Dee soni dee Maikusi sikifi
3 Jesosi toona go a wan wosu ka dee Dju nango dini Gadu, nöö wan womi di maun fëën bi lan bi sai dë. 2 Dee Faliseima bi dë leti dë ta watji Jesosi luku ee a o kula di womi a di Saba daka naandë, biga de bi kë feni föutu nëën. 3 Hën Jesosi piki di womi di maun fëën bi lan taa: „Hopo, nöö i ko taanpu a mindi aki.” 4 Hën a bia hakisi dee sëmbë dee bi sai dë taa: „Unfa dee Wëti ta taki, dee sëmbë? Undi möön bunu? Fii du bunu a Saba daka, naa fii du hogi? Fii musu puu sëmbë a dëdë buka, naa fii disëën faa dëdë?” Ma na wan sëmbë piki ën möönsö, de tuu dë piii. 5 Nöö hën a luku de ku hatiboonu. Ma nöö a hati ën tu, u di tjali u sëmbë an ta kisi de möönsö. Hën a bia piki di womi di maun fëën bi lan taa: „Tëndë di maun fii ko i si.” Hën di womi tëndë maun dëën, hën di maun fëën ko bunu. 6 Hën dee Faliseima go a döö, hën de go kuutu makandi ku dee bakama u Helodi luku unfa de o du feni Jesosi kii.
7 Ma Jesosi ku dee bakama fëën kumutu ala, hën de go a di ze bandja. Hën wanlö gaan hia sëmbë u Galilea ku Judea bigi ta waka nëën baka. 8 Dee sëmbë u Jelusalën ku dee u Idumea, ku dee sëmbë dee ta dë a di woto së banda u Joodan lio, ku dee u dee köndëköndë u dee pisiwata u Tilusi ku Sidön seei bi ta waka nëën baka di de bi jei dee sömëni soni dee a bi ta du. 9 Jesosi piki dee bakama fëën be de seeka wan boto buta a bandja wata dëën, sö taa dee hia sëmbë dee bi sai dë an bi sa pusa ko nëën. 10 U di a bi ta kula sömëni sëmbë, mbei dee sëmbë dee bi suwaki gaanfa bi ta pusa ko nëën u de panjëën. 11 Te dee sëmbë dee bi dë ku taku soni a de liba bi si ën, nöö de bi ta kai a goon, ta bai taa: „Ju da di Womi Mii u Gadu.” 12 Ma sömëni pasi a bi piki de taa de an musu konda soni fëën da sëmbë.
13 Jesosi subi wan kuun, hën a kai wantu u dee bakama fëën, hën de ko nëën. 14 Nöö hën a tei tuwalufu u de, hën a kai de apösutu.* Dee sëmbë aki de bi o ta dë makandi ku ën, nöö de a bi o manda go paaja di bunu buka, 15 söseei de a bi o da di makiti u puu taku soni a sëmbë liba.
16 Dee në u dee tuwalufu apösutu di a tei da Simön, di a bi ta kai Petuisi tu. 17 Nöö joo kisi Jakobosi ku Johanisi. De da dee tu womi mii u Zebedeosi. Jesosi kai dee tu womi aki Boanëgësi, di kë taki „Miii u Döndö”. 18 Nöö i bi abi Andiasi, Filipi, Batolomisi, Mateosi, Tomasi, söseei i bi abi Jakobosi di womi mii u Alufasi. Boiti di dë, i bi abi Tadeosi, Simön, di bi dë kabakaba u du soni, 19 ku Judasi Isikaliötu, di bi sei Jesosi bakaten.
Hën Jesosi go a wan wosu, 20 hën wanlö gaan hia sëmbë toona booko ko nëën naandë tee hën ku dee bakama fëën an sa feni pasi u njan seei. 21 Di dee famii fëën ko jei taa sö ta pasa, hën de go u de go tei ën tja go. De bi ta taki taa: „Hedikamian fëën an ta wooko bunu.” 22 Boiti di dë, wanlö sabima u Wëti dee bi kumutu a Jelusalën ko dë, bi ta taki taa: „Belisabo* kisi ën a hedi. Di tiima u dee taku soni, hën ta heepi ën faa puu taku soni a sëmbë liba.” 23 Hën Jesosi kai de ko, hën a taki da de taa: „Saatan sa jaka Saatan puu a sëmbë liba nö? 24 Ee dee sëmbë dee dë a wan tii basu ta feti ku de na de, nöö di tii dë o booko. 25 Söseei ee sëmbë u wan wosudendu ta feti ku de na de, nöö di wosudendu dë o booko tu. 26 Ee Saatan ta feti ku hënseei, nöö hën da di tii fëën o booko. 27 Na wan sëmbë sa go a wan taanga womi wosu u go fufuu dee gudu fëën ee an kisi ën tai te a kaba bifö. Te a tai ën ufö a sa tei dee gudu dee dë a di wosu fëën. 28 Mi taki da unu taa Gadu sa da wan sëmbë paadon da hiniwan hogi di a du, aluwasi ee a wisiwasi dee soni u Gadu seei. 29 Ma ee wan sëmbë wisiwasi di kaakiti u Gadu, nöö na wan daka seei Gadu o dëën paadon möönsö.” 30 A bi taki dee soni dë u di de bi ta taki taa: „Wan taku soni dë nëën liba.”
31 Te wan pisi, hën Jesosi mma ku dee baaa fëën ko dë a dööbuka dë, hën de manda wan sëmbë go a dendu u go kai ën. 32 Sömëni sëmbë bi sindo lontu Jesosi a di wosu dendu. Nöö hën de piki ën taa: „Ju mma ku dee baaa fii dë a dööbuka dë e, nöö de ta suku i baka.” 33 Ma a piki de taa: „Ambë da mi mma? Nöö ambë da dee baaa u mi?” 34 Hën a luku dee sëmbë dee dë sindosindo lontu ën naandë, hën a taa: „Un luku mi mma ku dee baaa u mi aki! 35 Hiniwan sëmbë di ta du andi Gadu kë, hën da mi baaa ku mi sisa ku mi mma.”