Dee soni dee Maikusi sikifi
1 A di lö fasi aki di bunu buka di nama ku Jesosi Keesitu, di Womi Mii u Gadu ta bigi. 2 Di tjabukama Jesaaja bi sikifi taa: „(Haika e, mi o manda wan bosikopuma u mi go a i fesi faa limbo pasi da i!) 3 Wan sëmbë ta bai a di sabana taa: ’Un seeka di pasi da Jehoufa* ooo, be a dë tololoo dëën!’” 4 Johanisi di Dopuma bi dë a di sabana ta konda da sëmbë taa de musu dopu u lei taa a hati de taa de an bi libi bunu a Gadu wojo, sö taa de bi sa kisi paadon u dee soni di de bi du. 5 Nöö hii dee sëmbë u di pisiwata u Judea, ku hii dee sëmbë dee ta libi a Jelusalën bi nango nëën. A bi ta dopu* de a di Joodan lio, nöö de bi ta taki a hii sëmbë fesi un hogi de bi du. 6 Johanisi bi ta bisi koosu di de mbei ku di puuma u wan mbeti de kai kamëli, nöö a ta tai wan banti nëën mindi di de mbei ku mbeti kakisa. A bi ta njan atiti, söseei a bi ta bebe höniwata. 7 A bi ta konda da sëmbë taa: „Wan sëmbë o ko a mi baka di abi makiti möön mi. Ma fiti seei u mi sa bendi lusu di susu fëën puu nëën futu. 8 Mim ta dopu unu ku wata, ma di sëmbë dë o dopu unu ku di kaakiti u Gadu.”
9 Nöö di juu dë, Jesosi bi kumutu a Nazalëti a di pisiwata u Galilea ko a Johanisi faa bi sa dopu ën a di Joodan lio. 10 Wantewante di Jesosi hopo kumutu a di wata, hën mundu jabi wajaa, hën di kaakiti u Gadu saka ko nëën liba kuma wan pomba. 11 Hën wan töngö piki a liba ala. A taa: „I da di lobi Womi Mii u mi. Libi fii ta kai ku mi.”
12 Hën wantewante dë di kaakiti u Gadu tjëën go a wan sabana. 13 Hën a sai dë 40 daka, hën Saatan ko poobëën. Hogi mbeti bi dë a di sabana tu, ma dee basia u Gadu bi heepi ën.
14 Di de kisi Johanisi söötö, hën Jesosi go a Galilea go konda di bunu buka u Gadu da sëmbë. 15 A bi ta taki taa: „Di juu di Gadu buta dou e, nöö di Tii u Gadu ko zuntu. Un musu bia ko ta libi kumafa Gadu kë, nöö un biibi di bunu buka u Gadu.”
16 Di Jesosi bi ta waka a di lampeesi u di ze u Galilea, hën a si Simön ku hën baaa Andiasi ta tuwë nëti go a di ze. Dee tu womi aki bi dë sëmbë di ta kisi fisi. 17 Jesosi piki de taa: „Un ko waka a mi baka, nöö mi o mbei un ko ta kisi libisëmbë kumafa de ta kisi fisi.” 18 Hën wantewante dë de disa dee nëti u de, hën de go ta waka nëën baka. 19 Di a waka go möön longi, hën a si dee tu womi mii u Zebedeosi. Wan u de da Jakobosi, nöö di wotowan da Johanisi. De bi dë a wan boto ta seeka dee nëti u de. 20 Hën Jesosi kai de. Hën de kumutu a di boto disa de tata Zebedeosi naandë ku dee womi dee bi ta wooko da de, hën de go waka a Jesosi baka. 21 Hën de go a Kapënaumi.
