Dee soni dee Maikusi sikifi

4 Hën Jesosi toona ko dë a di ze bandja möön, hën wanlö gaan hia sëmbë bi ko nëën. Hën a go sindo a wan boto dendu, hën de tötö di boto puu a lampeesi go a wata. Ma dee hia sëmbë bi dë a tela liba. 2 Hën a bigi ta konda woto u lei de sömëni soni. A piki de taa: 3 „Wan goonma bi nango jaa wanlö sii fëën. 4 So u dee sii kai a bandja pasi, hën dee fou ko njan de. 5 So u dee sii kai a sitonu kamian ka hia doti an dë, nöö hën de nasi hesi seei. 6 Ma di di sonu ko hati taanga, hën de dëë kaba a sösö, u di lutu u de an bi go fundu a goonbasu. 7 So u dee sii kai a maka dendu, hën de nasi. Ma nöö hën di maka göö peeta de te de an ko soni möönsö. 8 Ma so u dee sii kai a bunu doti, hën de ko soni seei. So u de puu 30 toon möön hia möön fa de bi paandi. Wotowan puu 60 toon möön hia, nöö wotowan puu 100 toon möön hia.” 9 Hën a piki de taa: „Be di sëmbë di jei dee soni aki, go kai pakisei a de.”

10 Di a bi dë hën wanwan, hën dee tuwalufu apösutu ku so u dee woto bakama fëën ko nëën ko hakisi ën andi dee woto dee a bi konda kë taki. 11 Hën a piki de taa: „Unu Gadu heepi fuun ko fusutan dee tjubitjubi woto di nama ku di Tii fëën, ma dee woto sëmbë an ta fusutan de. De ta si de kuma woto nöö a kaba. 12 Hii fa de ta luku, tökuseei de an ta si soni. Hii fa de ta jei, tökuseei de an ta fusutan di soni di de ta jei. Fëën mbei de an o bia ko a Gadu faa sa da de paadon.” 13 Nöö hën a hakisi de taa: „Wan bi fusutan di woto di mi lei unu nö? Wë nöö unfa woon du fusutan dee woto soni dee mi o toona lei unu möön?

14 Di sëmbë di ta jaa dee sii, da di sëmbë di ta paaja di wöutu u Gadu. 15 Dee sii dee kai a bandja pasi, dë kuma dee sëmbë dee jei di wöutu, ma Didibi* ko puu di wöutu di sëmbë paandi a de hati. 16 Dee sii dee kai a sitonu kamian ka hia doti an dë, dë kuma dee sëmbë dee jei di wöutu, nöö wantewante dë de tei ën ku wai. 17 Ma tökuseei di wöutu an dou de hati. Fëën mbei de ta piki di wöutu u wan pisiten, nöö te sëmbë ta du ku de u di wöutu dë hedi, nasö te fuka miti de u di wöutu dë hedi, nöö de an ta biibi di wöutu u Gadu möön. 18 Wotowan kai a maka dendu, nöö de dë kuma dee sëmbë dee jei di wöutu, 19 ma dee bookohedi u di ten aki* ku di ganjan di gudu ta ganjan sëmbë, ku dee soni di sëmbë hati ta kë, ta peeta di wöutu fu an göö ko soni da de möönsö. 20 Ma nöö dee sii dee kai a bunu doti, dë kuma dee sëmbë dee jei di wöutu, hën de tei ën ku wai. Dee sëmbë aki ta ko dë kuma wan pau di ta pai njanjan. So u de ta pai 30 toon möön hia. Wotowan ta pai 60 toon möön hia, nöö wotowan ta pai 100 toon möön hia.”

21 A piki de tu taa: „Te wan sëmbë sëndë wan faja, nöö an o tapëën ku wan manda,* söseei an o butëën a wan bedi basu, na sö nö? Ma a o hopo ën buta a liba. 22 Biga na wan soni sa dë a tjubi te nöö an o ko a döö. Nöö na wan soni sa pasa te nöö sëmbë an o ko sabi ën. 23 Be di sëmbë di jei dee soni aki, go kai pakisei a de.”

24 Hën a piki de tu taa: „Un buta pakisei a dee soni dee un ta jei. Möön i ta buta pakisei a soni, möön joo ko fusutan soni. 25 Ee wan sëmbë abi kaa, nöö Gadu o dëën möön hia. Ma ee wan sëmbë an abi hia, nöö di pikiwan di a abi seei, Gadu o puu nëën maun.”

26 Baka di dë hën a piki de taa: „Di Tii u Gadu dë kuma wan womi di ta jaa sii a wan goon. 27 A ta duumi ta weki, nöö dee sii ta nasi te de göö ko bigi. Ma an saanfa de ta du göö. 28 A goondoti di sii ta nasi, nöö te wan pisi a ta tja hedi ko a döö. A ta göö fëën ta ko, teee a ko abi njanjan. 29 Fa i si di njanjan lepi, nöö di goonma ta koti ën, u di di juu dou faa koti ën.”

30 Nöö hën a taa: „Ku andi u sa tei di Tii u Gadu maaka? Un woto mi sa tei konda da unu u lei unu fa a dë? 31 A dë kuma di sii de kai mutaadi. A dë di möön piki sii di sëmbë ta paandi a goonliba. 32 Ma a ta göö ko bigi möön hii dee woto soni tuu di sëmbë ta paandi a goon dendu te fou seei ta ko mbei wosu nëën.”

33 Dee lö woto aki Jesosi bi ta konda te a bi ta fan ku dee sëmbë. A bi ta konda woto di de bi o sa fusutan. 34 Hii juu Jesosi bi ta konda woto da sëmbë u lei de soni. Ma te hën ku dee bakama fëën bi dë de wanwan, nöö a bi ta konda da de andi dee woto kë taki.

35 A di seei daka dë, di kamian bigi dungu, hën a piki dee bakama fëën taa: „Boo haba go a woto banda.” 36 Di de manda dee sëmbë go, nöö hën de subi a boto. Ma wanlö woto boto bi faaka de tu. 37 Hën wan gaan ventu ko ta seki di wata tee di wata nango a di boto dendu te kuma de sa singi. 38 Jesosi bi dë a di boto gogo. A bi kandi buta hedi a wan kunsu liba, hën a duumi go piii. Hën dee bakama fëën go weki ën, hën de piki ën taa: „Mësitë, ja si taa woo singi nö?” 39 Hën a hopo, hën a gandji da di ventu, hën a piki di ze taa: „Dë piii!” Nöö fa a fan dë, hën di ventu ku di ze kötö piii. 40 Hën a piki dee bakama fëën taa: „Faandi mbei un ta fëëë sö? Di biibi fuunu an taanga jeti nö?” 41 Hën dee bakama fëën fëëë te na soni, hën de ta taki da de na de taa: „Ambë seei da di womi aki? Te kisi di ventu ku di ze seei ta du andi a taki!”