Dee soni dee Maikusi sikifi

12 Hën a konda wan woto da de. A taa: „Wan womi bi abi wan goon fëën, hën a paandi doloifi nëën te a kaba. Hën a mbei wan peni lomboto di goon. A seeka wan kamian u makisa doloifi mbei win, hën a mbei wan hei wosu u dee wakitima sa ta luku di goon. Baka di dë, hën a juu di goon da wanlö sëmbë di ta paandi soni, hën a go fëën a woto köndë. 2 Di dee doloifi lepi, hën a manda wan saafu fëën go a dee sëmbë faa go tei so u dee doloifi dee a bi musu feni u di goon, tja ko dëën. 3 Ma dee sëmbë dee a bi juu di goon da kisi ën, hën de fon mën te a fon, nöö hën de mandëën go maun hoo. 4 Nöö hën di womi toona manda wan woto saafu go möön. Hën de naki ën a hedi dëën makei, söseei de dëën sen. 5 Nöö hën di womi manda wan woto saafu go möön, hën de kii di dë. Hën a ta puu saafu ta manda nango a dee sëmbë kodo. So u de de ta fon, so u de de ta kii. 6 Te u kaba fëën, hën a manda di u fëën seei womi mii go. A bi taki taa: ’De o abi lesipeki dëën, u di a dë mii u mi.’ 7 Ma dee sëmbë dee bi juu di goon bi taki da de na de taa: ’Te di sëmbë di abi di doloifi goon dëdë, nöö di womi mii aki, hën o feni di goon. Wë boo kii ën, nöö di goon o fika da u wanwan.’ 8 Hën dee sëmbë kisi ën, hën de kii ën, hën de tjëën go tuwë a döösë u di doloifi djai. 9 Wë nöö andi un mëni taa di womi di abi di goon o du? A o kii dee sëmbë dee a bi juu di goon da tuu fiaa, nöö a o juu di goon da woto sëmbë. 10 Wan bi lesi andi Gadu Buku bi taki nö? A bi taki taa: ’Dee sëmbë dee ta mbei wosu tuwë wan sitonu a kapëë, nöö hën di sitonu dë ko dë di mama sitonu di ta hoi di wosu. 11 Jehoufa* hën seti ën sö, nöö a dë wan gaan foombo soni da u.’”

12 Di a taki sö te a kaba, hën de bi kë kisi ën tja go söötö, u di de bi sabi taa de wë Jesosi bi ta taki. Ma u di de bi ta fëëë dee sëmbë mbei de an du ën. Fëën mbei de waka go disëën dë.

13 Hën de manda wantu Faliseima ku wantu u dee bakama u di paatëi u Helodi go a Jesosi u de kisi ën tai ku fan. 14 Di de dou a Jesosi, hën de piki ën taa: „Mësitë o, u sabi taa i ta taki tuutuu soni, söseei ja ta suku bunu në a sëmbë, biga ja ta luku fesi, ma i ta lei sëmbë soni u Gadu gbelingbelin kumafa de dë. A fiti u paka di Gaan könu u Loomë lantimöni ö, naa an fiti u pakëën?” 15 Jesosi bi sabi taa bödjëë de ko ta pëë u de musu kisi ën, nöö hën a taki da de taa: „Faandi mbei un ta suku u tai mi ku fan? Un tja wan soofu möni* ko da mi.” 16 Hën de tja wan ko dëën. Hën a piki de taa: „Ambë abi di në ku di fesi di dë a di möni liba aki?” Hën de taa: „Di Gaan könu.” 17 Hën Jesosi piki de taa: „Wë nöö un da könu di soni di dë u könu, nöö un da Gadu di soni di dë u Gadu.” Nöö fa a piki dë, nöö a foondo de seei.

18 Hën dee Saduseima ko nëën. Dee sëmbë aki an bi ta biibi taa sëmbë di dëdë sa toona weki ko a libi baka. Hën de hakisi ën taa: 19 „Mësitë o, Mosesi bi sikifi taa ee wan womi dëdë disa di mujëë fëën a baka söndö u de pai miii, nöö di baaa fëën musu tööu ku di mujëë dë, nöö a musu pai miii ku ën da di baaa fëën. 20 Wë nöö de bi dë seibi baaa. Nöö hën di gaanwan tööu. Te wan pisi a ko lasi libi, ma hën ku di mujëë fëën an bi pai möönsö. 21 Hën di baaa fëën tööu ku di mujëë. Te wan pisi hënseei ko lasi libi, ma hën ku di mujëë an bi pai möönsö. Te dou di u dii seei ko dëdë tu, ma an pai ku di mujëë möönsö. 22 Nöö sö hii dee seibi baaa tuu tööu ku di mujëë, ma na wan kodo u de pai miii ku ën möönsö. Te u kaba fëën, hën di mujëë seei ko lasi libi. 23 Wë nöö ee de toona ko a libi baka, nöö undi u dee seibi baaa o abi di mujëë? Biga de tuu bi tööu ku ën.” 24 Hën Jesosi piki de taa: „Wan ta fusutan andi sikifi a di Wöutu u Gadu, söseei wan sabi di kaakiti di Gadu abi tu. Fëën mbei wan ta fusutan di soni bumbuu. 25 Biga te sëmbë dëdë toona weki, nöö de an o tööu möön e, ma hii sëmbë tuu o dë kuma dee basia u Gadu dee dë a liba ala. 26 Wan bi lesi di woto a di buku u Mosesi u di uwii di bi ta kisi faja ma an bi ta tjuma möönsö nö? Gadu bi taki u dee sëmbë dee o weki ko a libi baka taa: ’Mi da di Gadu u Abahamu, di Gadu u Isaki ku di Gadu u Jaköpu.’ 27 An dë di Gadu u dee sëmbë dee dëdë, ma a dë di Gadu u dee sëmbë dee dë ku libi. Wan ta fusutan di woto kwetikweti.”

