Dee soni dee Mateosi sikifi

7 „Wan kuutu sëmbë möön e, nöö Gadu an o kuutu unu tu. 2 Biga a di fasi fa un ta kuutu sëmbë, a di seei fasi dë Gadu o kuutu unu tu. Nöö di fasi fa un ta libi ku wotowan, sö de o libi ku unu tu. 3 Wë nöö faandi mbei i ta luku di pau pisi di dë a i baaa wojo, ma ja ta si di posu di dë a di u fii seei wojo? 4 Nasö unfa i sa piki i baaa taa: ’Be mi puu di pau pisi di dë a i wojo da i’, hii fa wan posu dë a di u fii seei wojo? 5 I bödjëëma ju! Puu di posu di dë a i wojo fosu, nöö joo si soni bumbuu fii sa puu di pau pisi di dë a i baaa wojo.

6 Na tuwë di bumbuu soni di i abi da dee dagu, söseei na tuwë dee diidii sitonu* fii da dee hagu. Biga ee i du sö, nöö de sa makisa de ku futu fiönfiön, nöö de bia ko kisi i njan tënë pisipisi.

7 Un musu ta hakisi soni nöömö, nöö woon feni. Un musu ta suku nöömö, nöö woon feni. Un musu ta naki di döö nöömö, nöö a o jabi da unu. 8 Biga hiniwan sëmbë di ta hakisi, ta feni. Hiniwan sëmbë di ta suku, ta feni. Nöö hiniwan sëmbë di ta naki di döö, hën de o jabi döö da. 9 Wë undi fuunu o da di mii fëën wan sitonu, ee hën a hakisi i bëëë? 10 Nasö ee hën a hakisi i fisi, ja o langa wan sindeki dëën, na sö u? 11 Wë ee unu di ta du soni di an bunu a Gadu wojo saanfa u da dee mii fuunu bumbuu soni, nöö un sa dë seiki taa di Tata fuunu di dë a liba ala o da sëmbë bumbuu soni te de hakisi ën!

12 Di fasi fa un kë u sëmbë libi ku unu, nöö sö un musu libi ku de tu e.* Di soni aki dee Wëti ku dee soni di dee tjabukama bi sikifi kë taki.

13 Un denda a di piki döö, biga di pasi di tja sëmbë go kaba a sösö baai, nöö di dööbuka fëën bigi, nöö te a hia sëmbë ta pasa nëën. 14 Ma di pasi di ta tja sëmbë go a libi sumaa, nöö di dööbuka fëën piki, nöö wantu sëmbë nöö ta feni ën.

15 Un musu ta köni ku dee poipoi tjabukama. Biga de ta ko a unu bisibisi ku sikapu uwii kuma de da sikapu, hii fa de da taku mbeti* di kë njan unu tënë pisipisi. 16 Woon ko sabi de te un luku di fasi fa de ta du soni.* Sëmbë an ta booko fuuta a wan maka pau, nasö a taku uwii, na sö nö? 17 Hiniwan bumbuu pau ta pai bumbuu njanjan, ma hiniwan poipoi pau ta pai poipoi njanjan. 18 Wan bumbuu pau an sa pai poipoi njanjan, nöö wan poipoi pau an sa pai bumbuu njanjan tu. 19 Hiniwan fuuta pau di an ta pai bumbuu njanjan, de o faa puu koti tuwë a faja. 20 Fëën mbei mi piki unu taa woon sabi dee lö sëmbë dë te un luku di fasi fa de ta du soni.

21 Na hii sëmbë di ta kai mi ’Masa’ o go a di Tii u Gadu di dë a liba ala. Ma dee sëmbë dee ta du soni kumafa mi Tata kë, de wanwan tö o go ala. 22 Di daka o dou ka sömëni sëmbë o hakisi mi taa: „Masa, na u bi ta tja i në ta du tjabukama wooko nö? Na u bi ta kai i në ta jaka taku soni puu a sëmbë liba nö? Söseei na u bi ta kai i në ta du sömëni foombo soni nö?” 23 Ma mi o piki de taa: „Ma pena sabi unu seei! Un waka pasa go kumutu aki, un hogiduma unu!”

24 Fëën mbei hiniwan sëmbë di jei dee soni dee mi taki, hën a ta du de, nöö a o dë kuma wan köni womi di mbei di wosu fëën a sitonu goon. 25 Di tjuba kai gbulululu, hën gaan wata ko, söseei gaan ventu böö naki di wosu. Ma tökuseei an booko kai, u di di wosu bi seti bunu a sitonu liba. 26 Ma hiniwan sëmbë di jei dee soni dee mi taki, nöö an ta du de, o dë kuma wan don womi di mbei di wosu fëën a sandu liba. 27 Di tjuba kai gbulululu, hën gaan wata ko, söseei gaan ventu böö naki di wosu. Hën di wosu booko kai kaba a sösö fiaa.”

28 Di Jesosi taki dee soni aki te a kaba, hën dee gaan hia sëmbë dee bi ta haikëën tuu bi foondo seei u di fasi fa a bi ta lei sëmbë soni. 29 Biga an bi ta lei sëmbë soni kumafa dee sabima u Wëti bi ta du ën, ma a bi ta lei sëmbë soni kuma Gadu seei hën bi mandëën.