. Lakëli wë bi ta këë sö e. A bi ta këë u di dee mii fëën lasi libi. An bi kë sëmbë ganjëën möönsö, biga dee mii fëën dëdë kaba tuu.”
19 Di Könu Helodi dëdë, hën Jehoufa* manda wan basia fëën ko fan ku Josëfu a sunjan, teka a bi dë a Egepiti köndë ala. 20 Hën di basia piki ën taa: „Womi o, hopo. Tei di mii ku hën mama, nöö i toona go a Isaëli. Biga dee sëmbë dee bi ta suku di mii u kii,* tuu dëdë kaba.” 21 Nöö hën Josëfu hopo, hën a tei di mii ku hën mama, hën de toona go a Isaëli köndë. 22 Ma di Josëfu jei taa Akelausi hën ta tii Judea nëën tata Helodi kamian, hën a fëëë u toona go ala. Boiti di dë, Gadu bi manda wan basia ko piki ën a sunjan taa an musu toona go a Judea. Fëën mbei a bia go ta libi a di pisiwata de kai Galilea. 23 Di a dou ala, hën a go libi a di köndë de kai Nazalëti. Nöö sö di soni di di tjabukama u Gadu bi taki a fesi, bi ko pasa tuutuu. A bi taki taa: „De o kai ën Nazalëti sëmbë.”*