Dee soni dee Mateosi sikifi

23 Hën Jesosi fan ku dee bakama fëën ku dee gaan hia sëmbë dee bi sai dë tuu. A piki de taa: 2 „Dee sabima u Wëti ku dee Faliseima buta deseei a Mosesi kamian. 3 Fëën mbei un musu ta du hii dee soni di de ta piki unu fuun du, ma wan musu du dee soni di de ta du. Biga deseei an ta du dee soni di de ta lei sëmbë. 4 De ta tai hebi lai buta a wotowan ahömaun, ma deseei an kë tja na wan u dee lai dë. 5 Hii soni de ta du, de ta du ën u sëmbë musu si de. Biga de ta mbei dee piki dosu dee ta hoi dee pisipisi u di Wöutu u Gadu ko möön bigi. De ta bisi de kuma tapa, söseei de ta nai dee jëkëjëkë u di koosu buka u de ko möön langa. 6 Te sëmbë ta hoi piizii, nöö de lo’ u go sindo a dee möön bunu kamian. Nöö te de go a dee wosu ka dee Dju nango dini Gadu, nöö de nango sindo seei te a fesi. 7 De lo’ te sëmbë ta da de odi a wojowojo, nöö de ta kë u sëmbë ta kai de Mësitë.* 8 Ma wan musu mbei sëmbë kai unu Mësitë e. Biga wan Mësitë nöö unu abi, nöö hii unu tuu da baaa. 9 Boiti di dë, wan musu kai sëmbë a goonliba aki taata e, biga wan Tata nöö un abi, di dë a liba ala. 10 Wan musu mbei sëmbë kai unu fesima e, biga wan kodo Fesima nöö unu abi, hën da di Keesitu. 11 Di sëmbë di kë ko dë di möön heiwan a unu mindi musu dë kuma wan wookoma da unu. 12 Gadu o saka di sëmbë di ta suku u hopo hënseei, nöö a o hopo di sëmbë di ta saka hënseei.

13 Mi bai helu da unu, un dee sabima u Wëti ku dee Faliseima. Un bödjëëma unu! Biga un ta tapa pasi da sëmbë u de go a di Tii u Gadu di dë a liba ala. Unuseei wan nango nëën dendu, nöö un ta tapa pasi da sëmbë u deseei an go tu. 14*⁠——

15 Mi bai helu da unu, un dee sabima u Wëti ku dee Faliseima. Un bödjëëma unu! Biga un ta waka ta lontu goonliba ta suku sëmbë u waka a unu baka, nöö te de ko ta waka a unu baka kaa, nöö un ta mbei de ko dë sëmbë di o go a Gehëna.* Sö wan sëmbë ta ko möön hogi möön unu.

16 Mi bai helu da unu. Un ta suku u lei sëmbë di pasi, ma unu da bookowojoma di ta taki taa ’an dë wan hogi soni u wan sëmbë soi kai di Wosu u Gadu, ma ee wan sëmbë soi kai di goutu u di Wosu u Gadu, nöö a musu du kumafa a soi’. 17 Wë un dee bookowojoma dë, unfa un du don sö? Andi möön dë fanöudu? Di goutu, naa di Wosu u Gadu di mbei di goutu ko dë apaiti? 18 Boiti di dë, un ta taki taa ’an dë wan hogi soni u wan sëmbë soi kai di begitafa, ma ee wan sëmbë soi kai wan soni di sëmbë tja ko buta a di begitafa liba, nöö a musu du kumafa a soi’. 19 Unu bookowojoma! Andi möön dë fanöudu? Di soni di sëmbë ta tja ko buta a di begitafa liba, naa di begitafa di mbei di soni dë ko dë apaiti? 20 Mi taki da unu e, di sëmbë di soi kai di begitafa, nöö hën da a soi ku ën ku hii dee soni dee dë nëën liba tuu. 21 Di sëmbë di soi kai di Wosu u Gadu, nöö hën da a soi ku ën ku di Gadu di ta libi a di Wosu dë tuu. 22 Nöö di sëmbë di soi kai liba ala, nöö hën da a soi kai di könu bangi u Gadu ku Gadu seei di dë sindosindo nëën.

