Dee soni dee Mateosi sikifi
21 Di de zuntu ku Jelusalën, hën de tapa a di köndë de kai Bëtifaigi a di Olëifi Kuun. Hën Jesosi piki tu u dee bakama fëën taa: 2 „Un go a di köndë di un ta si a unu fesi dë, nöö woon si wan buliki dë taitai ku di mii fëën nëën bandja. Un lusu de, nöö un tja de ko da mi. 3 Ee wan sëmbë hakisi unu naasë un nango ku de, nöö un musu piki ën taa: ’Masa abi de fanöudu.’ Nöö wantewante dë a o disa de da unu.”
4 Di soni aki bi pasa sö, u mbei di soni di di tjabukama u Gadu bi taki gaanduwe a fesi pasa tuutuu. A bi taki taa: 5 „Piki di mujëë mii u Siön taa: ’Un luku di könu fuunu ta ko. A abi saapifasi. A dë sindosindo a wan buliki liba. Awa, a sindo a wan buliki mii liba.’”
6 Nöö hën dee tu bakama u Jesosi du leti kumafa a bi manda de. 7 De tja di buliki ku di buliki mii ko dëën, hën de jabi koosu a de liba, hën Jesosi go sindo a di buliki mii liba. 8 Dee hia sëmbë dee bi sai dë bi ta jabi dee koosu u de a di pasi liba, nöö wotowan bi ta koti palo maun ta tuwë a di pasi liba da Jesosi. 9 Boiti di dë, wanlö sëmbë bi ta waka nëën fesi, nöö wotowan bi ta waka nëën baka ta bai taa: „Kee Masa Gadu, u ta begi i baa, tjubi di Womi Mii* u Dafiti da u. Limbo pasi da di sëmbë di ta ko a di në u Jehoufa.* Ju di Gadu di dë a di möön hei kamian a liba ala, u ta begi i fii tjubi ën da u baa!”
10 Di Jesosi dou a Jelusalën, hën dee sëmbë ta mbei wanjanwanjanwanjan ta bai taa: „Ambë da di womi aki?” 11 Hën dee sëmbë ta taki taa: „Di womi aki da di tjabukama de kai Jesosi. A kumutu a Nazalëti a di pisiwata u Galilea.”
12 Jesosi denda go a di Wosu u Gadu, hën a jaka hii dee sëmbë dee bi ta sei soni, söseei dee bi ta bai soni naandë. A kandi dee tafa u dee sëmbë dee bi ta tooka möni ku dee bangi u dee sëmbë dee bi ta sei pomba tuwë djolou a goon. 13 Hën a piki de taa: „A sikifi a Gadu Buku taa ’di Wosu u mi da wan kamian ka sëmbë musu ko ta begi’. Ma uun tei ën buta ko tan kamian u fufuuma.” 14 Di a bi dë a di Wosu u Gadu, hën wanlö bookowojoma ku wanlö lanma bi ko nëën, hën a kula de.
15 Di dee fesima u dee begima ku dee sabima u Wëti si dee foombo soni di Jesosi bi du, söseei di de jei fa dee womi mii bi ta bai a di Wosu u Gadu taa: „Kee Masa Gadu, u ta begi i baa, tjubi di Womi Mii* u Dafiti da u.” Hën hati u de boonu te na soni. 16 Hën de taki da Jesosi taa: „Ja ta jei andi dee mii aki ta taki nö?” Hën Jesosi piki de taa: „Aai, mi ta jei. Wan bi lesi a di buku u Gadu taa Gadu buta dee piki mii u de gafëën te dou dee mii dee dë a bobi jeti ö?” 17 Hën a waka go disa de dë, hën a go a di köndë de kai Betania, hën a duumi ala.
18 Di debooko fëën fuukufuuku, hën a toona go a Jelusalën, hën hangi ko kisi ën a pasi. 19 Hën a si wan fuuta pau a bandja pasi de kai figa, ma an feni na wan fuuta nëën. Uwii nöö di pau bi abi. Hën a piki di pau taa: „Ja o pai fuuta nöiti möön.” Hën wantewante dë di pau dëë tjakaa. 20 Di dee bakama fëën si di soni aki, hën a bigi da de te na soni. Hën de hakisi taa: „Unfa a waka taa di pau du dëë wantewante dë?” 21 Hën Jesosi piki de taa: „Mi taki da unu e, ee un ta biibi tuutuu, nöö na di soni di mi du ku di pau aki wanwan woon sa du, ma woon sa piki wan kuun taa ’hopo kumutu aki, nöö go a di ze’, nöö a o du leti kumafa un taki. 22 Biga ee un abi biibi tjika, nöö hiniwan soni di un begi fëën woon feni.”
