Dee soni dee Lukasi sikifi
16 Hën Jesosi piki dee bakama fëën taa: „Wan guduma bi dë, nöö a bi buta wan womi u luku di wosu fëën dëën. Ma wan daka hën a ko jei taa a ta poi dee gudu fëën. 2 Hën di guduma kai ën ko, hën a taa: ’Mi jei taa i ta poi dee gudu u mi. Sikifi buta a pampia da mi unfa i wooko ku dee gudu u mi tjika, biga ja o abi taki a di wosu u mi möön.’ 3 Hën di womi hakisi hënseei taa: ’Unfa seei mi o du ee di basi u mi ko puu mi a di wooko aki? Biga ma taanga tjika u wooko goon, söseei sen ta kisi mi u mi go pidi sëmbë soni. 4 Sööö, mi saandi mi o du u woto sëmbë sa hoi mi a wosu te de puu mi a di wooko aki.’ 5 Hën a kai hiniwan u dee sëmbë dee bi musu paka di basi fëën ko. Hën a hakisi di fosuwan taa: ’Un mëni i musu paka di basi u mi?’ 6 Hën a piki ën taa: ’Mi abi 100 bali* fatu u dëën.’ Hën di womi piki ën taa: ’Hesi, tei di pampia di i bi sikifi un mëni i bi musu paka, nöö sikifi 50 bali nëën.’ 7 Hën di womi hakisi di u tu sëmbë taa: ’Un mëni ii musu pakëën?’ Hën a taa: ’Mi musu dëën 100 saku* boon.’ Hën di womi piki ën taa: ’Tei di pampia di i bi sikifi un mëni i bi musu paka, nöö sikifi 80 saku nëën.’ 8 Wë hii fa di womi aki an bi ta du di wooko fëën a wan leti fasi, tökuseei di guduma gafëën u di a bi du soni ku köni. Mi taki da unu e, dee sëmbë u di goonliba aki* dee an ta libi bunu a Gadu wojo, ta möön du soni ku köni u tja wini ko da deseei, möön leki dee sëmbë dee ta dini Gadu.*
9 Ma mi ta piki unu tu taa: Un wooko ku dee gudu u di goonliba aki fuun sa ko abi mati e. Nöö te dee gudu aki an o dë möön, nöö dee mati fuunu aki sa mbei un libi a kamian ka sëmbë sa libi u teego. 10 Ee wan sëmbë dë u futööu a dee möön pikipiki soni, nöö joo sa futööu ën a dee möön gaangaan soni. Ma ee ja sa futööu ën ku pikipiki soni, nöö ja o sa futööu ën ku gaangaan soni tu. 11 Fëën mbei ee wan sa lei taa un dë u futööu ku dee gudu u di goonliba aki, nöö ambë seei o sa futööu unu ku di tuutuu gudu? 12 Nöö ee wan sëmbë ja ta seeka woto sëmbë soni te de butëën a i maun, nöö unfa de o da i soni fii seei, fii seeka? 13 Na wan saafu sa wooko da tu masa, biga a o lobi wan, nöö a o buuse di wotowan, nasö a o hëngi a wan, nöö a o ta wisiwasi di wotowan. Ja sa dini Gadu ku Gudu a di wan seei ten.”
14 Dee Faliseima bi abi langawojo u möni. De bi sai dë piii ta haika Jesosi, hën de bigi ta sösö ën ta mbei ën fa. 15 Fëën mbei Jesosi piki de taa: „A sëmbë wojo un ta mbei taa un dë bumbuu sëmbë, ma Gadu sabi unu hati. Biga di soni di libisëmbë ta si u gaan bumbuu soni, hën Gadu ta si kuma poipoi soni.
16 Dee Wëti ku dee soni di dee Tjabukama bi sikifi bi dë te dou di ten u Johanisi. Nöö sensi di Johanisi dou, hën sëmbë bigi ta paaja di bunu buka u di Tii u Gadu. Nöö hii pei sëmbë ta biinga nëën baka. 17 Mi taki da unu e, aluwasi liba ala ku goonliba aki bi o booko kaba a sösö, tökuseei na wan u dee soni dee sikifi a dee Wëti aki o fika di an o pasa e. Dee pikipiki pisi fëën tuu seei o pasa.
18 Ee wan womi booko tööu ku hën mujëë, nöö a go tööu ku wan woto mujëë, nöö hën da a libi fanafiti a di së u manu ku mujëë soni. Nöö ee wan womi tööu ku wan mujëë di booko tööu, nöö hën da di womi dë seei libi fanafiti a di së u manu ku mujëë soni tu.
19 Wan guduma bi dë, di bi ta bisi wanlö gaan diidii koosu. Hiniwan daka a bi ta piizii ku dee gudu fëën. 20 Ma sëmbë bi lo’ u tja wan pootima de kai Lazalosi di bi dë ku kasikaasi a hii ën sinkii, go buta a di guduma aki dööbuka faa ta pidi sëmbë soni. 21 Nöö a bi ta dë seei setiseti ta wakiti u te njanjan u di guduma kumutu nëën tafa kai a goon, nöö a go pii njan. Dee dagu bi ta ko ta lëmbë dee kasikaasi nëën sinkii. 22 Nöö hën de dë te wan pisi, hën di pootima ko dëdë. Hën dee basia u Gadu ko tei ën tja go a Abahamu bandja.
Nöö hën bakaten, di guduma seei ko dëdë tu, hën de tjëën go bei. 23 Nöö a geebi* ala a dë ta tja sitaafu, hën a hopo wojo luku te ala, hën a si Lazalosi a Abahamu bandja. 24 Hën di guduma bai kai Abahamu. A taa: ’Taata oo, taata, gaantangi, abi tjalihati u mi baa, nöö i manda Lazalosi be a tuusi finga a wata tja ko munjan mi töngö. Biga mi ta tja sitaafu a di gaan faja di ta kisi gililili aki.’ 25 Nöö hën Abahamu piki ën taa: ’Kee, aai mii, wë mi jei e. Ma mëni taa di ten di i bi dë a libi, i bi ta libi wan bunu libi fii seei. Ma Lazalosi, hën a bi ta tja hii pei fuka. Nöunöu Lazalosi hën ko feni böö, nöö ii ta tja sitaafu. 26 Boiti di dë, wan gaan baaku dë ta paati u ku i, sö taa dee sëmbë dee kë haba ko a i ala an sa haba ko ala. Nöö dee sëmbë dee dë a i ala an sa haba ko a u aki.’ 27 Hën di guduma taa: ’Wë kamda a dë sö, nöö mi begi i taata, gaantangi, manda Lazalosi be a go a mi tata wosu. 28 Mi abi feifi baaa ala, nöö be a wasiköu de da mi, sö taa deseei an ko tja sitaafu a di kamian aki.’ 29 Hën Abahamu piki ën taa: ’De abi dee soni dee Mosesi ku dee Tjabukama bi sikifi. Be de haika andi dee buku dë ta taki.’ 30 Hën di guduma taa: ’Taata, de an o haika. Ma ee wan sëmbë di dëdë weki ko a libi baka hën go wasiköu de, nöö de o bia de libi.’ 31 Hën Abahamu piki ën taa: ’Ee de an ta haika dee soni dee Mosesi ku dee Tjabukama bi sikifi, nöö aluwasi ee wan sëmbë dëdë weki ko a libi baka ko fan ku de seei, tökuseei de an o jei möönsö.’”