23 Mi bai helu da unu, un dee sabima u Wëti ku dee Faliseima. Un bödjëëma unu! Biga un ta paati di uwii de kai menti ku di uwii de kai dill ku di djira a teni pisi, nöö un ta da Gadu di u fëën pisi kumafa dee Wëti ta taki. Ma dee möön fanöudu soni u dee Wëti un ta buta a wan së. Wan ta kuutu soni a wan leti fasi, wan ta abi tjalihati u sëmbë, söseei wan ta hoi unuseei a wotowan ku Gadu tuu. A bunu taa un ta da di u teni pisi u dee soni dee unu abi, ma wan musu fëëkëtë dee möön fanöudu soni u dee Wëti. 24 Un ta suku u lei sëmbë di pasi, ma un dë kuma wan bookowojoma di ta maani maku puu a di bebe fëën, ma a ta guli di gaan gindi mbeti de kai kamëli.

25 Mi bai helu da unu, un dee sabima u Wëti ku dee Faliseima. Un bödjëëma unu! Biga un dë kuma kan ku paabi di dë limbolimbo a döösë, ma di dë sundjusundju a dendu. Un a’ langahati, söseei un ta pakisei unuseei nöö. 26 Un dee bookowojo Faliseima aki, un musu limbo dendu u di kan ku di paabi fosu, nöö döösë fëën o limbo tu.

27 Mi bai helu da unu, un dee sabima u Wëti ku dee Faliseima. Un bödjëëma unu! Biga un dë leti kuma dee geebi de ta seeka feifi a döösë tee de ko dë wetiweti faan limbolimbo. Ma dendu u de lai ku dëdë sëmbë pondipondi fika bonu. 28 Sö nöö unuseei dë tu. Biga un ta du kuma un da gaan bumbuu sëmbë, ma hati dendu fuunu lai ku bödjëë fasi ku hii pei hogi.

29 Mi bai helu da unu, un dee sabima u Wëti ku dee Faliseima. Un bödjëëma unu! Biga un ta seeka dee geebi u dee fesiten tjabukama u Gadu, ku dee u dee woto sëmbë dee bi libi bunu a Gadu wojo. Un ta bisi de te de hanse möön hii soni, 30 nöö un ta taki taa: ’Ee u bi dë a di ten u dee avo fuu, nöö wa bi o kii dee tjabukama u Gadu kumafa dee gaansëmbë fuu bi kii de.’ 31 Unuseei ta taki taa un dë bakamii u dee sëmbë dee bi kii dee tjabukama u Gadu. 32 Wë nöö un libi go dou kumafa dee gaansëmbë fuunu bi libi.

33 Unu sindeki unu! Unu sindeki mii unu! Un si kuma woon sa fusi da di sitaafu u Gehëna* u? 34 U dee soni aki hedi mbei mi o manda woto tjabukama, könima, ku bumbuu leima ko a unu. So u de woon peka a posu kii, so u de woon fon a dee wosu ka un nango dini Gadu, nöö wotowan woon ta buta ku de ta jaka ta puu a köndëköndë. 35 Fëën mbei mi taki da unu taa hii dee sëmbë dee bi libi bunu a Gadu wojo, dee de bi kii a goonliba aki tuu o fika a unu liba, kumutu a Abëli te dou a Sakalia di mii u Belekia di dee avo fuunu bi kii a di Wosu u Gadu ku di begitafa mindi. 36 Mi taki da unu taa dee sëmbë u di ten aki de o paka da hii dee soni aki tuu.

37 Un dee sëmbë u Jelusalën, un kii dee tjabukama u Gadu, nöö un vinde sitonu naki dee sëmbë kii dee Gadu bi manda da unu. Sömëni pasi mi bi kë tja dee mii fuunu ko a wan kumafa wan mama ganian ta kai dee mii fëën u de ko nëën hanza basu faa tjubi de. Ma nöö wan bi kë möönsö. 38 Wë fëën mbei Gadu o go disa di Wosu fëën.* 39 Mi taki e, wan o si mi möön u te di daka dou ka woon ta bai taa: ’Be di sëmbë di Jehoufa* manda ko feni gaan bunu!’”