23 Baka di a denda go a di Wosu u Gadu, hën dee fesima u dee begima ku dee gaanwomi u di köndë ko nëën di a bi dë ta lei sëmbë soni, hën de hakisi ën taa: „Ambë manda i fii du dee soni aki? Ambë da i taki fii du dee soni aki?” 24 Hën Jesosi piki de taa: „Miseei o hakisi unu wan soni. Ee un piki mi, nöö miseei o piki unu ambë dam’ taki u mi du dee soni aki. 25 Ambë bi manda Johanisi faa dopu sëmbë? Gadu ö, naa libisëmbë?” Hën de go a së go dë ta pakisei di soni nango ta ko. De ta taki taa: „Ee u piki taa ’Gadu hën mandëën’, nöö a o hakisi u taa ’faandi mbei wan biibi ën’? 26 Ma ee u taki taa ’libisëmbë hën mandëën’, nöö u musu mëni useei ku dee sëmbë aki, u di de bi ta si Johanisi kuma wan tjabukama.” 27 Hën de piki Jesosi taa: „Wë wa sabi.” Hën a piki de taa: „Nöö miseei an o piki unu ambë da mi taki u mi du dee soni aki.
28 Be mi konda wan woto da unu. Nöö un musu pakisei ën bunu e. Wan womi bi abi tu womi mii fëën. Hën a go a di möön gaanwan, hën a piki ën taa: ’Baa o, tide i musu go wooko a di goon e.’ 29 Hën di womi mii piki ën taa: ’Ma o go e.’ Bakaten di soni di a piki hën tata ko hati ën, hën tökuseei a go wooko a di goon. 30 Hën di tata go a di pikiwan, hën a piki ën di wan seei soni. Hën di pikiwan taa: ’Antoobi taata, mi o go.’ Ma an go wooko a di goon. 31 Undi u dee tu womi mii aki piki hën tata buka?” Hën de piki ën taa: „Di fosuwan.” Hën Jesosi piki de taa: „Mi taki da unu taa dee pii-lantimönima ku dee jajo mujëë* o pasa go a di Tii u Gadu ufö unu. 32 Biga Johanisi ko lei unu unfa un musu libi kumafa Gadu kë, ma tökuseei wan bi biibi ën. Ma dee pii-lantimönima ku dee jajo mujëë bi biibi ën. Nöö hii fa un bi si taa de biibi ën, tökuseei wan bia ko ta biibi ën.
33 Be mi konda wan woto da unu möön. Wan womi bi abi wan goon fëën, hën a paandi doloifi nëën te a kaba. Hën a mbei wan peni lomboto di goon. A seeka wan kamian u makisa doloifi mbei win, hën a mbei wan hei wosu u dee wakitima sa ta luku di goon. Baka di dë, hën a juu di goon da wanlö sëmbë, hën a go fëën a woto köndë. 34 Di dee doloifi lepi, hën a manda dee saafu fëën go a di goon u de go koti de. 35 Ma dee sëmbë dee a bi juu di goon da, bi fon wan u dee saafu, de kii wan u de, hën de naki wan u de ku sitonu kii. 36 Hën a toona manda woto saafu go a di goon u de go koti dee doloifi. Dee saafu aki bi hia möön dee a bi manda di fosu pasi. Ma dee sëmbë dee bi juu di goon bi du di wan seei soni ku de. 37 Te u kaba fëën, hën a manda di u fëën seei womi mii go. A bi taki taa: ’De o abi lesipeki dëën, u di a dë mii u mi.’ 38 Di dee sëmbë dee bi juu di goon si di womi mii, hën de taki taa: ’Te di sëmbë di abi di doloifi goon dëdë, nöö di womi mii aki, hën o feni di goon. Wë boo kii ën, nöö di goon o fika da u wanwan!’ 39 Hën dee sëmbë kisi ën tja go a döösë u di djai, hën de kii ën. 40 Ma nöö te di sëmbë di abi di goon seei ko, nöö andi un mëni taa a o du ku dee sëmbë dee bi juu di goon?” 41 Hën de taa: „U di de abi hogihati mbei a o kii de tuu fiaa. Nöö a o juu di goon da sëmbë di a sabi taa o dëën dee fuuta u di goon fëën te de lepi.”
42 Hën Jesosi piki de taa: „Wan bi lesi andi Gadu Buku bi taki nö? A bi taki taa: ’Dee sëmbë dee ta mbei wosu tuwë wan sitonu a kapëë, nöö hën di sitonu dë ko dë di mama sitonu di ta hoi di wosu. Jehoufa* hën seti ën sö, nöö a dë wan gaan foombo soni da u.’ 43 Di soni aki mbei mi ta taki da unu taa Gadu o puu di Tii fëën a unu, nöö a o da wan woto nasiön di ta du soni kumafa a kë. 44 Di sëmbë di naki futu kai a di sitonu aki liba, o kisi gaan makei. Nöö ee di sitonu aki kai a wan sëmbë liba, nöö a o basiti kaba a sösö.”
45 Di dee fesima u dee begima ku dee Faliseima jei dee woto aki, nöö de bi sabi taa de wë Jesosi bi ta taki. 46 De bi kë kisi ën tja go söötö, ma u di de bi ta fëëë dee sëmbë mbei de an du sö. Biga dee sëmbë aki bi ta si Jesosi kuma wan tjabukama u Gadu.