Dee soni dee Mateosi sikifi

9 Baka di a subi a boto, hën a haba go a di woto banda a di köndë ka a bi ta libi.* 2 Di a dou ala, hën wanlö sëmbë tja wan lanma di bi dë kandikandi a wan bedi* ko nëën. Di a si fa di biibi u dee sëmbë bi taanga tjika, hën a piki di lanma taa: „Baa o, na tei bookohedi e. Mi da i paadon u dee hogilibi fii.” 3 Ma so u dee sabima u Wëti dee bi sai dë bi ta pakisei taa: „Di womi aki ta wisiwasi Gadu.” 4 U di Jesosi bi sabi andi de bi ta pakisei, mbei a piki de taa: „Faandi mbei un ta pakisei hogi soni a unu hati sö? 5 Wë undi u dee soni aki möön fukë u taki a buka? Fii taa: ’Mi da i paadon u dee hogilibi fii’, naa fii taa: ’Hopo, nöö i waka go?’ 6 Ma mi kë lei unu taa di sëmbë di ko dë Libisëmbë Miii abi makiti a goonliba aki u da sëmbë paadon u dee hogilibi u de.” Hën a bia piki di lanma taa: „Hopo taanpu, nöö i tei di bedi fii, nöö i go a wosu.” 7 Hën di lanma hopo, hën a go a wosu e. 8 Di dee sëmbë si di soni aki, hën a bigi da de te na soni. Hën de gafa Masa Gaangadu, u di a da libisëmbë sö wan gaan kaakiti.

9 Baka di Jesosi kumutu dë, hën a si wan womi de kai Mateosi dë sindosindo a wan kantoo ka de ta paka lantimöni. Hën a piki ën taa: „Ko dë bakama u mi.” Di a piki ën sö, hën Mateosi hopo, hën a bigi waka nëën baka. 10 Baka di dë, Jesosi bi go njan a Mateosi pisi. Hën wanlö pii-lantimönima ku wanlö sëmbë dee an ta libi bunu a Gadu wojo, ko a Mateosi pisi u de ko njan makandi ku Jesosi ku dee woto bakama fëën. 11 Di dee Faliseima ko si de, hën de piki dee bakama u Jesosi taa: „Faandi mbei di Mësitë fuunu ta njan makandi ku dee pii-lantimönima ku dee sëmbë dee an ta libi bunu a Gadu wojo?” 12 Di Jesosi jei di soni di de taki, hën a taki da de taa: „Sëmbë di an dë ku suwaki an abi data fanöudu, ma dee suwakima de abi data fanöudu. 13 Un go, nöö un kai pakisei a di soni di Gadu bi taki. A bi taki taa: ’Na mbeti mi kë fuun tjuma da mi e, ma mi kë fuun abi tjalihati u wotowan.’ Wë ma ko u ko kai sëmbë di dë bumbuu sëmbë kaa e, ma mi ko u ko kai dee sëmbë dee an ta libi bunu a Gadu wojo.”

14 Hën dee bakama u Johanisi di Dopuma ko a Jesosi, hën de hakisi ën taa: „U ku dee Faliseima ta dë söndö njan u wan pisiten, ma nöö faandi mbei dee bakama fii an ta du sö tu?” 15 Hën Jesosi piki de taa: „Te wan womi ta tööu, nöö dee mati fëën ta dë makandi ku ën a di piizii dendu. De an ta tjali a di pisiten dë, na sö nö? Ma wan daka o ko ka an o dë ku de möön, nöö nëën ufö de o ta tjali ta dë söndö njan u wan pisiten. 16 De an ta tei wan njunjun koosu pisi lapu wan awoo koosu e. Biga di njunjun koosu o hai di awoo wan, nöö di baaku o ko möön bigi. 17 Leti sö nöö sëmbë an ta tei njunjun win lai a wan awoo mbeti kakisa saku e. Biga di njunjun win o soopu, nöö di saku o tënë tuwë hii di win kaba a sösö. Ma sëmbë ta lai njunjun win a wan njunjun mbeti kakisa saku. Te de du sö, nöö di saku ku di win tuu o dë bumbuu.”

