Dee soni dee Mateosi sikifi
1 Di buku aki ta konda soni u di libi* u Jesosi Keesitu,* di dë wan womi mii* u Dafiti, söseei wan bakamii u Abahamu.
2 Abahamu pai Isaki,
hën Isaki pai Jaköpu,
hën Jaköpu ko pai Juda ku dee baaa fëën.
3 Juda tei Tamali, nöö hën ku ën pai Pëlësi ku Zelaki.
Hën Pëlësi toona ko pai Esilön,
hën Esilön ko pai Lamu.
4 Lamu ko pai Aminaada,
hën Aminaada ko pai Nakisön,
hën Nakisön ko pai Salima.
5 Salima tei Lakabu, nöö hën ku ën pai Boasi,
hën Boasi tei Luti hën de pai Obëti,
hën Obëti pai Isai.
6 Isai pai Könu Dafiti,
hën Könu Dafiti toona pai Salumön ku di mujëë u Ulia di a bi tei.
7 Salumön toona pai Lahabiam,
nöö hën Lahabiam toona pai Abia,
nöö hën Abia pai Asa.
8 Asa ko pai Josafati,
hën Josafati toona pai Jolam,
hën Jolam toona pai Usia.
9 Usia pai Jotam,
hën Jotam ko pai Akasi,
hën Akasi pai Hesikia.
10 Hesikia pai Manasë,
hën Manasë pai Amön,
hën Amön pai Josia.
11 Josia ko pai Jekonia ku dee baaa fëën a di pisiten di dee Babilön sëmbë ko kisi dee Dju tja go a Babilön.
12 Baka di de tja dee Dju go a Babilön, hën Jekonia pai Sejatiëli,
hën Sejatiëli pai Zelubabëli.
13 Zelubabëli pai Abiutu,
hën Abiutu pai Eliakim,
hën Eliakim toona pai Azölu.
14 Azölu pai Zadöki,
hën Zadöki pai Akim,
hën Akim toona pai Eliutu.
15 Eliutu pai Eliasali,
hën Eliasali pai Maatan,
hën Maatan ko pai Jaköpu.
16 Jaköpu ko pai Josëfu, nöö Josëfu hën wë da di manu u Malia. Nöö Malia bi dë di mama u Jesosi, di dë di Keesitu.
17 Nöö sö u kai 14 avo u Masa Jesosi kumutu a di ten u Abahamu te dou di ten u Dafiti. U toona kai 14 avo kumutu a di ten u Dafiti te dou di ten di de tei dee Dju tja go a Babilön. Hën u toona kai 14 avo, kumutu a di ten di de tei dee Dju tja go buta a katibo a Babilön te dou di ten di de pai di Keesitu.
18 Woo taki u di fasi fa de waka pai Jesosi Keesitu. A di pisiten di Jesosi mama Malia bi mbei buka fëën ku Josëfu tööu, hën di kaakiti u Gadu bi mbei a ko dë ku bëë. A di ten dë Malia ku Josëfu an bi tööu jeti. 19 Ma u di Josëfu, di manu* u Malia bi dë wan bunuhati womi, mbei an bi kë dëën sen a lanti. Fëën mbei a bi kë booko di buka di hën ku ën bi mbei u de tööu* söndö u mbei sëmbë sabi. 20 Ma di a pakisei dee soni aki te a kaba, hën a sunjan wan basia u Jehoufa* ko nëën. Hën di basia piki ën taa: „Josëfu, ju di bakamii u Dafiti dë, na fëëë fii tja Malia di mujëë fii go a wosu e. Biga di bëë di i si a dë ku ën naandë nöö di kaakiti u Gadu hën mbei a ko dë ku ën. 21 A o pai wan womi mii, nöö i musu kai ën Jesosi.* Biga hën o puu libisëmbë a hogi basu.” 22 Di soni aki pasa sö, u mbei dee soni di Jehoufa* bi mbei di tjabukama fëën taki, pasa tuutuu. 23 A bi taki taa: „Un haika e, dee sëmbë. Di mujëë di an duumi ku womi wan daka, hën wë o ko dë ku bëë e, nöö a o pai wan womi mii. Nöö de o kai ën Emanuwëli.” Di në dë kë taki „Gadu dë ku u”.
24 Nöö di Josëfu weki a duumi, hën a du di soni di di basia u Jehoufa* bi piki ën faa du. A tööu ku Malia, hën a tei ën buta a wosu. 25 Ma an duumi ku ën möönsö u tefa a ko pai wan womi mii, hën a kai ën Jesosi.