28 Wan u dee sabima u Wëti bi sai naandë ta haika de. Nöö di a si taa Jesosi piki di fan u de a wan bunu fasi, hën a hakisi ën taa: „Undi u dee wëti ta wegi möön hii dee wotowan?” 29 Hën Jesosi piki ën taa: „Di wëti di ta wegi möön dee wotowan da: ’Un dee Isaëli sëmbë, un haika e. Jehoufa* di Gadu fuu, da wan kodo Jehoufa* nöö. 30 I musu lobi Jehoufa* i Gadu ku hii i hati, ku hii i libi, ku hii i fusutan, söseei ku hii i kaakiti.’ 31 Di u tu wëti da: ’I musu lobi wotowan kumafa i lobi iseei.’ Wëti an dë di bigi kuma dee tu wëti aki.” 32 Hën di sabima u Wëti piki ën taa: „Aai Mësitë, fa i si i taki dë, sö a dë tuu. Biga ’hën tö nöö da Gadu u mundu, wotowan an dë möönsö’. 33 Di lobi di u musu lobi Gadu ku hii u hati, ku hii u fusutan, ku hii u kaakiti, söseei di lobi di u musu lobi wotowan kumafa u lobi useei, bunu möön hiniwan soni di wan sëmbë sa tja go tjuma da Gadu.” 34 Di Jesosi jei fa di womi piki a wan köni fasi, nöö hën a taa: „Ja dë longi poi fii sa ko a di Tii u Gadu dendu.” Baka di dë, nöö na wan sëmbë bi a’ hati u hakisi ën soni möön.

35 Jesosi bi ta lei sëmbë soni a di Wosu u Gadu go dou. A hakisi dee sëmbë taa: „Unfa a waka taa dee sabima u Wëti ta taki taa di Keesitu da di womi mii u Dafiti? 36 Di kaakiti u Gadu bi mbei Dafiti seei taki taa ’Jehoufa* taki da mi Masa taa: „Ko sindo a mi leti së maun u te mi buta dee felantima fii a i basu futu.”’ 37 Wë ee Dafiti seei ta kai ën Masa, nöö unfa a sa dë miii fëën?”

Dee gaan hia sëmbë dee bi sai dë bi ta haikëën ku piizii seei. 38 Di a bi ta lei dee sëmbë soni, hën a piki de taa: „Un mëni unuseei ku dee sabima u Wëti e. De lo’ u waka ta lontu ku langa djapona, söseei de lo’ te sëmbë ta da de odi a wojowojo. 39 Te de go a dee wosu ka dee Dju nango dini Gadu, nöö de nango sindo seei te a fesi,* söseei de lo’ u go sindo a dee möön bunu kamian te de go a wan piizii. 40 De ta ganjan dee mujëë dee manu u de dëdë, nöö de tei hii dee gudu u de, söseei de ta begi gaan langa begi u sëmbë musu ta si de. Dee sëmbë aki o kisi wan möön gaan sitaafu.”

41 Hën Jesosi go sindo a wan kamian ka a sa si fa sëmbë ta buta möni a dee möni këdë. Sömëni guduma bi ta buta te a hia möni a dee möni këdë. 42 Ma wan pooti mujëë di manu fëën bi dëdë kaa bi ko, hën a buta tu piki sënsi* a wan u dee möni këdë. 43 Hën Jesosi kai dee bakama fëën ko nëën, hën a piki de taa: „Mi taki da unu e, di pooti mujëë di manu fëën dëdë aki buta möön hia möni möön hii dee woto sëmbë dee ko buta möni a dee möni këdë dendu. 44 Biga hii dee woto sëmbë buta pikisö u di hia möni di de abi, ma di mujëë aki buta hii soni di a bi abi u sölugu hënseei, hii fa a pooti.”