Di di Saba daka dou, hën a go a di wosu ka dee Dju nango dini Gadu, hën a bigi ta lei sëmbë soni. 22 Hii sëmbë foondo gaanfa seei u di fasi fa a bi ta lei de soni. Biga a bi ta lei sëmbë soni kuma Gadu seei hën bi mandëën. An bi ta lei de soni kuma dee sabima u Wëti. 23 A di daka dë seei wan womi di bi dë ku wan taku soni nëën liba, bi dë a di wosu ka dee Dju nango dini Gadu. Nöö hën a bi bai taa: 24 „Jesosi u Nazalëti, andi seei u ku i abi? I ko aki fii kaba u a sösö nö? Wë mi sabi ambë da i. I wë da di Apaiti Sëmbë u Gadu di a manda ko!” 25 Nöö hën Jesosi bai ën taa: „Kabuka dë! Kumutu a di sëmbë liba wantewante!” 26 Hën di taku soni naki di womi tuwë a goon, hën sinkii u di womi ta tëëmë tjatjatjatja. Hën a bai taanga ufö a kumutu nëën liba awaa. 27 Dee sëmbë foondo seei, hën de ta taki da de na de taa: „Dee sëmbë, andi u ta si aki? Njunjun lei nö? Di sëmbë aki abi taki a dee taku soni dee ta ko a sëmbë liba, nöö de ta piki hën buka a soni.” 28 Hën wantewante dë sëmbë paaja di buka aki go a hii dee köndëköndë u Galilea tuu.
29 Hën de kumutu a di wosu ka dee Dju nango dini Gadu, hën de go a di wosu u Simön ku Andiasi. Johanisi ku Jakobosi seei bi go tu. 30 Di mai u Simön bi dë sikisiki pëtëë a bedi, u di fëbë bi kisi ën. Hën de kondëën da Jesosi. 31 Hën Jesosi waka go nëën, hën a panjëën a maun hopo ën sindo, hën a ko bëtë. Hën a bigi seeka soni u njan da de.
32 Di de dë tefa sonu go, hën dee sëmbë bigi tja hii pei sëmbë dee bi dë ku peipei suwaki ku sëmbë dee bi abi taku soni a de liba ko nëën. 33 Hii sëmbë u di köndë tuu fiaa hai ko a di dööbuka dë. 34 Hën Jesosi kula sömëni sëmbë ku dee peipei siki u de te a kaba. A puu taku soni a sëmbë liba tu. Ma an da dee taku soni pasi u de fan, biga de bi sabi taa hën da di Keesitu.*
35 Hën a di fuuku mamate ufö kamian limbo, nöö hën Jesosi hopo go a döö go suku wan piii kamian faa begi. 36 Hën Simön ku dee wotowan go ta suku ën tefa de ko si ën. 37 Hën de piki ën taa: „Hii sëmbë ta suku i.” 38 Hën Jesosi piki de taa: „Boo go a wan woto kamian. Boo go a dee köndë dee dë a zuntu fuu go paaja di bunu buka da de tu. Biga u di soni dë mbei mi ko.” 39 Hën a ta paaja di buka da sëmbë a dee wosu ka dee Dju nango dini Gadu a hii di pisiwata u Galilea, söseei a bi ta puu taku soni a sëmbë liba.
40 Wan womi di bi abi kököbë ko nëën, hën a tjökö kini a goon nëën fesi, hën begi ën taa: „Ee i kë, nöö i mbei mi ko bëtë baa.” 41 Hën tjali u di womi kisi Jesosi, hën a tëndë maun panjëën, hën a taa: „Aai, mi kë! Ko bëtë.” 42 Nöö hën wantewante dë a ko bëtë. 43 Ufö Jesosi manda di womi go, hën a piki ën taa: 44 „Na konda di soni aki da na wan kodo sëmbë e. Ma go a di begima be a luku i, nöö i tja di soni di di Wëti u Mosesi bi taki taa wan sëmbë di ko limbo musu tja go tjuma da Gadu, be de si taa i bëtë tuutuu.” 45 Ma di di womi go, hën a go ta paaja di taki naandë te dou hii di köndë te Jesosi an bi sa ko a dee köndë ganda möön u sëmbë sa si ën. Nöö hën a fika a döösë u dee köndë ka sëmbë an ta dë hia. Ma tökuseei sëmbë bi ta kumutu a hii së nango nëën.