18 Masa Jesosi an bi kaba fan seei, hën wan heihei womi waka ko tjökö kini nëën fesi, hën a taki taa: „Di mujëë mii u mi suwaki gaanfa, nöö kandë sonte a dëdë kaa. Ma mi ko hakisi ee i sa buta maun nëën liba be a ko a libi baka.”

19 Hën Jesosi ku dee bakama fëën hopo, hën de waka a di womi baka. 20 Hën wan mujëë di bi ta lasi buuu tuwalufu jaa longi waka a Jesosi baka, hën a panjan dee jëkëjëkë u di koosu buka fëën. 21 A bi ta pakisei nëën hati taa: „Ee di koosu fëën seei mi feni panjan tjë sö, nöö mi o bëtë.” 22 Hën Jesosi bia luku di mujëë, hën a taa: „Mujëë o, na fëëë e! Di biibi fii, hën mbei i ko bëtë.” Hën wantewante dë di mujëë ko bëtë.

23 Di Jesosi dou a di wosu u di heihei womi, hën a si sëmbë ta pëë tjalitjali poku ku foloiti, nöö wotowan bi ta këë ta kai wolo. 24 Hën Jesosi taki taa: „Dee sëmbë, un go ufö baa. Biga na dëdë di mujëë mii dëdë e, ma a ta duumi.” Di de jei di soni dë, hën de bigi ta lafu ën ta mbei ën fa. 25 Di dee sëmbë go a döö, hën a denda go a di kamba ka di mujëë mii bi dë, hën a panjëën a maun, hën di mii hopo. 26 Di soni di Jesosi bi du dë bi paaja dou hii di pisiwata naandë.

27 Di Jesosi bi ta kumutu a di pisiwata dë, hën tu bookowojoma ko ta waka nëën baka ta bai taa: „Womi Mii* u Dafiti, a’ tjalihati fuu baa!” 28 Di Jesosi denda go a wan wosu, hën dee tu bookowojoma go nëën, hën a hakisi de taa: „Un ta biibi taa mi sa kula unu ö?” Hën de piki taa: „Aai o Masa, u ta biibi.” 29 Hën a nama maun a de wojo, hën a taa: „Be a pasa ku unu leti kumafa un ta biibi dë.” 30 Baka di a taki di soni dë, hën wojo u de ko limbo. Ma Jesosi bi piki de taa: „Wan musu kondëën da na wan sëmbë e.” 31 Ma di de kai a döö, hën de paaja di soni di Jesosi du a hii di pisiwata dë.

32 Di dee womi bi nango, hën wanlö sëmbë tja wan womi ko a Jesosi. Di womi aki an bi sa fan, nöö wan taku soni bi dë nëën liba. 33 Di Jesosi puu di taku soni nëën liba, hën di womi bigi ta fan. Di dee sëmbë dee bi sai dë si andi Jesosi du, hën a bi foondo de. Hën de taa: „Wa bi si di lö soni aki a Isaëli wan daka.” 34 Ma dee Faliseima bi taki taa: „Di tiima u dee taku soni, hën ta heepi ën faa puu taku soni a sëmbë liba.”

35 Hën Jesosi bigi ta paaja di bunu buka u di Tii u Gadu a dee gaangaan köndë ku dee pikipiki wan tuu. A bi ta lei sëmbë soni a dee wosu ka dee Dju nango dini Gadu, söseei a bi ta kula hiniwan siki di sëmbë bi abi. 36 Di a si dee gaan hia sëmbë, hën tjali u de kisi ën. Biga a si taa de bi ta tja fuka, söseei taa de bi dë weiwei, kuma sikapu dee dë söndö sëmbë u kiija de. 37 Hën a piki dee bakama fëën taa: „Di njanjan lepi, nöö a hia, ma wookoma an dë tjika u koti ën. 38 Fëën mbei un musu begi di Masa di abi di wooko, faa manda möön hia wookoma u de koti di njanjan fëën.”