Dee soni dee Maikusi sikifi
2 Baka wantu daka, hën Jesosi toona go a Kapënaumi. Hën de paaja buka taa Jesosi toona ko a wosu. 2 Hën sömëni sëmbë booko gbulululu ko fuu di kamian dë te kamian an dë u denda go a di wosu dendu möön seei. Hën a bigi ta konda di buka u Gadu da de. 3 Hën fö womi tja wan lanma ko a Jesosi. 4 Ma fa sëmbë bi hia a di kamian, nöö de an bi sa feni pasi u go dou a Jesosi. Hën de fula wan baaku a di wosu liba leti a Jesosi liba dë, hën de saka di lanma a wan bedi* liba ko buta leti a Jesosi fesi a goon dë. 5 Di Jesosi si fa di biibi u dee sëmbë bi taanga tjika, hën a piki di lanma taa: „Baa o, mi da i paadon u dee hogi dee i bi du.” 6 Wanlö sabima u Wëti bi sai dë sindosindo leti naandë, ta guunjëën a de hati taa: 7 „Unfa di womi aki sa taki sö wan soni? Wisiwasi a ta wisiwasi Gadu. Ambë seei sa da sëmbë paadon u dee hogi di de bi du, boiti Gadu?” 8 Ma Jesosi bi ko sabi andi de bi ta pakisei. Fëën mbei a piki de taa: „Faandi mbei un ta pakisei hogi soni a unu hati sö? 9 Undi u dee soni aki möön fukë u taki a buka? Fii piki wan lanma taa: ’Mi da i paadon u dee hogi dee i bi du’, naa fii taa: ’Hopo, nöö i tei di bedi fii, nöö i waka go?’ 10 Ma mi kë lei unu taa di sëmbë di ko dë Libisëmbë Miii abi makiti a goonliba aki u da sëmbë paadon u dee zöndu u de.” Hën a bia piki di lanma taa: 11 „Mi taki e, hopo taanpu, nöö i tei di bedi fii, nöö i go a wosu.” 12 Hën a hopo, hën wantewante dë a tei di bedi fëën, hën a waka pasa a hii dee sëmbë fesi go a döö. Di soni dë bi bigi da dee sëmbë tee de ko ta gafa Gadu. De bi taa: „Wa bi si sö wan soni wan daka.”
13 Hën Jesosi toona go a di ze bandja, hën wanlö gaan hia sëmbë ko nëën, hën a bigi lei de soni. 14 Di a ta waka nango, hën a si di womi mii u Alufasi de kai Leifi dë sindosindo a wan kantoo ka de ta paka lanti möni. Hën a piki ën taa: „Ko dë bakama u mi.” Di a piki ën sö, hën a hopo, hën a bigi waka nëën baka. 15 Baka di dë, hën Jesosi go njan nëën pisi. Hën wanlö pii-lantimönima ku wanlö sëmbë dee an ta libi bunu a Gadu wojo, ko njan makandi ku Jesosi ku dee bakama fëën. Sömëni u dee lö sëmbë naandë bi ko dë bakama fëën. 16 Ma di dee sabima u Wëti dee bi dë Faliseima tu, bi si taa Jesosi bi ta njan makandi ku dee pii-lantimönima ku dee sëmbë dee an ta libi bunu a Gadu wojo, hën de hakisi dee bakama u Jesosi taa: „Di Mësitë fuunu ta njan makandi ku dee pii-lantimönima ku dee sëmbë dee an ta libi bunu a Gadu wojo nö?” 17 Di Jesosi jei di soni di de taki, hën a taki da de taa: „Sëmbë di dë bumbuu an abi data fanöudu, ma dee suwakima de abi data fanöudu. Ma ko u ko kai sëmbë di dë bumbuu sëmbë kaa e, ma mi ko u ko kai dee sëmbë dee an ta libi bunu a Gadu wojo.”
18 Dee bakama u Johanisi ku dee Faliseima bi guwenti u ta dë söndö njan u wan pisiten. Fëën mbei de go hakisi Jesosi taa: „Faandi mbei dee bakama u Johanisi ku dee bakama u dee Faliseima ta dë söndö njan u wan pisiten, ma dee bakama fii an ta du sö tu?” 19 Hën Jesosi piki de taa: „Te wan womi ta tööu, nöö dee mati fëën ta dë makandi ku ën a di piizii dendu. De aanfu dë söndö njan a di pisiten dë, na sö nö? Solanga di womi di ta tööu dë ku de, de an o sa dë söndö njan u wan pisiten. 20 Ma wan ten o ko ka di womi di ta tööu an o dë ku de möön, nöö nëën ufö de o dë söndö njan u wan pisiten. 21 De an ta tei wan njunjun koosu pisi lapu wan awoo koosu e. Biga di njunjun koosu o hai di awoo wan, nöö di baaku o ko möön bigi. 22 Leti sö nöö sëmbë an ta tei njunjun win lai a wan awoo mbeti kakisa saku e. Biga ee de du sö, nöö di njunjun win o soopu, nöö di saku o tënë, nöö di win ku di saku tuu o kaba a sösö. Ma sëmbë ta lai njunjun win a wan njunjun mbeti kakisa saku.”
23 A wan Saba daka, Jesosi ku dee bakama fëën bi ta waka pasa a wan goon ka sëmbë ta paandi wan soni kuma alisi sö. Di de ta pasa, hën dee bakama fëën bigi ta booko dee soni dee bi dë kuma alisi dë ta njan. 24 Hën dee Faliseima piki ën taa: „Faandi mbei dee bakama fii an ta hoi di wëti u di Saba daka?” 25 Hën a piki de taa: „Wan bi lesi a Gadu Buku andi Dafiti ku dee womi dee bi ta waka ku ën bi du di de an bi abi soni u njan, söseei di hangi bi kisi de u? 26 Te u ta lesi di woto u Abiata di fesima u dee begima, nöö u ta lesi taa di Dafiti bi go a di Wosu u Gadu, hën hën ku dee womi dee bi ta waka ku ën bi njan dee bëëë di de bi buta apaiti da Gadu. Ma di wëti an bi ta da de pasi u de njan mën. Dee begima wanwan nöö bi sa njan mën.” 27 Hën a piki de taa: „Gadu an mbei libisëmbë u de hoi Saba daka e, ma a seti di Saba daka u heepi libisëmbë. 28 Fëën mbei di sëmbë di ko dë Libisëmbë Miii abi taki a Saba daka liba.”