Dee soni dee Maikusi sikifi
8 Wan woto daka möön, a ko pasa sö taa wanlö hia sëmbë ko a Jesosi. De an bi abi soni u njan. Fëën mbei Jesosi kai dee bakama fëën ko nëën, hën a taa: 2 „Tjali u dee sëmbë aki kisi mi o. Biga tide mbei di u dii daka di de dë ku mi aki, nöö de an abi na wan soni u njan. 3 Ee mi manda de go söndö njan, nöö de o faau a pasi. So u de ta libi longi ku aki.” 4 Ma dee bakama fëën piki ën taa: „Wë sëmbë an ta libi a di kamian aki, nöö naasë u sa feni soni u njan tjika u da dee hia sëmbë aki?” 5 Hën a hakisi de taa: „Un mëni bëëë un abi?” Hën de piki ën taa: „U abi seibi bëëë.” 6 Hën a piki dee sëmbë u de sindo a goon. Hën a tei dee seibi bëëë, hën a da Gadu tangi te a kaba. Nöö hën a booko de a sömëni pisi, hën a tëndë da dee bakama fëën u de tja go paati da dee sëmbë. 7 De bi abi wantu piki fisi tu. A da Gadu tangi te a kaba, hën a piki dee bakama fëën u de paati dee fisi da dee sëmbë. 8 Hën hii dee sëmbë njan te bëë u de fuu, hën dee bakama go pii dee bëëë dee bi fika, nöö hën de lai seibi gaan manda ku de. 9 De bi dë söwan 4000 womi dee bi njan. Baka di dë, hën Jesosi manda de go.
10 Nöö baka di dee sëmbë go, hën Jesosi ku dee bakama fëën subi a boto, hën de hai go a di pisiwata de kai Damanuta. 11 Di a dou ala, hën dee Faliseima go mbei toobi ku ën. U di de bi kë poobëën, mbei de hakisi ën faa lei de wan maaka di ta lei taa Gadu hën mandëën ko. 12 Hën Jesosi djëmë, hën a taa: „Faandi mbei dee sëmbë u di ten aki ta suku u si wan foombo soni ufö? Mi taki e, ma o du na wan foombo wooko lei unu möönsö e.” 13 Di a taki sö te a kaba, hën a waka go disa de. Hën a toona subi a wan boto, hën a go a woto së banda.
14 Ma dee bakama fëën bi fëëkëtë u tja bëëë. De an bi abi na wan soni u njan a di boto, wan kodo bëëë nöö de bi abi. 15 Hën Jesosi piki de taa: „Un mëni unuseei e, nöö un köni ku di sooda u dee Faliseima ku di u Helodi.” 16 Hën de bigi ta buja ku deseei u di de an bi abi bëëë. 17 Di a si taa de ta buja ku deseei, hën a piki de taa: „Faandi mbei un ta buja u di waan bëëë? Wan ta fusutan andi mi kë piki unu nö? Unfa a waka taa wan ta fusutan jeti? 18 Biga un abi wojo ma wan ta si soni, un abi jesi ma wan ta jei soni. Wan sabi möön andi bi pasa 19 di mi bi tei dee feifi bëëë booko pisipisi, hën un paati de da dee 5000 womi nö? Un mëni manda un bi lai ku dee bëëë dee bi fika?” Nöö hën de piki taa: „Tuwalufu manda.” 20 „Di mi bi tei dee seibi bëëë booko pisipisi, hën un paati de da dee 4000 womi, nöö un mëni manda un bi lai ku dee bëëë dee bi fika?” Nöö hën de piki taa: „Seibi manda.” 21 Di de piki sö kaa, hën a hakisi de taa: „Wan ta fusutan andi mi kë piki unu nö?”
22 Nöö hën de tjökö a di köndë de kai Bëtisaida. Hën sëmbë tja wan bookowojoma ko a Jesosi, hën de begi ën faa nama maun a di womi be a ko ta si soni. 23 A panjan di bookowojoma a maun, hën a tjëën go a döösë u di köndë. Nöö hën a tunta a di womi wojo, hën a nama maun nëën. Nöö hën a hakisi ën taa: „I ta si soni ö?” 24 Hën di womi hopo wojo, hën a piki taa: „Wë mi ta si sëmbë ta waka ma de ta djei pau.” 25 Hën Jesosi lobi maun a di womi wojo wan pasi möön, hën di womi ko ta si soni bumbuu. A bi ko ta si soni seei gbegedee awaa. 26 Hën Jesosi mandëën go a wosu, hën a piki ën taa: „Ja musu go a di köndë ganda e.”
27 Jesosi ku dee bakama fëën bi nango a di pisiwata de kai Sesalia Filipi. Di de bi dë a pasi, hën a hakisi dee bakama fëën taa: „Andi un ta jei sëmbë ta taki u mi?” 28 Hën de piki ën taa: „Wë u ta jei sëmbë ta taki taa i da Johanisi di Dopuma, so u de ta taki taa i da Elia, nöö wotowan ta taki taa i da wan u dee tjabukama.” 29 Hën a toona hakisi de taa: „Nöö unu wë? Andi un ta pakisei u mi?” Hën Petuisi piki ën taa: „I da di Keesitu.” 30 Di Petuisi piki sö, hën Jesosi piki de taa de an musu konda di soni aki da na wan sëmbë. 31 Hën Jesosi bigi ta piki de taa di sëmbë di ko dë Libisëmbë Miii musu tja hia sitaafu, nöö dee gaanwomi ku dee fesima u dee begima, ku dee sabima u Wëti o du ku ën u te de kii ën. Nöö baka dii daka a o toona weki ko a libi baka. 32 Sö a fan ku dee bakama fëën limbolimbo. Hën Petuisi kai ën tja go a së, hën a gandji dëën. 33 Hën Jesosi bia luku dee bakama fëën, hën a gandji da Petuisi taa: „Waka pasa kumutu a mi fesi dë, ju Saatan. Biga fa i fan dë, nöö na Gadu pakisei hën di dë e, ma libisëmbë pakisei hën di dë.”
34 Hën Jesosi kai dee bakama fëën ku dee gaan hia sëmbë dee bi sai dë ko nëën, hën a piki de taa: „Ee wan sëmbë kë waka a mi baka tuutuu, nöö a musu disa di soni di hënseei ta kë, nöö a musu tja di posu* fëën, nöö a musu ta waka a mi baka nöömö. 35 Biga di sëmbë di kë tjubi di libi fëën, o lasi ën. Ma di sëmbë di lasi hën libi u mi hedi, söseei u di bunu buka hedi, o feni libi. 36 Un wini a abi da wan sëmbë ee a feni hii soni u di goonliba aki tuu, ma a lasi ën libi? 37 Nöö andi seei wan sëmbë sa paka fu an lasi hën libi? 38 Ee wan sëmbë sen ta kisi ën faa piki dee sëmbë u di ten aki dee an ta libi kumafa Gadu kë taa a nama ku mi, nasö ee sen ta kisi ën faa du dee soni dee mi ta taki, nöö sen o kisi di sëmbë di ko dë Libisëmbë Miii tu te a o ko ku di gaan hei fëën Tata ku dee basia u Gadu u piki taa di sëmbë dë da wan bakama fëën.”