Dee soni dee Maikusi sikifi

6 Jesosi kumutu dë, hën a go a di pisiwata ka de bi kiijëën. Hën dee bakama fëën go ku ën. 2 Di di Saba daka dou, hën a bigi ta lei sëmbë soni a di wosu ka dee Dju nango dini Gadu. Di dee sëmbë jei fa a ta lei sëmbë soni, nöö a bi bigi da de seei. Hën de bia ta hakisi deseei taa: „Naasë di womi aki kumutu ku dee lei fëën dë? Ambë dëën sö wan köni ku kaakiti faa ta du dee foombo wooko dee a ta du? 3 Nëën da di tëmbëma, di womi mii u Malia u? Nëën da di baaa u Jakobosi, Judasi ku Simön u? Na u ku dee sisa fëën ta dë aki nö?” Hën de tei ën u hogi seei. 4 Hën Jesosi piki de taa: „Wan tjabukama u Gadu sa feni gafa a hii woto köndë boiti nëën köndë, ku dee bëë fëën ku di wosudendu ka de kiijëën.” 5 Di soni dë mbei an bi du hia foombo wooko ala. Buta nöö a bi buta maun a wantu suwakima liba, hën a kula de. 6 A bi bigi a Jesosi taa dee sëmbë an bi kë biibi ën. Di a kumutu ala, hën a waka lontu a dee köndëköndë dee bi dë a zuntu u lei sëmbë soni.

7 Hën a kai dee tuwalufu apösutu, hën a manda de go tu tu sëmbë u go paaja di bunu buka, söseei a da de makiti u de puu taku soni a sëmbë liba. 8 A bi piki de taa de an musu tja soni boiti wan kokoti a maun. De an bi musu tja bëëë, de an bi musu tja saku ku soni u njan a dendu, söseei de an bi musu tja möni.* 9 De bi musu bisi susu, ma de an bi musu tja woto lai u bisi boiti di de bi bisi dë kaa. 10 A bi piki de tu taa: „Te un go a wan wosu, nöö a di wosu dë un musu tuwë lai, u te un kumutu a di köndë. 11 Ee un go a wan kamian ka sëmbë an tei unu ku wai, söseei ka de an haika unu, nöö un musu kumutu dë. Te un nango, nöö un musu naki di sandu di dë a unu basufutu puu tuwë disa naandë u lei taa de an bi libi bunu.” 12 Di a fan te a kaba, hën de go. Hën de go ta konda da dee sëmbë u de bia disa dee hogilibi u de. 13 Hën de jaka taku soni puu a sömëni sëmbë liba, söseei de lo’ fatu a sömëni suwakima sinkii, hën de kula de.

14 Könu Helodi seei bi ko jei dee soni dee bi ta pasa, u di sömëni sëmbë bi ta taki soni u Jesosi. De bi ta taki taa: „Johanisi di Dopuma hën toona weki ko a libi baka, nöö fëën mbei a abi makiti u du dee foombo wooko dë.” 15 So u de bi ta taki taa: „Elia hën di dë.” Nöö wotowan bi ta taki taa: „A dë kuma dee tjabukama fu awooten nöö.” 16 Di Helodi jei dee soni aki, hën a taa: „Johanisi di mi bi manda sëmbë go koti hën hedi puu, hën toona weki ko a libi baka.” 17 Helodi bi mbei sëmbë kisi Johanisi buta a dunguwosu u Helodiasi hedi. Fosufosu Helodiasi bi dë di mujëë u Filipi di gaan baaa u Helodi. Ma nöunöu Helodi tööu ku ën. 18 Johanisi bi lo’ u piki Helodi taa: „Ja a’ leti u tei di mujëë fii baaa e.” 19 Fëën mbei Helodiasi hoi Johanisi a bëë, nöö a bi kë kii ën. Ma an bi feni wan okasi u du ën. 20 Helodi bi ta fëëë u du hogi ku Johanisi, u di a bi ta si taa a dë wan bumbuu sëmbë di ta libi kumafa Gadu kë. A bi ta tjubi ën u sëmbë an bi sa du hogi ku ën. Nöö te Johanisi bi ta fan ku ën, nöö a bi lo’ u haikëën, hii fa dee fan u Johanisi bi ta toobi ën seei.

21 Wan daka, hën Helodiasi feni di okasi faa du di soni di a bi kë. Di Helodi fujai, hën a hoi wan gaan piizii, hën a kai hii dee heihei sëmbë u di köndë ku dee hedima u sodati ku dee möön nëbai sëmbë u Galilea. 22 Hën di mujëë mii u Helodiasi ko dou, hën a bigi baja. Di soni suti da Helodi ku dee sëmbë dee bi sai dë te na soni. Hën di könu piki di mujëë mii taa: „I sa piki mi andi i kë, nöö mi o da i ën.” 23 Hën a soi dëën taa: „Mi o da i hiniwan soni di i hakisi mi. Ee hafu u di köndë di mi ta tii aki seei i kë, mi o da i ën.” 24 Hën a go nëën mama, hën a hakisi ën taa: „Andi mi musu hakisi ën?” Hën di mama piki ën taa: „Hakisi ën di hedi u Johanisi di Dopuma.” 25 Hën wantewante dë di mujëë mii kule go a di könu, hën a piki ën taa: „Mi kë fii da mi di hedi u Johanisi di Dopuma a wan paatu dendu.” 26 Hii fa di soni aki bi hati di könu gaanfa seei, tökuseei a bi musu du di soni di di mujëë mii hakisi ën, u di a bi soi a dee sëmbë dee bi sai dë fesi. 27 Hën wantewante dë di könu manda wan sodati faa go koti Johanisi hedi puu tja ko dëën. Hën di sodati go koti Johanisi hedi puu a di dunguwosu. 28 A tja di hedi a wan paatu, hën a da di mujëë mii. Hën di mujëë mii tja di hedi go da hën mma. 29 Di dee bakama u Johanisi jei di soni aki, hën de ko tei di sinkii fëën tja go bei.

30 Di dee apösutu toona ko, hën de ko piki Jesosi hii dee soni di de bi du ku hii dee soni di de bi lei sëmbë. 31 U di sömëni sëmbë bi ta ko nëën, mbei de an bi feni ten u de njan, söseei u de böö. Hën a piki de taa: „Un ko boo go a wan kamian u wanwan fuu sa böö pikisö.” 32 Hën de subi a wan boto go a wan kamian u de go dë de wanwan. 33 Ma sëmbë bi si de di de bi nango, hën de konda da wotowan, hën sëmbë kumutu a dee peipei köndë waka ku futu go dou ka de bi nango. 34 Di Jesosi si dee gaan hia sëmbë, hën tjali u de kisi ën. Biga de bi dë kuma sikapu dee dë söndö sëmbë u kiija de. Hën a bigi lei de sömëni soni.

35 Hën de sai dë te sapate, hën dee bakama u Jesosi ko nëën, hën de taa: „Masa o, ndeti ta ko kaa, nöö u dë a wan longi kamian. 36 Manda dee sëmbë go be de go bai soni u njan a dee köndë dee dë a zuntu.” 37 Hën Jesosi piki de taa: „Un da de soni u njan.” Hën de piki ën taa: „I kë fuu go bai bëëë da dee sömëni sëmbë aki ö? Wë woo abi 200 soofu möni* fanöudu.” 38 Hën a piki de taa: „Un mëni bëëë un abi aki? Un go luku i si!” Hën de go luku te de ko, hën de piki ën taa: „U abi feifi bëëë ku tu fisi.” 39 Hën a manda dee sëmbë go sindo a dee ahun liba a kulupukulupu. 40 So u dee kulupu bi abi 100 sëmbë, nöö wotowan bi abi 50 sëmbë. 41 Hën a tei dee feifi bëëë ku dee tu fisi, hën a hopo wojo luku liba, hën a da Gadu tangi te a kaba. Nöö hën a booko dee bëëë, hën a da dee bakama fëën, hën dee bakama fëën toona da dee sëmbë u de njan. Di wan seei soni a du ku dee tu fisi. 42 Hën hii dee sëmbë njan te bëë u de fuu. 43 Hën dee bakama pii dee pisipisi bëëë dee bi fika, hën de fuu 12 manda. De bi pii dee fisi dee bi fika tu. 44 Söwan 5000 womi bi njan dee bëëë.

45 Baka di dë, hën Jesosi piki dee bakama fëën u de toona subi a boto go a di woto së banda a di köndë Bëtisaida. Ma a bi fika a baka faa manda dee sëmbë go. 46 Baka di dee sëmbë go, hën a go a wan kuun go begi. 47 Di di sonu go, hën di boto bi dë te a mindi wata, ma Jesosi bi dë hën wanwan a tela. 48 Nöö hën a dee pisiten u ganian kanda,* hën a si dee bakama fëën ta biinga u tii di boto u di di ventu bi ta böö taanga. Hën a bigi ta waka a di wata liba go miti de, ma a bi du kuma a bi o waka pasa de. 49 Di de si a ta waka a di wata liba ta ko, hën de bai taa: „Wooo! Andim’ ta si dë?” 50 Hii de tuu bi fëëë te na soni. Hën wantewante dë Jesosi bai piki de taa: „Wan fëëë e! Un tai hati. Mi wë disi.” 51 Nöö hën a subi a di boto, hën di ventu kötö piii. Di de si sö, hën de foondo te na soni. 52 Hii fa de bi si fa Jesosi tei dee bëëë hën a da dee gaan hia sëmbë u de njan, tökuseei de an bi fusutan unfa Jesosi sa du soni tjika.

53 De go tjökö a di pisiwata u Genesalëti. 54 Ma fa de kumutu a di boto ko dou dë, hën sëmbë si de sabi wante. 55 Hën dee sëmbë kule go a hii di pisiwata dë u de go tei dee suwakima u de buta a bedi tja ko a Jesosi. 56 Nöö a hiniwan köndë ka a bi nango, de bi ta tja dee suwakima ko a dee wojowojo, nöö de bi ta begi ën be a da dee suwakima pasi u de panjan di koosu buka fëën tjë sö seei. Hën hii dee sëmbë dee panjan di koosu buka fëën ko bëtë.